ಅಕ್ಷಮಾಲಿಕೋಪನಿಷತ್

ಅಕ್ಷಮಾಲಿಕೋಪನಿಷತ್
ಅಕಾರಾದಿಕ್ಷಕಾರಾನ್ತವರ್ಣಜಾತಕಲೇವರಮ್ .
ವಿಕಲೇವರಕೈವಲ್ಯಂ ರಾಮಚನ್ದ್ರಪದಂ ಭಜೇ ..

ಓಂ ವಾಙ್ಮೇ ಮನಸಿ ಪ್ರತಿಷ್ಠಿತಾ ಮನೋ ಮೇ ವಾಚಿ ಪ್ರತಿಷ್ಠಿತಮಾವಿರಾವೀರ್ಮ ಏಧಿ ..

ವೇದಸ್ಯ ಮ ಆಣೀಸ್ಥಃ ಶ್ರುತಂ ಮೇ ಮಾ ಪ್ರಹಾಸೀರನೇನಾಧೀತೇನಾರಾತ್ರಾನ್ಸನ್ದಧಾಮ್ಯೃತಂ ವದಿಷ್ಯಾಮಿ ಸತ್ಯಂ ವದಿಷ್ಯಾಮಿ ..

ತನ್ಮಾಮವತು ತದ್ವಕ್ತಾರಮವತು ಅವತು ಮಾಮವತು ವಕ್ತಾರಮವತು ವಕ್ತಾರಮ್ ..

ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ..

ಹರಿಃ ಓಂ .
ಅಥ ಪ್ರಜಾಪತಿರ್ಗುಹಂ ಪಪ್ರಚ್ಛ ಭೋ ಬ್ರಹ್ಮನ್ನಕ್ಷಮಾಲಾಭೇದವಿಧಿಂ ಬ್ರೂಹೀತಿ .
ಸಾ ಕಿಂ ಲಕ್ಷಣಾ ಕತಿ ಭೇದಾ ಅಸ್ಯಾಃ ಕತಿ ಸೂತ್ರಾಣಿ ಕಥಂ ಘಟನಾಪ್ರಕಾರಃ ಕೇ ವರ್ಣಾಃ ಕಾ ಪ್ರತಿಷ್ಠಾ ಕೈಷಾಧಿದೇವತಾ ಕಿಂ ಫಲಂ ಚೇತಿ .
ತಂ ಗುಹಃ ಪ್ರತ್ಯುವಾಚ ಪ್ರವಾಲಮೌಕ್ತಿಕಸ್ಫಟಿಕಶಙ್ಖರಜತಾಷ್ಟಾಪದಚನ್ದನಪುತ್ರಜೀವಿಕಾಬ್ಜೇ ರುದ್ರಾಕ್ಷಾ ಇತಿ .
ಆದಿಕ್ಷಾನ್ತಮೂರ್ತಿಃ ಸಾವಧಾನಭಾವಾ .
ಸೌವರ್ಣಂ ರಾಜತಂ ತಾಮ್ರಂ ತನ್ಮುಖೇ ಮುಖಂ ತತ್ಪುಚ್ಛೇ ಪುಚ್ಛಂ ತದನ್ತರಾವರ್ತನಕ್ರಮೇಣ ಯೋಜಯೇತ್ .
ಯದಸ್ಯಾನ್ತರಂ ಸೂತ್ರಂ ತದ್ಬ್ರಹ್ಮ .
ಯದ್ದಕ್ಷಪಾರ್ಶ್ವೇ ತಚ್ಛೈವಮ್ .
ಯದ್ವಾಮೇ ತದ್ವೈಷ್ಣವಮ್ .
ಯನ್ಮುಖಂ ಸಾ ಸರಸ್ವತೀ .
ಯತ್ಪುಚ್ಛಂ ಸಾ ಗಾಯತ್ರೀ .
ಯತ್ಸುಷಿರಂ ಸಾ ವಿದ್ಯಾ .
ಯಾ ಗ್ರನ್ಥಿಃ ಸಾ ಪ್ರಕೃತಿಃ .
ಯೇ ಸ್ವರಾಸ್ತೇ ಧವಲಾಃ .
ಯೇ ಸ್ಪರ್ಶಾಸ್ತೇ ಪೀತಾಃ .
ಯೇ ಪರಾಸ್ತೇ ರಕ್ತಾಃ .
ಅಥ ತಾಂ ಪಞ್ಚಭಿರ್ಗನ್ಧೈರಮೃತೈಃ ಪಞ್ಚಭಿರ್ಗವ್ಯೈಸ್ತನುಭಿಃ ಶೋಧಯಿತ್ವಾ ಪಞ್ಚಭಿರ್ಗವ್ಯೈರ್ಗನ್ಧೋದಕೇನ ಸಂಸ್ನಾಪ್ಯ ತಸ್ಮಾತ್ಸೋಙ್ಕಾರೇಣ ಪತ್ರಕೂರ್ಚೇನ ಸ್ನಪಯಿತ್ವಾಷ್ಟಭಿರ್ಗನ್ಧೈರಾಲಿಪ್ಯ ಸುಮನಃಸ್ಥಲೇ ನಿವೇಶ್ಯಾಕ್ಷತಪುಷ್ಪೈರಾರಾಧ್ಯ ಪ್ರತ್ಯಕ್ಷಮಾದಿಕ್ಷಾನ್ತೈರ್ವರ್ಣೈರ್ಭಾವಯೇತ್ .
ಓಮಙ್ಕಾರ ಮೃತ್ಯುಞ್ಜಯ ಸರ್ವವ್ಯಾಪಕ ಪ್ರಥಮೇಽಕ್ಷೇ ಪ್ರತಿತಿಷ್ಠ .
ಓಮಾಙ್ಕಾರಾಕರ್ಷಣಾತ್ಮಕಸರ್ವಗತ ದ್ವಿತೀಯೇಽಕ್ಷೇ ಪ್ರತಿತಿಷ್ಠ .
ಓಮಿಙ್ಕಾರಪುಷ್ಟಿದಾಕ್ಷೋಭಕರ ತೃತೀಯೇಽಕ್ಷೇ ಪ್ರತಿತಿಷ್ಠ .
ಓಮೀಙ್ಕಾರ ವಾಕ್ಪ್ರಸಾದಕರ ನಿರ್ಮಲ ಚತುರ್ಥೇಽಕ್ಷೇ ಪ್ರತಿತಿಷ್ಠ .
ಓಮುಙ್ಕಾರ ಸರ್ವಬಲಪ್ರದ ಸಾರತರ ಪಞ್ಚಮೇಽಕ್ಷೇ ಪ್ರತಿತಿಷ್ಠ .
ಓಮೂಙ್ಕಾರೋಚ್ಚಾಟನ ದುಃಸಹ ಷಷ್ಠೇಽಕ್ಷೇ ಪ್ರತಿತಿಷ್ಠ .
ಓಮೃಙ್ಕಾಕಾರ ಸಂಕ್ಷೋಭಕರ ಚಞ್ಚಲ ಸಪ್ತಮೇಽಕ್ಷೇ ಪ್ರತಿತಿಷ್ಠ .
ಓಮೄಙ್ಕಾರ ಸಂಮೋಹನಕರೋಜವಲಾಷ್ಟಮೇಽಕ್ಷೇ ಪ್ರತಿತಿಷ್ಠ .
ಓಮ್ಲೃಙ್ಕಾರವಿದ್ವೇಷಣಕರ ಮೋಹಕ ನವಮೇಽಕ್ಷೇ ಪ್ರತಿತಿಷ್ಠ .
ಓಮ್ಲೄಙ್ಕಾರ ಮೋಹಕರ ದಶಮೇಽಕ್ಷೇ ಪ್ರತಿತಿಷ್ಠ .
ಓಮೇಙ್ಕಾರ ಸರ್ವವಶ್ಯಕರ ಶುದ್ಧಸತ್ತ್ವೈಕಾದಶೇಽಕ್ಷೇ ಪ್ರತಿತಿಷ್ಠ .
ಓಮೈಙ್ಕಾರ ಶುದ್ಧಸಾತ್ತ್ವಿಕ ಪುರುಷವಶ್ಯಕರ ದ್ವಾದಶೇಽಕ್ಷೇ ಪ್ರತಿತಿಷ್ಠ .
ಓಮೋಙ್ಕಾರಾಖಿಲವಾಙ್ಮಯ ನಿತ್ಯಶುದ್ಧ ತ್ರಯೋದಶೇಽಕ್ಷೇ ಪ್ರತಿತಿಷ್ಠ .
ಓಮೌಙ್ಕಾರ ಸರ್ವವಾಙ್ಮಯ ವಶ್ಯಕರ ಚತುರ್ದಶೇಽಕ್ಷೇ ಪ್ರತಿತಿಷ್ಠ .
ಓಮಙ್ಕಾರ ಗಜಾದಿವಶ್ಯಕರ ಮೋಹನ ಪಞ್ಚದಶೇಽಕ್ಷೇ ಪ್ರತಿತಿಷ್ಠ .
ಓಮಃಕಾರ ಮೃತ್ಯುನಾಶನಕರ ರೌದ್ರ ಷೋಡಶೇಽಕ್ಷೇ ಪ್ರತಿತಿಷ್ಠ .
ಓಂ ಕಙ್ಕಾರ ಸರ್ವವಿಷಹರ ಕಲ್ಯಾಣದ ಸಪ್ತದಶೇಽಕ್ಷೇ ಪ್ರತಿತಿಷ್ಠ .
ಓಂ ಖಙ್ಕಾರ ಸರ್ವಕ್ಷೋಭಕರ ವ್ಯಾಪಕಾಷ್ಟಾದಶೇಽಕ್ಷೇ ಪ್ರತಿತಿಷ್ಠ .
ಓಂ ಗಙ್ಕಾರ ಸರ್ವವಿಘ್ನಶಮನ ಮಹತ್ತರೈಕೋನವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಘಙ್ಕಾರ ಸೌಭಾಗ್ಯದ ಸ್ತಮ್ಭನಕರ ವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಙಕಾರ ಸರ್ವವಿಷನಾಶಕರೋಗ್ರೈಕವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಚಙ್ಕಾರಾಭಿಚಾರಘ್ನ ಕ್ರೂರ ದ್ವಾವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಛಙ್ಕಾರ ಭೂತನಾಶಕರ ಭೀಷಣ ತ್ರಯೋವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಜಙ್ಕಾರ ಕೃತ್ಯಾದಿನಾಶಕರ ದುರ್ಧರ್ಷ ಚತುರ್ವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಝಙ್ಕಾರ ಭೂತನಾಶಕರ ಪಞ್ಚವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಞಕಾರ ಮೃತ್ಯುಪ್ರಮಥನ ಷಡ್ವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಟಙ್ಕಾರ ಸರ್ವವ್ಯಾಧಿಹರ ಸುಭಗ ಸಪ್ತವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಠಙ್ಕಾರ ಚನ್ದ್ರರೂಪಾಷ್ಟಾವಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಡಙ್ಕಾರ ಗರುಡಾತ್ಮಕ ವಿಷಘ್ನ ಶೋಭನೈಕೋನತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಢಙ್ಕಾರ ಸರ್ವಸಂಪತ್ಪ್ರದ ಸುಭಗ ತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಣಙ್ಕಾರ ಸರ್ವಸಿದ್ಧಿಪ್ರದ ಮೋಹಕರೈಕತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ತಙ್ಕಾರ ಧನಧಾನ್ಯಾದಿಸಂಪತ್ಪ್ರದ ಪ್ರಸನ್ನ ದ್ವಾತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಥಙ್ಕಾರ ಧರ್ಮಪ್ರಾಪ್ತಿಕರ ನಿರ್ಮಲ ತ್ರಯಸ್ತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ದಙ್ಕಾರ ಪುಷ್ಟಿವೃದ್ಧಿಕರ ಪ್ರಿಯದರ್ಶನ ಚತುಸ್ತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಧಙ್ಕಾರ ವಿಷಜ್ವರನಿಘ್ನ ವಿಪುಲ ಪಞ್ಚತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ನಙ್ಕಾರ ಭುಕ್ತಿಮುಕ್ತಿಪ್ರದ ಶಾನ್ತ ಷಟ್ತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಪಙ್ಕಾರ ವಿಷವಿಘ್ನನಾಶನ ಭವ್ಯ ಸಪ್ತತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಫಙ್ಕಾರಾಣಿಮಾದಿಸಿದ್ಧಿಪ್ರದ ಜ್ಯೋತೀರೂಪಾಷ್ಟತ್ರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಬಙ್ಕಾರ ಸರ್ವದೋಷಹರ ಶೋಭನೈಕೋನಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಭಙ್ಕಾರ ಭೂತಪ್ರಶಾನ್ತಿಕರ ಭಯಾನಕ ಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಮಙ್ಕಾರ ವಿದ್ವೇಷಿಮೋಹನಕರೈಕಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಯಙ್ಕಾರ ಸರ್ವವ್ಯಾಪಕ ಪಾವನ ದ್ವಿಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ರಙ್ಕಾರ ದಾಹಕರ ವಿಕೃತ ತ್ರಿಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಲಙ್ಕಾರ ವಿಶ್ವಂಭರ ಭಾಸುರ ಚತುಶ್ಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ವಙ್ಕಾರ ಸರ್ವಾಪ್ಯಾಯನಕರ ನಿರ್ಮಲ ಪಞ್ಚಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಶಙ್ಕಾರ ಸರ್ವಫಲಪ್ರದ ಪವಿತ್ರ ಷಟ್ಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಷಙ್ಕಾರ ಧರ್ಮಾರ್ಥಕಾಮದ ಧವಲ ಸಪ್ತಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಸಙ್ಕಾರ ಸರ್ವಕಾರಣ ಸಾರ್ವವರ್ಣಿಕಾಷ್ಟಚತ್ವಾರಿಂಶೇಽಕ್ಷೇ ಪ್ರತಿತಿಷ್ಠ .
ಓಂ ಹಙ್ಕಾರ ಸರ್ವವಾಙ್ಮಯ ನಿರ್ಮಲೈಕೋನಪಞ್ಚಾಶದಕ್ಷೇ ಪ್ರತಿತಿಷ್ಠ .
ಓಂ ಳಙ್ಕಾರ ಸರ್ವಶಕ್ತಿಪ್ರದ ಪ್ರಧಾನ ಪಞ್ಚಾಶದಕ್ಷೇ ಪ್ರತಿತಿಷ್ಠ .
ಓಂ ಕ್ಷಙ್ಕಾರ ಪರಾಪರತತ್ತ್ವಜ್ಞಾಪಕ ಪರಂಜ್ಯೋತೀರೂಪ ಶಿಖಾಮಣೌ ಪ್ರತಿತಿಷ್ಠ .
ಅಥೋವಾಚ ಯೇ ದೇವಾಃ ಪೃಥಿವೀಪದಸ್ತೇಭ್ಯೋ ನಮೋ ಭಗವನ್ತೋಽನುಮದನ್ತು ಶೋಭಾಯೈ ಪಿತರೋಽನುಮದನ್ತು ಶೋಭಾಯೈ ಜ್ಞಾನಮಯೀಮಕ್ಷಮಾಲಿಕಾಮ್ .
ಅಥೋವಾಚ ಯೇ ದೇವಾ ಅನ್ತರಿಕ್ಷಸದಸ್ತೇಭ್ಯಃ
ಓಂ ನಮೋ ಭಗವನ್ತೋಽನುಮದನ್ತು ಶೋಭಾಯೈ ಪಿತರೋಽನುಮದನ್ತು ಶೋಭಾಯೈಜ್ಞಾನಮಯೀಮಕ್ಷಮಾಲಿಕಾಮ್ .
ಅಥೋವಾಚ ಯೇ ದೇವಾ ದಿವಿಷದಸ್ತೇಭ್ಯೋ ನಮೋ ಭಗವನ್ತೋಽನುಮದನ್ತು ಶೋಭಾಯೈ ಪಿತರೋಽನುಮದನ್ತು ಶೋಭಾಯೈ ಜ್ಞಾನಮಯೀಮಕ್ಷಮಾಲಿಕಾಮ್ .
ಅಥೋವಾಚ ಯೇ ಮನ್ತ್ರಾ ಯಾ ವಿದ್ಯಾಸ್ತೇಭ್ಯೋ ನಮಸ್ತಾಭ್ಯಶ್ಚೋನ್ನಮಸ್ತಚ್ಛಕ್ತಿರಸ್ಯಾಃ ಪ್ರತಿಷ್ಠಾಪಯತಿ .
ಅಥೋವಾಚ ಯೇ ಬ್ರಹ್ಮವಿಷ್ಣುರುದ್ರಾಸ್ತೇಭ್ಯಃ ಸಗುಣೇಭ್ಯ ಓಂ ನಮಸ್ತದ್ವೀರ್ಯಮಸ್ಯಾಃ ಪ್ರತಿಷ್ಠಾಪಯತಿ .
ಅಥೋವಾಚ ಯೇ ಸಾಙ್ಖ್ಯಾದಿತತ್ತ್ವಭೇದಾಸ್ತೇಭ್ಯೋ ನಮೋ ವರ್ತಧ್ವಂ ವಿರೋಧೇಽನುವರ್ತಧ್ವಮ್ .
ಅಥೋವಾಚ ಯೇ ಶೈವಾ ವೈಷ್ಣವಾಃ ಶಾಕ್ತಾಃ ಶತಸಹಸ್ರಶಸ್ತೇಭ್ಯೋ ನಮೋನಮೋ ಭಗವನ್ತೋಽನುಮದನ್ತ್ವನುಗೃಹ್ಣನ್ತು .
ಅಥೋವಾಚ ಯಾಶ್ಚ ಮೃತ್ಯೋಃ ಪ್ರಾಣವತ್ಯಸ್ತಾಭ್ಯೋ ನಮೋನಮಸ್ತೇನೈತಂ ಮೃಡಯತ ಮೃಡಯತ .
ಪುನರೇತಸ್ಯಾಂ ಸರ್ವಾತ್ಮಕತ್ವಂ ಭಾವಯಿತ್ವಾ ಭಾವೇನ ಪೂರ್ವಮಾಲಿಕಾಮುತ್ಪಾದ್ಯಾರಭ್ಯ ತನ್ಮಯೀಂ ಮಹೋಪಹಾರೈರುಪಹೃತ್ಯ ಆದಿಕ್ಷಾನ್ತೈರಕ್ಷರೈರಕ್ಷಮಾಲಾಮಷ್ಟೋತ್ತರಶತಂ ಸ್ಪೃಶೇತ್ .
ಅಥ ಪುನರುತ್ಥಾಪ್ಯ ಪ್ರದಕ್ಷಿಣೀಕೃತ್ಯೋಂ ನಮಸ್ತೇ ಭಗವತಿ ಮನ್ತ್ರಮಾತೃಕೇಽಕ್ಷಮಾಲೇ ಸರ್ವವಶಙ್ಕರ್ಯೋಂನಮಸ್ತೇ ಭಗವತಿ ಮನ್ತ್ರಮಾತೃಕೇಽಕ್ಷಮಾಲಿಕೇ ಶೇಷಸ್ತಮ್ಭಿನ್ಯೋಂ ನಮಸ್ತೇ ಭಗವತಿ ಮನ್ತ್ರಮಾತೃಕೇಽಕ್ಷಮಾಲೇ ಉಚ್ಚಾಟನ್ಯೋಂನಮಸ್ತೇ ಭಗವತಿ ಮನ್ತ್ರಮಾತೃಕೇಽಕ್ಷಮಾಲೇ ವಿಶ್ವಾಮೃತ್ಯೋ ಮೃತ್ಯುಞ್ಜಯಸ್ವರೂಪಿಣಿ ಸಕಲಲೋಕೋದ್ದೀಪಿನಿ ಸಕಲಲೋಕರಕ್ಷಾಧಿಕೇ ಸಕಲಲೋಕೋಜ್ಜೀವಿಕೇ ಸಕಲಲೋಕೋತ್ಪಾದಿಕೇ ದಿವಾಪ್ರವರ್ತಿಕೇ ರಾತ್ರಿಪ್ರವರ್ತಿಕೇ ನದ್ಯನ್ತರಂ ಯಾಸಿ ದೇಶಾನ್ತರಂ ಯಾಸಿ ದ್ವೀಪಾನ್ತರಂ ಯಾಸಿ ಲೋಕಾನ್ತರಂ ಯಾಸಿ ಸರ್ವದಾ ಸ್ಫುರಸಿ ಸರ್ವಹೃದಿ ವಾಸಸಿ . ನಮಸ್ತೇ ಪರಾರೂಪೇ ನಮಸ್ತೇ ಪಶ್ಯನ್ತೀರೂಪೇ ನಮಸ್ತೇ ಮಧ್ಯಮಾರೂಪೇ ನಮಸ್ತೇ ವೈಖರೀರೂಪೇ ಸರ್ವತತ್ತ್ವಾತ್ಮಿಕೇ ಸರ್ವವಿದ್ಯಾತ್ಮಿಕೇ ಸರ್ವಶಕ್ತ್ಯಾತ್ಮಿಕೇ ಸರ್ವದೇವಾತ್ಮಿಕೇ ವಸಿಷ್ಠೇನ ಮುನಿನಾರಾಧಿತೇ ವಿಶ್ವಾಮಿತ್ರೇಣ ಮುನಿನೋಪಜೀವ್ಯಮಾನೇ ನಮಸ್ತೇ ನಮಸ್ತೇ .
ಪ್ರಾತರಧೀಯಾನೋ ರಾತ್ರಿಕೃತಂ ಪಾಪಂ ನಾಶಯತಿ .
ಸಾಯಮಧೀಯಾನೋ ದಿವಸಕೃತಂ ಪಾಪಂ ನಾಶಯತಿ .
ತತ್ಸಾಯಂಪ್ರಾತಃ ಪ್ರಯುಞ್ಜಾನಃ ಪಾಪೋಽಪಾಪೋಭವತಿ .
ಏವಮಕ್ಷಮಾಲಿಕಯಾ ಜಪ್ತೋ ಮನ್ತ್ರಃ ಸದ್ಯಃ ಸಿದ್ಧಿಕರೋ
ಭವತೀತ್ಯಾಹ ಭಗವಾನ್ಗುಹಃ ಪ್ರಜಾಪತಿಮಿತ್ಯುಪನಿಷತ್ ..

ಓಂ ವಾಙ್ ಮೇ ಮನಸಿ ಪ್ರತಿಷ್ಠಿತಾ ಮನೋ ಮೇ ವಾಚಿ ಪ್ರತಿಷ್ಠಿತಮಾವಿರಾವೀರ್ಮ ಏಧಿ ..

ವೇದಸ್ಯ ಮ ಆಣೀಸ್ಥಃ ಶ್ರುತಂ ಮೇ ಮಾ ಪ್ರಹಾಸೀರನೇನಾಧೀತೇನಾಹೋರಾತ್ರಾನ್ಸನ್ದಧಾಮ್ಯೃತಂ ವದಿಷ್ಯಾಮಿ ಸತ್ಯಂ ವದಿಷ್ಯಾಮಿ .
ತನ್ಮಾಮವತು ತದ್ವಕ್ತಾರಮವತು ಅವತು ಮಾಮವತು ವಕ್ತಾರಮವತು ವಕ್ತಾರಮ್ ..

ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ..

ಹರಿಃ ಓಂ ತತ್ಸತ್ ..

.. ಇತ್ಯಕ್ಷಮಾಲಿಕೋಪನಿಷತ್ಸಮಾಪ್ತಾ ..