ಸನಾತನ ದೇವ
ಶ್ರೀಸುದರ್ಶನಸ್ತೋತ್ರಮ್
श्रीसुदर्शनस्तोत्रम्
.. ಶ್ರೀಸುದರ್ಶನಸ್ತೋತ್ರಮ್ ..
ಸುದರ್ಶನ ಮಹಾಜ್ವಾಲ ಪ್ರಸೀದ ಜಗದಃ ಪತೇ .
ತೇಜೋರಾಶೇ ಪ್ರಸೀದ ತ್ವಂ ಕೋಟಿಸೂರ್ಯಮಿತಪ್ರಭ .. ೧..
ಅಜ್ಞಾನತಿಮಿರಧ್ವಂಸಿನ್ ಪ್ರಸೀದ ಪರಮಾದ್ಭುತ .
ಸುದರ್ಶನ ನಮಸ್ತೇಽಸ್ತು ದೇವಾನಾಂ ತ್ವಂ ಸುದರ್ಶನ .. ೨..
ಅಸುರಾಣಾಂ ಸುದುರ್ದರ್ಶ ಪಿಶಾಚಾನಾಂ ಭಯಙ್ಕರ .
ಭಞ್ಜಕಾಯ ನಮಸ್ತೇಽಸ್ತು ಸರ್ವೇಷಾಮಪಿ ತೇಜಸಾಮ್ .. ೩..
ಶಾನ್ತಾನಾಮಪಿ ಶಾನ್ತಾಯ ಘೋರಾಯ ಚ ದುರಾತ್ಮನಾಮ್ .
ಚಕ್ರಾಯ ಚಕ್ರರೂಪಾಯ ಪರಚಕ್ರಾಯ ಮಾಯಿನೇ .. ೪..
ಹತಯೇ ಹೇತಿರೂಪಾಯ ಹೇತೀನಾಂ ಪತಯೇ ನಮಃ .
ಕಾಲಾಯ ಕಾಲರೂಪಾಯ ಕಾಲಚಕ್ರಾಯ ತೇ ನಮಃ .. ೫..
ಉಗ್ರಾಯ ಚೋಗ್ರರೂಪಾಯ ಕ್ರುದ್ಧೋಲ್ಕಾಯ ನಮೋ ನಮಃ .
ಸಹಸ್ರಾರಾಯ ಶೂರಾಯ ಸಹಸ್ರಾಕ್ಷಾಯ ತೇ ನಮಃ .. ೬..
ಸಹಸ್ರಾಕ್ಷಾದಿ ಪೂಜ್ಯಾಯ ಸಹಸ್ರಾರಶಿರಸೇ ನಮಃ .
ಜ್ಯೋತಿರ್ಮಣ್ಡಲರೂಪಾಯ ಜಗತ್ತ್ರಿತಯ ಧಾರಿಣೇ .. ೭..
ತ್ರಿನೇತ್ರಾಯ ತ್ರಯೀ ಧಾಮ್ನೇ ನಮಸ್ತೇಽಸ್ತು ತ್ರಿರೂಪಿಣೇ .
ತ್ವಂ ಯಜ್ಞಸ್ತ್ವಂ ವಷಟ್ಕಾರಃ ತ್ವಂ ಬ್ರಹ್ಮಾ ತ್ವಂ ಪ್ರಜಾಪತಿಃ .. ೮..
ತ್ವಮೇವ ವಹ್ನಿಸ್ತವಂ ಸೂರ್ಯಃ ತ್ವಂ ವಾಯುಸ್ತ್ವಂ ವಿಶಾಮ್ಪತಿಃ .
ಆದಿಮಧ್ಯಾನ್ತ ಶೂನ್ಯಾಯ ನಾಭಿಚಕ್ರಾಯ ತೇ ನಮಃ .. ೯..
ಜ್ಞಾನವಿಜ್ಞಾನರೂಪಾಯ ಧ್ಯಾನ ಧ್ಯೇಯಸ್ವರೂಪಿಣೇ .
ಚಿದಾನನ್ದಸ್ವರೂಪಾಯ ಪ್ರಕೃತೇಃ ಪೃಥಗಾತ್ಮನೇ .. ೧೦..
ಚರಾಚರಾಣಾಂ ಭೂತಾನಾಂ ಸೃಷ್ಟಿಸ್ಥಿತ್ಯನ್ತಕಾರಿಣೇ .
ಸರ್ವೇಷಾಮಪಿ ಭೂತಾನಾಂ ತ್ವಮೇವ ಪರಮಾಗತಿಃ .. ೧೧..
ತ್ವಯೈವ ಸರ್ವಂ ಸರ್ವೇಶ ಭಾಸತೇ ಸಕಲಂ ಜಗತ್ .
ತ್ವದೀಯೇನ ಪ್ರಸಾದೇನ ಭಾಸ್ಕರೋಽಸ್ಮಿ ಸುದರ್ಶನ .. ೧೨..
ತ್ವತ್ತೇಜಸಾಂ ಪ್ರಭಾವೇನ ಮಮತೇಜೋ ಹತಂ ಪ್ರಭೋ .
ಭೂಯಸ್ಸಂಹರ ತೇಜಸ್ತ್ವಂ ಅವಿಷಹ್ಯಂ ಸುರಾಸುರೈಃ .. ೧೩..
ತ್ವತ್ಪ್ರಸಾದಾದಹಂ ಭೂಯಃ ಭವಿಷ್ಯಾಮಿ ಪ್ರಭಾನ್ವಿತಃ .
ಕ್ಷಮಸ್ವ ತೇ ನಮಸ್ತೇಽಸ್ತು ಅಪರಾಧಂ ಕೃತಂ ಮಯಾ .
ಭಕ್ತವತ್ಸಲ ಸರ್ವೇಶ ಪ್ರಣಮಾಮಿ ಪುನಃ ಪುನಃ .. ೧೪..
ಇತಿ ಸ್ತುತೋ ಭಾನುಮತಾ ಸುದರ್ಶನಃ ಹತಪ್ರಭೇಣಾದ್ಭುತ ಧಾಮ ವೈಭವಃ .
ಶಶಾಮ ಧಾಮ್ನಾತಿಶಯೇನ ಧಾಮ್ನಾಂ ಸಹಸ್ರಭಾನೌ ಕೃಪಯಾ ಪ್ರಸನ್ನಃ .. ೧೫..
.. ಇತಿ ಶ್ರೀಕುಮ್ಭಕೋಣಮಾಹಾತ್ಮ್ಯೇ ಶ್ರೀಸೂರ್ಯಕೃತ ಶ್ರೀಸುದರ್ಶನಸ್ತೋತ್ರಮ್ ಸಮ್ಪೂರ್ಣಮ್ ..