ಶ್ರೀವರಮಹಾಗಣಪತಿಮನ್ತ್ರಾಕ್ಷರಾವಲಿಸ್ತೋತ್ರಮ್

ತೇಜೋವರ್ಧನಸ್ತೋತ್ರಮ್
ಅಥವಾ
ವರಮಹಾಗಣಪತಿ ಮನ್ತ್ರಾಕ್ಷರಾವಲಿಸ್ತೋತ್ರಮ್

ವಿನಾ ತಪೋ ವಿನಾ ಧ್ಯಾನಂ ವಿನಾ ಹೋಮಂ ವಿನಾ ಜಪಮ್ .
ಅನಾಯಾಸೇನ ವಿಘ್ನೇಶಪ್ರೀಣನಂ ವದ ಮೇ ಪ್ರಭೋ .. ೧..

ಈಶ್ವರ ಉವಾಚ .
ಮನ್ತ್ರಾಕ್ಷರಾವಲಿಸ್ತೋತ್ರಂ ಸರ್ವಸೌಭಾಗ್ಯವರ್ಧನಮ್ .
ದುರ್ಲಭಂ ದುಷ್ಟಮನಸಾಂ ಸುಲಭಂ ಶುದ್ಧಚೇತಸಾಮ್ .. ೨..

ಮಹಾಗಣಪತಿಪ್ರೀತಿಪ್ರತಿಪಾದಕಮಞ್ಜಸಾ .
ಕಥಯಾಮಿ ಘನಶ್ರೋಣಿ ಕರ್ಣಾಭ್ಯಾಮವತಂಸಯ .. ೩..

ಓಙ್ಕಾರವಲಯಾಕಾರಮುಞ್ಚತ್ಕಲ್ಲೋಲಮಾಲಿನಮ್ .
ಐಕ್ಷವಂ ಚೇತಸಾ ವೀಕ್ಷೇ ಸಿನ್ಧುಸನ್ಧುಕ್ಷಿತಸ್ವನಮ್ .. ೪..

ಶ್ರೀಮತಶ್ಚಾಸ್ಯ ಜಲಧೇರನ್ತರಭ್ಯುದಿತಂ ನುಮಃ .
ಮಣಿದ್ವೀಪಂ ಮದಾಕಲ್ಪಮಹಾಕಲ್ಪಂ ಮಹೋದಯಮ್ .. ೫..

ಹ್ರೀತಿಮಾದಧತಾ ಧಾಮ್ನಾ ಧಾಮ್ನಾಮೀಶಕಿಶೋರಕೇ .
ಕಲ್ಪೋದ್ಯಾನಸ್ಥಿತಂ ವನ್ದೇ ಭಾಸ್ವನ್ತಂ ಮಣಿಮಣ್ಡಪಮ್ .. ೬..

ಕ್ಲೀಬಸ್ಯಾಪಿ ಸ್ಮರೋನ್ಮಾದಕಾರಿಶೃಙ್ಗಾರಶಾಲಿನಃ .
ತನ್ಮಧ್ಯೇ ಗಣನಾಥಸ್ಯ ಮಣಿಸಿಂಹಾಸನಂ ಭಜೇ .. ೭..

ಗ್ಲೌಂ ಕಲಾಭಿರಿವಾಞ್ಛಾಮಿಸ್ತೀವ್ರಾದಿನವಶಕ್ತಿಭಿಃ .
ಸುಷ್ಟಂ ಲಿಪಿಮಯಂ ಪದ್ಮಂ ಧರ್ಮಾದ್ಯಾಶ್ರಯಮಾಶ್ರಯೇ .. ೮..

ಗಮ್ಭೀರಮಿವ ತತ್ರಾಬ್ಧಿಂ ವಸನ್ತಂ ತ್ರ್ಯಸ್ರಮಣ್ಡಲೇ .
ಉತ್ಸಙ್ಗತಲಲಕ್ಷ್ಮೀಕಮುದ್ಯತಿಗ್ಮಾಂಶುಪಾಟಲಮ್ .. ೯..

ಗದೇಕ್ಷುಕಾಮುಕರುಜಾ ಚಕ್ರಾಮ್ಬುಜಗುಣೋತ್ಪಲೇ .
ವ್ರೀಹ್ಮಗ್ರನಿಜದನ್ತಾಗ್ರಂ ಭೂಷಿತಂ ಮಾತುಲಿಙ್ಗಕೈಃ .. ೧೦..

ಣಷಷ್ಠವರ್ಣವಾಚ್ಯಸ್ಯ ದಾರಿದ್ರ್ಯಸ್ಯ ವಿಭಞ್ಜನೈಃ .
ಏತೈರೇಕಾದಶಕರಾನಲಂ ಕುರ್ವಾಣಮುನ್ಮದಮ್ .. ೧೧..

ಪರಾನನ್ದಮಯಂ ಭಕ್ತಪ್ರತ್ಯೂಹವ್ಯೂಹನಾಶನಮ್ .
ಪರಮಾರ್ಥಪ್ರಬೋಧಾಬ್ಧಿಂ ಪಶ್ಯಾಮಿ ಗಣನಾಯಕಮ್ .. ೧೨..

ತತ್ಪುರಃ ಪ್ರಸ್ಫುರದ್ಬಿಲ್ವಮೂಲಪೀಠಸಮಾಶ್ರಯೌ .
ರಮಾರಮೇಶೌ ವಿಮೃಶಾಮ್ಯೇವಶುಭದಾಯಕೌ .. ೧೩..

ಯೇನ ದಕ್ಷಿಣಭಾಗಸ್ಥನ್ಯಗ್ರೋಧತಲಮಾಸ್ಥಿತಮ್ .
ಸಕಲಂ ಸಾಯುಧಂ ವನ್ದೇ ತಂ ಸಾಮ್ಬಂ ಪರಮೇಶ್ವರಮ್ .. ೧೪..

ವರಸಮ್ಭೋಗರಸಿಕೌ ಪಶ್ಚಿಮೇ ಪಿಪ್ಪಲಾಶ್ರಯೌ .
ರಮಣೀಯತರೌ ವನ್ದೇ ರತಿಪುಷ್ಪಶಿಲೀಮುಖೌ . ೧೫..

ರಮಮಾಣೌ ಗಣೇಶಾನೋತ್ತರದಿಕ್ಫಲಿನೀತಲೇ .
ಭೂಭೂಧರಾಮ್ಬುದಾರಾಭೌ ಭಜೇ ಭುವನಪಾಲಕೌ .. ೧೬..

ವನಮಾಲಾವಪುರ್ಜ್ಯೋತಿಕಡಾರಿತಕಕುಪ್ತಟಾಃ .

ರದಕಾಣ್ಡರುಚಿಜ್ಯೋತ್ಸ್ನಾಕಾಶಗಣ್ಡಸ್ರವನ್ಮದಮ್ .
ಋಧ್ಯಾಶ್ಲೇಷಕೃತಾಮೋದಮಾಮೋದಂ ದೇವಮಾಶ್ರಯೇ .. ೧೮..

ದಲತ್ಕಪೋಲವಿಗಲಂ ಮದಧಾರಾಬಲಾಹಕಮ್ .
ಸಮೃದ್ಧಿತಙಿದಾಶ್ಲಿಷ್ಟಂ ಪ್ರಮೋದಂ ಹೃದಿ ಭಾವಯೇ .. ೧೯..

ಸಕಾನ್ತಿಕಾನ್ತಿತಿಲಕಾಪರಿರಬ್ಧತನುಂ ಭಜೇ .
ಭುಜಪ್ರಕಾಣ್ಡಸಚ್ಛಾಯಂ ಸುಮುಖಂ ಕಲ್ಪಪಾದಪಮ್ .. ೨೦..

ವನ್ದೇ ತುನ್ದಿಲಮಿನ್ಧಾನಂ ಚನ್ದ್ರಕನ್ದಲಶೀತಲಮ್ .
ದುರ್ಮುಖಂ ಮದನಾವತ್ಯಾ ನಿರ್ಮಿತಾಲಿಙ್ಗಿನಂ ಪುರಾ .. ೨೧..

ಜಮ್ಭವೈರಿಕೃತಾಭ್ಯರ್ಚ್ಯೌ ಜಗದಭ್ಯುದಯಪ್ರಭೌ .
ಅಹಂ ಮದದ್ರವಾವಿಘ್ನೌ ಹತಯೇ ಏನಸಾಂ ಶ್ರಯೇ .. ೨೨..

ನಮಃ ಶೃಙ್ಗಾರರುಚಿರೌ ನಮತ್ಸರ್ವಸುರಾಸುರೌ .
ದ್ರಾವಿಣೀವಿಘ್ನಕರ್ತಾರೌ ದ್ರಾವಯೇತಾಂ ದರಿದ್ರತಾಮ್ .. ೨೩..

ಮೇದುರಂ ಮೌಕ್ತಿಕಾಸಾರಂ ವರ್ಷನ್ತೌ ಭಕ್ತಿಶಾಲಿನಾಮ್ .
ವಸುಧಾರಾಶಙ್ಖನಿಧಿವಾಕ್ಯಪುಷ್ಪಾಞ್ಜಲಿನಾ ಸ್ತುಮಃ .. ೨೪..

ವರ್ಷನ್ತೌ ರತ್ನವರ್ಷೇಣ ಬಲದ್ವಾಲಾತಪಸ್ವಿಪೌ .
ವರದಾನುಮತೌ ವನ್ದೇ ವಸುಧಾಪದ್ಮಶೇವಧೀ .. ೨೫..

ಶಮತಾಧಿಮಹಾವ್ಯಾಧಿಸಾನ್ದ್ರಾನನ್ದಕರಮ್ಬಿತಾಃ .
ಬ್ರಾಹ್ಮಮ್ಯಾದೀಃ ಕಲಯೇ ಶಕ್ತೀಃ ಶಕ್ತೀನಾಮಭಿವೃದ್ಧಯೇ .. ೨೬..

ಮಾಮವನ್ತು ಮಹೇನ್ದ್ರಾದ್ಯಾಃ ದಿಕ್ಪಾಲಾಃ ದರ್ಪಶಾಲಿನಃ .
ತಂ ನುಮಃ ಶ್ರೀಗಣಾಧೀಶಂ ಸವಾಹಾಯುಧಶಕ್ತಿಕಮ್ .. ೨೭..

ನವೀನಪಲ್ಲಚ್ಛಾಯಾದಾಯಾದವಪುರುಜ್ವಲಮ್
ಮದಸ್ಯ ಕಟನಿಷ್ಯನ್ದಸ್ರೋತ ಸ್ವಿತ್ಕಟಕೋದರಮ್ .. ೨೮..

ಯಜಮಾನತನುಂ ಯಾಗರೂಪಿಣಂ ಯಜ್ಞಪುರುಷಮ್ .
ಯಮಂ ಯಮವತಾಮರ್ಚ್ಯ ಯತ್ನಭಾಜಾಮದುರ್ಲಭಮ್ .. ೨೯..

ಸ್ವಾರಸ್ಯಂ ಪರಮಾನನ್ದಸ್ವರೂಪಂ ಸ್ವಯಮುದ್ಗತಮ್ .
ಸ್ವಯಂ ಹವ್ಯಂ ಸ್ವಯಂ ವೈಧಂ ಸ್ವಯಂ ಕೃತ್ಯಂ ತ್ರಯೀಕರಮ್ .. ೩೦..

ಹಾರಕೇಯೂರಮುಕುಟಕಿಙ್ಕಿಣೀಗದಕುಣ್ಡಲೈಃ .
ಅಲಙ್ಕೃತಂ ಚ ವಿಘ್ನಾನಾಂ ಹರ್ತಾರಂ ದೇವಮಾಶ್ರಯೇ .. ೩೧..

ಮನ್ತ್ರಾಕ್ಷರಾವಲಿಸ್ತೋತ್ರಂ ಕಥಿತಂ ತವ ಸುನ್ದರಿ .
ಸಮಸ್ತಮೀಪ್ಸಿತಂ ತೇನ ಸಮ್ಪಾದಯ ಶಿವೇ ಶಿವಮ್ .. ೩೨..

ಇತಿ ತೇಜೋವರ್ಧನಸ್ತೋತ್ರಮ್ ಅಥವಾ ಮನ್ತ್ರಾಕ್ಷರಾವಲಿಸ್ತೋತ್ರಂ ಸಮ್ಪೂರ್ಣಮ್ ..

ಓಂ ಶ್ರೀಂ ಹ್ರೀಂ ಕ್ಲೀಂ ಗ್ಲೌಂ ಗಂ ಗಣಪತಯೇ ವರವರದ
ಸರ್ವಜನಂ ಮೇ ವಶಮಾನಯ ಸ್ವಾಹಾ .

ಶ್ರೀವರಮಹಾಗಣಪತಿಮನ್ತ್ರಾಕ್ಷರಾವಲಿಸ್ತೋತ್ರಮ್ ಗಣಪತಿಮನ್ತ್ರಾಕ್ಷರಾವಲಿಃ