.. శారదాభుజఙ్గప్రయాతాష్టకమ్ ..

.. శారదాభుజఙ్గప్రయాతాష్టకమ్ ..

సువక్షోజకుమ్భాం సుధాపూర్ణకుమ్భామ్
ప్రసాదావలమ్బాం ప్రపుణ్యావలమ్బామ్.
సదాస్యేన్దుబిమ్బాం సదానోష్ఠబిమ్బామ్
భజే శారదామ్బామజస్రం మదమ్బామ్..1..

కటాక్షే దయార్ద్రో కరే జ్ఞానముద్రామ్
కలాభిర్వినిద్రాం కలాపైః సుభద్రామ్.
పురస్త్రీం వినిద్రాం పురస్తుఙ్గభద్రామ్
భజే శారదామ్బామజస్రం మదమ్బామ్..2..

లలామాఙ్కఫాలాం లసద్గానలోలామ్
స్వభక్తైకపాలాం యశఃశ్రీకపోలామ్.
కరే త్వక్షమాలాం కనత్ప్రత్నలోలామ్
భజే శారదామ్బామజస్రం మదమ్బామ్..3..

సుసీమన్తవేణీం దృశా నిర్జితైణీమ్
రమత్కీరవాణీం నమద్వజ్రపాణీమ్.
సుధామన్థరాస్యాం ముదా చిన్త్యవేణీమ్
భజే శారదామ్బామజస్రం మదమ్బామ్..4..

సుశాన్తాం సుదేహాం దృగన్తే కచాన్తామ్
లసత్సల్లతాఙ్గీమనన్తామచిన్త్యామ్.
స్మరేత్తాపసైః సఙ్గపూర్వస్థితాం తామ్
భజే శారదామ్బామజస్రం మదమ్బామ్..5..

కురఙ్గే తురఙ్గే మృగేన్ద్రే ఖగేన్ద్రే
మరాలే మదేభే మహోక్షేఽధిరూఢామ్.
మహత్యాం నవమ్యాం సదా సామరూపామ్
భజే శారదామ్బామజస్రం మదమ్బామ్..6..

జ్వలత్కాన్తివహ్నిం జగన్మోహనాఙ్గీమ్
భజే మానసామ్భోజసుభ్రాన్తభృఙ్గీమ్.
నిజస్తోత్రసఙ్గీతనృత్యప్రభాఙ్గీమ్
భజే శారదామ్బామజస్రం మదమ్బామ్..7..

భవామ్భోజనేత్రాజసమ్పూజ్యమానామ్
లసన్మన్దహాసప్రభావక్త్రచిహ్నామ్.
చలచ్చఞ్చలాచారుతాటఙ్కకర్ణో -
భజే శారదామ్బామజస్రం మదమ్బామ్..8..