.. શારદાભુજઙ્ગપ્રયાતાષ્ટકમ્ ..

.. શારદાભુજઙ્ગપ્રયાતાષ્ટકમ્ ..

સુવક્ષોજકુમ્ભાં સુધાપૂર્ણકુમ્ભામ્
પ્રસાદાવલમ્બાં પ્રપુણ્યાવલમ્બામ્.
સદાસ્યેન્દુબિમ્બાં સદાનોષ્ઠબિમ્બામ્
ભજે શારદામ્બામજસ્રં મદમ્બામ્..૧..

કટાક્ષે દયાર્દ્રો કરે જ્ઞાનમુદ્રામ્
કલાભિર્વિનિદ્રાં કલાપૈઃ સુભદ્રામ્.
પુરસ્ત્રીં વિનિદ્રાં પુરસ્તુઙ્ગભદ્રામ્
ભજે શારદામ્બામજસ્રં મદમ્બામ્..૨..

લલામાઙ્કફાલાં લસદ્ગાનલોલામ્
સ્વભક્તૈકપાલાં યશઃશ્રીકપોલામ્.
કરે ત્વક્ષમાલાં કનત્પ્રત્નલોલામ્
ભજે શારદામ્બામજસ્રં મદમ્બામ્..૩..

સુસીમન્તવેણીં દૃશા નિર્જિતૈણીમ્
રમત્કીરવાણીં નમદ્વજ્રપાણીમ્.
સુધામન્થરાસ્યાં મુદા ચિન્ત્યવેણીમ્
ભજે શારદામ્બામજસ્રં મદમ્બામ્..૪..

સુશાન્તાં સુદેહાં દૃગન્તે કચાન્તામ્
લસત્સલ્લતાઙ્ગીમનન્તામચિન્ત્યામ્.
સ્મરેત્તાપસૈઃ સઙ્ગપૂર્વસ્થિતાં તામ્
ભજે શારદામ્બામજસ્રં મદમ્બામ્..૫..

કુરઙ્ગે તુરઙ્ગે મૃગેન્દ્રે ખગેન્દ્રે
મરાલે મદેભે મહોક્ષેઽધિરૂઢામ્.
મહત્યાં નવમ્યાં સદા સામરૂપામ્
ભજે શારદામ્બામજસ્રં મદમ્બામ્..૬..

જ્વલત્કાન્તિવહ્નિં જગન્મોહનાઙ્ગીમ્
ભજે માનસામ્ભોજસુભ્રાન્તભૃઙ્ગીમ્.
નિજસ્તોત્રસઙ્ગીતનૃત્યપ્રભાઙ્ગીમ્
ભજે શારદામ્બામજસ્રં મદમ્બામ્..૭..

ભવામ્ભોજનેત્રાજસમ્પૂજ્યમાનામ્
લસન્મન્દહાસપ્રભાવક્ત્રચિહ્નામ્.
ચલચ્ચઞ્ચલાચારુતાટઙ્કકર્ણો -
ભજે શારદામ્બામજસ્રં મદમ્બામ્..૮..