శ్రీవరమహాగణపతిమన్త్రాక్షరావలిస్తోత్రమ్

తేజోవర్ధనస్తోత్రమ్
అథవా
వరమహాగణపతి మన్త్రాక్షరావలిస్తోత్రమ్

వినా తపో వినా ధ్యానం వినా హోమం వినా జపమ్ .
అనాయాసేన విఘ్నేశప్రీణనం వద మే ప్రభో .. 1..

ఈశ్వర ఉవాచ .
మన్త్రాక్షరావలిస్తోత్రం సర్వసౌభాగ్యవర్ధనమ్ .
దుర్లభం దుష్టమనసాం సులభం శుద్ధచేతసామ్ .. 2..

మహాగణపతిప్రీతిప్రతిపాదకమఞ్జసా .
కథయామి ఘనశ్రోణి కర్ణాభ్యామవతంసయ .. 3..

ఓఙ్కారవలయాకారముఞ్చత్కల్లోలమాలినమ్ .
ఐక్షవం చేతసా వీక్షే సిన్ధుసన్ధుక్షితస్వనమ్ .. 4..

శ్రీమతశ్చాస్య జలధేరన్తరభ్యుదితం నుమః .
మణిద్వీపం మదాకల్పమహాకల్పం మహోదయమ్ .. 5..

హ్రీతిమాదధతా ధామ్నా ధామ్నామీశకిశోరకే .
కల్పోద్యానస్థితం వన్దే భాస్వన్తం మణిమణ్డపమ్ .. 6..

క్లీబస్యాపి స్మరోన్మాదకారిశృఙ్గారశాలినః .
తన్మధ్యే గణనాథస్య మణిసింహాసనం భజే .. 7..

గ్లౌం కలాభిరివాఞ్ఛామిస్తీవ్రాదినవశక్తిభిః .
సుష్టం లిపిమయం పద్మం ధర్మాద్యాశ్రయమాశ్రయే .. 8..

గమ్భీరమివ తత్రాబ్ధిం వసన్తం త్ర్యస్రమణ్డలే .
ఉత్సఙ్గతలలక్ష్మీకముద్యతిగ్మాంశుపాటలమ్ .. 9..

గదేక్షుకాముకరుజా చక్రామ్బుజగుణోత్పలే .
వ్రీహ్మగ్రనిజదన్తాగ్రం భూషితం మాతులిఙ్గకైః .. 10..

ణషష్ఠవర్ణవాచ్యస్య దారిద్ర్యస్య విభఞ్జనైః .
ఏతైరేకాదశకరానలం కుర్వాణమున్మదమ్ .. 11..

పరానన్దమయం భక్తప్రత్యూహవ్యూహనాశనమ్ .
పరమార్థప్రబోధాబ్ధిం పశ్యామి గణనాయకమ్ .. 12..

తత్పురః ప్రస్ఫురద్బిల్వమూలపీఠసమాశ్రయౌ .
రమారమేశౌ విమృశామ్యేవశుభదాయకౌ .. 13..

యేన దక్షిణభాగస్థన్యగ్రోధతలమాస్థితమ్ .
సకలం సాయుధం వన్దే తం సామ్బం పరమేశ్వరమ్ .. 14..

వరసమ్భోగరసికౌ పశ్చిమే పిప్పలాశ్రయౌ .
రమణీయతరౌ వన్దే రతిపుష్పశిలీముఖౌ . 15..

రమమాణౌ గణేశానోత్తరదిక్ఫలినీతలే .
భూభూధరామ్బుదారాభౌ భజే భువనపాలకౌ .. 16..

వనమాలావపుర్జ్యోతికడారితకకుప్తటాః .

రదకాణ్డరుచిజ్యోత్స్నాకాశగణ్డస్రవన్మదమ్ .
ఋధ్యాశ్లేషకృతామోదమామోదం దేవమాశ్రయే .. 18..

దలత్కపోలవిగలం మదధారాబలాహకమ్ .
సమృద్ధితఙిదాశ్లిష్టం ప్రమోదం హృది భావయే .. 19..

సకాన్తికాన్తితిలకాపరిరబ్ధతనుం భజే .
భుజప్రకాణ్డసచ్ఛాయం సుముఖం కల్పపాదపమ్ .. 20..

వన్దే తున్దిలమిన్ధానం చన్ద్రకన్దలశీతలమ్ .
దుర్ముఖం మదనావత్యా నిర్మితాలిఙ్గినం పురా .. 21..

జమ్భవైరికృతాభ్యర్చ్యౌ జగదభ్యుదయప్రభౌ .
అహం మదద్రవావిఘ్నౌ హతయే ఏనసాం శ్రయే .. 22..

నమః శృఙ్గారరుచిరౌ నమత్సర్వసురాసురౌ .
ద్రావిణీవిఘ్నకర్తారౌ ద్రావయేతాం దరిద్రతామ్ .. 23..

మేదురం మౌక్తికాసారం వర్షన్తౌ భక్తిశాలినామ్ .
వసుధారాశఙ్ఖనిధివాక్యపుష్పాఞ్జలినా స్తుమః .. 24..

వర్షన్తౌ రత్నవర్షేణ బలద్వాలాతపస్విపౌ .
వరదానుమతౌ వన్దే వసుధాపద్మశేవధీ .. 25..

శమతాధిమహావ్యాధిసాన్ద్రానన్దకరమ్బితాః .
బ్రాహ్మమ్యాదీః కలయే శక్తీః శక్తీనామభివృద్ధయే .. 26..

మామవన్తు మహేన్ద్రాద్యాః దిక్పాలాః దర్పశాలినః .
తం నుమః శ్రీగణాధీశం సవాహాయుధశక్తికమ్ .. 27..

నవీనపల్లచ్ఛాయాదాయాదవపురుజ్వలమ్
మదస్య కటనిష్యన్దస్రోత స్విత్కటకోదరమ్ .. 28..

యజమానతనుం యాగరూపిణం యజ్ఞపురుషమ్ .
యమం యమవతామర్చ్య యత్నభాజామదుర్లభమ్ .. 29..

స్వారస్యం పరమానన్దస్వరూపం స్వయముద్గతమ్ .
స్వయం హవ్యం స్వయం వైధం స్వయం కృత్యం త్రయీకరమ్ .. 30..

హారకేయూరముకుటకిఙ్కిణీగదకుణ్డలైః .
అలఙ్కృతం చ విఘ్నానాం హర్తారం దేవమాశ్రయే .. 31..

మన్త్రాక్షరావలిస్తోత్రం కథితం తవ సున్దరి .
సమస్తమీప్సితం తేన సమ్పాదయ శివే శివమ్ .. 32..

ఇతి తేజోవర్ధనస్తోత్రమ్ అథవా మన్త్రాక్షరావలిస్తోత్రం సమ్పూర్ణమ్ ..

ఓం శ్రీం హ్రీం క్లీం గ్లౌం గం గణపతయే వరవరద
సర్వజనం మే వశమానయ స్వాహా .

శ్రీవరమహాగణపతిమన్త్రాక్షరావలిస్తోత్రమ్ గణపతిమన్త్రాక్షరావలిః