ನೀಲಕಣ್ಠಶಾಸ್ತ್ರಿಣಾ ವಿರಚಿತಂ ಗಣೇಶಪೂರ್ವಶತಕಮ್

ಶ್ರೀಗಣೇಶಪೂರ್ವಶತಕಮ್
ಸತ್ಯಜ್ಞಾನಾನನ್ದಂ ಗಜವದನಂ ನೌಮಿ ಸಿದ್ಧಿಬುದ್ಧೀಶಮ್ .
ಕುರ್ವೇ ಗಣೇಶಶತಕಂ ಕುಜುಕೇನಾಹಂ ಸ್ವಬುದ್ಧಿಶುದ್ಧಯರ್ಥಮ್ .. ೧..

ದಿಙ್ಮಾತ್ರೇಣ ಗಣಪತೇರ್ಗುಣಗಣವಿಭವಾದಿವರ್ಣನಾರೂಪಮ್ .
ಪ್ರಾಯೋ ವೈನಾಯಕಕೃತಿವಿದಿತಮತಪಕ್ರಿಯಾವಿವೃತಿಪೂರ್ವಮ್ .. ೨..

ಯದ್ಯಪಿ ಮನ್ದಮತಿರಹಂ ಗುಣಲವಮವಗನ್ತುಮತಿತರಾಂ ನಾಲಮ್ .
ಪ್ರಯತೇ ತಥಾಪಿ ವದಿತುಂ ಲಮ್ಬೋದರ ತೇ ದಯಾವಲಮ್ಬೇನ .. ೩..

ಜಗತಃ ಸರ್ಗಾದಾದ್ಯಾತ್ ಪ್ರಾಗಪ್ಯೇಕಸ್ತ್ವಮೇವ ಭಾಸಿ ವಿಭೋ .
ತಸ್ಮಾದ್ಗಣಪ ಭವನ್ತಂ ನಿಖಿಲನಿದಾನಂ ಗದನ್ತಿ ನಿಗಮಾನ್ತಾಃ .. ೪..

ತ್ವಮತೋ ಮಾಯಾತೀತಂ ಸಕಲಜಗತ್ಕಲ್ಪನಾದ್ಯಧಿಷ್ಠಾನಮ್ .
ಅದ್ವೈತಸೀಮಭೂತಂ ವಾಙ್ಮಾನಸಾಗೋಚರಂ ಪರಂ ಬ್ರಹ್ಮ .. ೫..

ಸಗುಣಬ್ರಹ್ಮಾತ್ಮಾನೋ ಗಣಪತಿಶಿವಶಕ್ತಿಕೇಶವಾರ್ಕಾ ಯೇ .
ತೇಷಾಂ ಕಾರಣಮಾಹುಃ ಶುದ್ಧಾದ್ವೈತಾನುಗಾ ಯಮಾತ್ಮಾನಮ್ .. ೬..

ಯಃ ಸರ್ವವೇದವೇದ್ಯಸ್ತತ್ತ್ವಮಸಿಪದಾದ್ಯತೀತರೂಪೋ ಯಃ .
ಯೋ ಯೋಗಿವೃನ್ದಮೃಗ್ಯಃ ಪರಮಾತ್ಮಾನಂ ತಮಾಶ್ರಯೇ ನಿತ್ಯಮ್ .. ೭..

ಯತ್ಪೂರ್ಣಯೋಗಲಭ್ಯಂ ಭೂಮಾತ್ಮಕಮಾಮನನ್ತಿ ಗಾಣಪತಾಃ .
ಶುದ್ಧಂ ಸ್ವಮಹಿಮಸಂಸ್ಥಂ ಬ್ರಹ್ಮಾಸ್ಮಿನ್ ಮೇ ಮನಃ ಸದಾ ಸ್ಮರತಾಮ್ .. ೮..

ಭೂಮಾ ಬ್ರಹ್ಮೈತತ್ ತೇ ಷಷ್ಠಂ ಗಣಪಂ ಚ ಪಞ್ಚಮಂ ಪ್ರಾಹುಃ .
ತುರ್ಯಂ ಗಣೇಶಮಸ್ಯ ಹಿ ಕಾರ್ಯಾನ್ ಸಗುಣಾತ್ಮನೋಽಪಿ ತಾನ್ ಪಞ್ಚ .. ೯..

ತತ್ರೋಪಾಸನಕಾಣ್ಡೇ ಪರಕಾಷ್ಠಾಭೂತಮಸಿಪದಾರ್ಥಮಯಮ್ .
ಸ್ವಾನನ್ದಂ ಬ್ರಹ್ಮೈತದ್ಗಜವದನಮಹಂ ಭಜೇ ಜಗದ್ವನ್ದ್ಯಮ್ .. ೧೦..

ಗಾಣಪತಪುಙ್ಗವಾಃ ಕಿಲ ಪಾದಮಯಾನ್ಯಸ್ಯ ಪಞ್ಚಮಸ್ಯಾಹುಃ .
ಶೈವಾದ್ವೈತಾದೀನಾಂ ಮುಖ್ಯಬ್ರಹ್ಮಾಣಿ ಯಾನಿ ಚತ್ವಾರಿ .. ೧೧..

ಅವ್ಯಾಕೃತಂ ತುರೀಯಂ ಬ್ರಹ್ಮ ತ್ರಿಗುಣಾತ್ಮಕಂ ಗುಗಣೇಶಾಖ್ಯಮ್ .
ವಿದ್ಯಾತ್ಮಕಂ ಗಣಪತೇ ಸತತಂ ದೂರೀಕರೋತು ಮಮ ದುರಿತಮ್ .. ೧೨..

ಯಸ್ಯ ಹಿ ನಾಭಿರ್ಬ್ರಹ್ಮಾ ವದನಂ ವಿಷ್ಣುಶ್ಚ ಲೋಚನಂ ರುದ್ರಃ .
ಶಕ್ತಿಶ್ಚ ವಾಮಪಾರ್ಶ್ವಂ ದಕ್ಷಿಣಮರ್ಕೋಽಸ್ಮಿತಾಮಯಸ್ತ್ವಾತ್ಮಾ .. ೧೩..

ಜಾಗ್ರತ್ಸ್ವಪ್ನಸುಷುಪ್ತಬ್ರಹ್ಮ ತ್ರಿಗುಣಾತ್ಮಕಂ ಚ ಯತ್ಪ್ರೋಕ್ತಮ್ .
ವ್ಯಾಕೃತಮಾವಿದ್ಯಕಮಪಿ ತದಪಿ ವ್ಯಕ್ತಂ ಚಕಾಸ್ತು ಮೇ ಚಿತ್ತೇ .. ೧೪..

ಬ್ರಹ್ಮ ಸ್ವಾನನ್ದಾತ್ಮಕವಿದ್ಯಾಽವಿದ್ಯಾತ್ಮಕಪ್ರಭೇದೇನ .
ಭೂಮಬ್ರಹ್ಮ ಚತುಷ್ಪಾತ್ ಪ್ರಕಾಶತಾಂ ಮೇಽನಿಶಂ ಹೃದಾಕಾಶೇ .. ೧೫..

ಮಾಯಾಸಮರಸಯುಕ್ತಂ ಶಾನ್ತಿಗತಂ ನಿಷ್ಕಲಂ ಪರಂ ಜ್ಯೋತಿಃ .
ಯದ್ಬ್ರಹ್ಮ ಪಾದರೂಪಂ ಗಾಣೇಶಾದ್ವೈತಲಕ್ಷ್ಯಭೂತಮಸಿ .. ೧೬..

ಯೋ ಬ್ರಹ್ಮಪಾದ ಆದ್ಯಃ ಸಂಯೋಗಾಯೋಗಪಾದಯುಗಯುಕ್ತಃ
ತೌ ಪಾದಾವಪ್ಯುದಿತಾವಧ್ಯಾರೋಪಾಪವಾದಪರಕಾಷ್ಠೇ .
ಸದಸತ್ಸಹಜಸಮಾತ್ಮಕಚತುರ್ವಿಧಾನನ್ದಪಾದರೂಪಸ್ತ್ವಂ
ರವಿಶಕ್ತೀಶಹರೀಣಾಂ ಸಙ್ಘಾತಸ್ತ್ವಂ ಶ್ರುತೋಽಸಿ ಗಣರಾಜ .. ೧೭..

ಬಿನ್ದುಃ ಸೋಽಹಮ್ಬೋಧಃ ಸಾಙ್ಖ್ಯಶ್ಚೇತಿ ಪ್ರಸಿದ್ಧಭೇದಯುತಃ .
ವಿದ್ಯಾಪಾದೋಽಪಿ ತ್ವಂ ಯೋಗಿಸಮಾಧೌ ಗೃಹೀತಸುವಿಶೇಷಃ .. ೧೮..

ತುರ್ಯಾವಿದ್ಯಾಪಾದಸ್ತ್ವಮೇವ ಸತ್ಯಾನೃತೋ ಜಗದ್ರೂಪಃ .
ಸ ವಿರಾಟ್ ಹಿರಣ್ಯಗರ್ಭಾವೀಶಗುಣೇಶಾವಿತಿ ಪ್ರಭೇದಯುತಃ .. ೧೯..

ಬ್ರಹ್ಮಾಂಶಸ್ಥಿತಿಭೇದಾಃ ಸರ್ವೇ ಚೈತೇ ಸ್ಫುರನ್ತು ಮಮ ಚಿತ್ತೇ .
ಪ್ರಾಯೋಽಸಮ್ಪ್ರಜ್ಞಾತಸಮಾಧಿಜ್ಞೇಯಾ ಗಣೇಶ ಕರುಣಾಬ್ಧೇ .. ೨೦..

ಸಿದ್ಧಿರ್ಬುದ್ಧಿಶ್ಚೇತಿ ದ್ವಿಧಾ ಹಿ ವೈನಾಯಕೀ ಮಹಾಮಾಯಾ .
ಲೋಕೈಕನಾಯಿಕಾ ಸಾ ತದುಪಾಧಿವಶಾತ್ ಕಿಲಾಸಿ ಬಹುಧಾ ತ್ವಮ್ .. ೨೧..

ಏವಂ ಮಾಯೋಪಾಧಿಕಪರಾತ್ಮರೂಪಂ ಹಿ ಪಞ್ಚಧಾ ಭಿನ್ನಮ್ .
ತದದಸ್ಥಾಗುಣಭೇದಾನ್ನೀರೂಪಸ್ಯಾಪಿ ತೇ ಸಮಾಮ್ನಾತಮ್ .. ೨೨..

ಸದ್ಬ್ರಹ್ಮ ಕಿಲ ಪ್ರಥಮಂ ಸಕಲಜಗದ್ವೀಜಭೂತರೂಪಂ ತ್ವಮ್ .
ಮೂರ್ತಿಂ ವಿನಾಯಕ ಇತಿ ಸ್ವೇಚ್ಛಾವಶತೋ ಗಣೇಶ ಗೃಹ್ಣಾಸಿ .. ೨೩..

ಬೀಜಸ್ಯ ಭೂಮಿರೂಪಾ ಕೇವಲಮಾಯಾದ್ವಿತೀಯಮೂರ್ತಿಸ್ತೇ .
ವರ್ತಯತಿ ಕೃತ್ಯಮಖಿಲಂ ಭುವನೇಶೀ ಸಾ ಶಿವೋ ಪರಾಶಕ್ತಿಃ .. ೨೪..

ಮಾಯೇಶಂ ತು ತೃತೀಯಂ ರವಿಮಣ್ಡಲಗಂ ಹಿರಣ್ಮಯಂ ಪುರುಷಮ್ .
ತ್ವಾಮಾಮನನ್ತಿ ವೇದಾ ಹ್ಯನವರತಂ ಕಾಲಚಕ್ರನೇತಾರಮ್ .. ೨೫..

ಉಪಹಿತತುರೀಯಮೂರ್ತಿರ್ಮಾಯಾಯುಕ್ತಃ ಪರಃ ಶಿವೋ ಗಿರೀಶಃ .
ಕಲ್ಪಾನ್ತಕಾಲರೂಪೀ ತ್ವಮೇವ ಸರ್ವಂ ಚ ಸಞ್ಜರೀಹರ್ಷಿ .. ೨೬..

ಮಾಯಾಮಯೋ ಹಿ ವಿಷ್ಣುರ್ಮಾಯೋಪಾಧೇಶ್ಚ ಪಞ್ಚಮೀ ಮೂರ್ತಿಃ .
ಸೋಽಪಿ ತ್ವಮೇವ ನಿಖಿಲಂ ಲೋಕಂ ಪಾಲಯಸಿ ಲೀಲಯಾ ಸತತಮ್ .. ೨೭..

ಏವಂ ಮಾಯಾವಶತೋ ರವಿಶಿವಶಕ್ತ್ಯಾದಿನಾಮಪಞ್ಚಕಭಾಕ್ .
ದಿಶತು ಮದೀಪ್ಸಿತಮಖಿಲಂ ಶುದ್ಧಬ್ರಹ್ಮಾತ್ಮಕಂ ಭವದ್ರೂಪಮ್ .. ೨೮..

ಮಾಯಾಬದ್ಧಃ ಷಷ್ಠಃ ಪ್ರಥಮಶರೀರೀ ಹಿರಣ್ಯಗರ್ಭಸ್ತ್ವಮ್ .
ತತ್ತತ್ಕರ್ಮಾನುಗುಣಂ ಕರೋಷಿ ಸರ್ಗಂ ಸಮಸ್ತಲೋಕಸ್ಯ .. ೨೯..

ಪ್ರಾಕ್ ಪದ್ಮಾಸನರೂಪಗ್ರಹಣಾದ್ಭವತೋಽಪ್ಯುಪಾಧಿತೋ ಭಿನ್ನಾಃ .
ಏತಾಶ್ಚ ಸಗುಣಮೂರ್ತೀರಾಲಮ್ಬ್ಯ ಮತಾನಿ ಪಞ್ಚ ಜಾತಾನಿ .. ೩೦..

ಏತೇ ಹಿ ಪಞ್ಚ ದೇವಾಃ ಸ್ವಸ್ವಾಧಾರೇಷು ಸನ್ತಿ ಸರ್ವತ್ರ .
ವರ್ಣಸ್ವಧರ್ಮವಿಭವಾತ್ತೇಜೋರೂಪಾಸ್ತ್ರಿವರ್ಣ ದೇಹೇಷು .. ೩೧..

ಗಾಯತ್ರೀಗ್ರಹಣೇನ ಹಿ ತತ್ತತೇಜೋ ವಿಶೇಷತೋ ಭಾತಿ .
ತತ್ತಜ್ಜಾತಿಗುಣಾ ಅಪ್ಯುತ್ಕೃಷ್ಟತ್ವೇನ ತೇನ ಜಾಯನ್ತೇ .. ೩೨..

ಮೂಲಾಧಾರೇ ಗಣಪೋ ಮಣಿಪೂರೇ ಹರಿರನಾಹತೇ ಶಮ್ಭುಃ .
ರಾಜತಿ ರವಿರ್ವಿಶುದ್ಧೌ ಬ್ರಹ್ಮಸುರನ್ಧ್ರ ಶಿವಾ ಪರಾ ಶಕ್ತಿಃ .. ೩೩..

ಅಪಿ ಚ ಷಡಾಧಾರೇಷು ಪ್ರಾಪ್ಯೈವಂ ಧ್ಯಾನಯೋಗಚಿತ್ತಲಯೌ .
ಮುಕ್ತಾ ಭವನ್ತಿ ತಸ್ಮಾತ್ ಪಞ್ಚಾಯತನಾರ್ಚನೇಽತಿಹರ್ಷಸ್ತೇ .. ೩೪..

ಗಣಪತಿಪಞ್ಚಾಯತನಂ ಪಞ್ಚಾಯತನಂ ರವೀಶ್ವರಾದೀನಾಮ್ .
ಯದ್ವಾ ತದ್ವಾ ಕೃತಮಪಿ ಪೂಜಾವಿಷಯೇಽತಿಮಾತ್ರತೃಪ್ತಿಸ್ತೇ .. ೩೫..

ಪ್ರಾಸಾದಶುದ್ಧಪೂಜಾ ಅತ ಏವ ವಿಹಾಯ ಪಞ್ಚದೇವಾನಾಮ್ .
ಪಞ್ಚಾಯತನಸಪರ್ಯಾಂ ಸಗುಣಸಮಷ್ಟಯರ್ಚನಾಂ ವದನ್ತಿ ಬುಧಾಃ .. ೩೬..

ಹರ್ಯಾದಿಗಣೇಶಾನ್ತಾಃ ಪಞ್ಚೈತಾ ಬ್ರಹ್ಮಮೂರ್ತಯೋ ಮುನಿಭಿಃ .
ಅತ ಏವ ಪ್ರಣವಸ್ಯ ಚ ಗಾಯತ್ರ್ಯಾಶ್ಚಾಪಿ ದೇವತಾಃ ಪ್ರೋಕ್ತಾಃ .. ೩೭..

ವ್ಯಾಚಕ್ಷತೇ ಹಿ ಋಷಯೋ ಗಾಯತ್ರ್ಯಾಃ ಪಞ್ಚದೇವತಾಪರಾಮ್ .
ಪ್ರಣವಸ್ಯಾಪಿ ತಥೈವ ಪ್ರಪಞ್ಚಯನ್ತಿ ಸ್ಮ ಪಞ್ಚಧಾಪ್ಯರ್ಥಾನ್ .. ೩೮..

ಅತ ಏಷಾಂ ಪಞ್ಚಾನಾಂ ಬ್ರಹ್ಮತ್ವನಿರೂಪಣೇ ನಿಷ್ಣಾತಾಃ .
ಉತ್ತರಮೀಮಾಂಸಾಃ ಷಟ್ ಶುದ್ಧಾದ್ವೈತೇನ ತೇನಿರೇ ಮುನಯಃ .. ೩೧..

ಪ್ರತಿಪಾದಯನ್ತಿ ಚೈತೇ ಯದ್ಯಪ್ಯಾಪಾತತೋ ವಿಭಿನ್ನಾನ್ ವೈ .
ಸರ್ವೇಷಾಂ ಹಿ ಋಷೀಣಾಂ ಪ್ರಾಯಸ್ತ್ವಯ್ಯೇವ ಪರಮತಾತ್ಪರ್ಯಮ್ .. ೪೦..

ಏತೇ ಪಞ್ಚ ಮತಸ್ಥಾ ಭವತಃ ಸರ್ವೇಷು ಪೂರ್ವಪೂಜ್ಯತ್ವಮ್ .
ವಿಗ್ನಾಧಿಪತ್ಯಮಙ್ಗೀಕುರ್ವನ್ತಿ ಯತೋ ಗಣಾಧಿಪತ್ಯಂ ಚ .. ೪೧..

ಭೂಗತಬೀಜಾದಿ ಯಥಾ ಪಾದಪರೂಪೇಣ ಜಾಯತೇ ಜಗತಿ .
ಬ್ರಹ್ಮೈವ ಬೀಜಭೂತಂ ಪ್ರಕೃತಿಃ ಪೃಥಿವೀ ತಯಾ ಹಿ ಸಂಯೋಗಾತ್ .. ೪೨..

ಕಾರಣಸೂಕ್ಷ್ಮಸ್ಥೂಲಪ್ರಪಞ್ಚರೂಪೇಣ ಜಾಯತೇ ಕ್ರಮಶಃ .
ಮೂಲಂ ಗಣಪತಿರೂಪಂ ಪ್ರಪಶ್ಚರೂಪಸ್ಯ ಪಾದಪಸ್ಯೈವಮ್ .. ೪೩..

ಬುದ್ಧಿಃ ಸಿದ್ಧಿಶ್ಚ ಫಲೇ ಮೂಲಂ ಗಣಪೋಽಸ್ಯ ವಿಶ್ವರೂಪತರೋಃ .
ಶಾಖಾಃ ಕೇಶಾಃ ಕನ್ದಂ ತ್ವರ್ಕೋಽಖಿಲಮೂಲಮುಚ್ಯಸೇಽತಸ್ತ್ವಮ್ .. ೪೪..

ಸೂಲೇ ಜಲಸೇಕಾತ್ ಕಿಲ ತರುಪತ್ರಫಲಾದಯೋಽಪಿ ವರ್ಧನ್ತೇ .
ತವ ಪೂಜಯಾ ಗಣಪತೇ ರವಿಶಿವಶಕ್ತ್ಯಾದಯೋಽಪಿ ತೃಪ್ಯನ್ತಿ .. ೪೫..

ಏವಂ ಸಗುಣಬ್ರಹ್ಮವ್ಯಪದೇಶವತಾಂ ಚ ಪಞ್ಚ ದೇವಾನಾಮ್ .
ಪೂರ್ಣಕಲಾಂಶಾಂಶಾಂಶಾವತಾರರೂಪಾಶ್ಚ ಮೂರ್ತಯೋಽನನ್ತಾಃ .. ೪೬..

ಭವತಃ ಕತಿಪಯಮೂರ್ತೀರಾವಿರ್ಭಾವಾವತಾರತಾರಮುಖಾಃ .
ವೈನಾಯಕಮತವಿದಿತಪ್ರಕ್ರಿಯಯೈವ ಬ್ರವೀಮಿ ಹೇರಮ್ಬ .. ೪೭..

ಸತ್ಯಂ ಜ್ಞಾನಮನನ್ತಂ ಜ್ಯೋತೀರೂಪಂ ಚ ನಿರ್ಗುಣಂ ಬ್ರಹ್ಮ .
ಏತನ್ನಿರ್ವ್ಯಾಪಾರಂ ಗಜಪದವಾಚ್ಯಂ ಲಯಾದಿಹೇತುತ್ವಾತ್ .. ೪೮..

ಯೋಗೀನ್ದ್ರಾ ಗಚ್ಛನ್ತಿ ಹಿ ಸಮಾಧಿನಾತ್ರೇತಿ ಗಃ ಸ್ಮೃತೋ ಮುನಿಭಿಃ .
ಪ್ರಣವಾತ್ಮಕಜಗದಸ್ಮಾಜ್ಜಾಯತ ಇತಿ ಜಃ ಸ್ಮೃತಿಪ್ರತೀತಾರ್ಥಃ .. ೪೯..

ಗಶ್ವಾಸೌ ಜಶ್ಚೇತಿ ವ್ಯುತ್ಪಾದಯತಿ ಸ್ಮೃತಿರ್ಹಿ ಗಜಶಬ್ದಮ್ .
ಏಷ ಪ್ರತಿಪದಾಯತಿ ಪ್ರಭವಾಪ್ಯಯಕಾರಣಂ ಪರಂ ಬ್ರಹ್ಮ .. ೫೦..

ಮೂಲಪ್ರಕೃತಿಸ್ತ್ರಿಗುಣಾ ಶುಕ್ತೌ ರಜತಂ ಯಥಾ ತತೋ ಜಾತಾ .
ತದ್ಗತಚಿತ್ಪ್ರತಿಬಿಮ್ಬಂ ಸಗುಣಬ್ರಹ್ಮೇತಿ ಕೀರ್ತಿತಂ ಮುನಿಭಿಃ .. ೫೧..

ಓಙ್ಕಾರಬ್ರಹ್ಮೇತಿ ಚ ನರ ಇತಿ ನಾಮ್ನೀ ಪ್ರಕೀರ್ತಿತೇ ತಸ್ಯ .
ಸಕಲಜ್ಯೋತೀರೂಪಂ ಸಗುಣಸ್ಯೋಕ್ತಂ ಹಿ ತತ್ತ್ವವಿದ್ವದ್ಭಿಃ .. ೫೨..

ಮೂಲಾವಿದ್ಯಾಗತನರಮದ್ವೈತಬ್ರಹ್ಮರೂಪಮಪಿ ಬಿಭ್ರತ್ .
ನಿರ್ಗುಣಸಗುಣಜ್ಯೋತೀರೂಮುಭಯಥಾ ತೃತೀಯಮಪ್ಯುಕ್ತಮ್ .. ೫೩..

ಅದ್ವೈತ ಇತಿ ಸದಾತ್ಮೇತ್ಯಾಮ್ನಾಯನ್ತೇ ತಥಾ ಮಹಾವಾಕ್ಯಾಃ .
ಇತ್ಯುಕ್ತಾನಿ ಕ್ರಮತೋ ನಾಮಾನ್ಯೇಷಾಂ ಸ್ಮೃತೀತಿಹಾಸಾದೌ .. ೫೪..

ನರವಾಚ್ಯಸಕಲರೂಪೋ ಗಜವಾಚ್ಯೋ ನಿಷ್ಕಲಸ್ವರೂಪಸ್ತ್ವಮ್ .
ವಿಗ್ನೇಶ ಸಕಲನಿಷ್ಕಲರೂಪಮಹಾವಾಕ್ಯಮೂರ್ತಿಧಾರೀ ತ್ವಮ್ .. ೫೫..

ಓಂ ತತ್ಸದಿತಿ ಹಿ ಭೇದಾದ್ಬ್ರಹ್ಮ ಪ್ರೋಕ್ತಂ ತ್ರಿಧಾ ಸುಧೀಭಿರಪಿ .
ಪ್ರಥಿತಂ ಮೂರ್ತಮರ್ಮ್ತಂ ಮೂರ್ತಾಮೂರ್ತಂ ತ್ರಿಧಾ ತದೇವಮಪಿ .. ೫೬..

ನಾಮಾನ್ತರಾಣಿ ಸರ್ವಾಣ್ಯೇತಾನ್ಯುದಿತಾನಿ ವೇದಶೀರ್ಷೇಷು .
ಕಮಲಾವಲ್ಲಭ ಭವತಃ ಪೂರ್ವೋಕ್ತತ್ರಿವಿಧರೂಪಧಾರಯಿತುಃ .. ೫೭..

ಅಪಿ ಚಾನ್ಯಾನಿ ಗಣಪತೇ ನಾಮಾನಿ ಸಹಸ್ರಶಃ ಪ್ರಸಿದ್ಧಾನಿ .
ಕರ್ಮಜ್ಞಾನೋಪಾಸನಕಾಣ್ಡೇಷು ಪೃಥಗ್ವಿನಾಯಕಾದೀನಿ .. ೫೮..

ನಿರ್ಗುಣರೂಪಧ್ಯಾನಂ ನ ಸಾಧಕಾಲಾ ಪ್ರಸಿಧ್ಯತಿ ಕ್ಷಿಪ್ರಮ್ .
ತದನುಗ್ರಹಾಯ ಧರಸೇ (ಧತ್ಸೇ)ಧೀಪರಿಪಾಕಾನುರೂಪರೂಪಾಣಿ .. ೫೯..

ಮನ್ದಾಧಿಕಾರಿಣಾಮಪಿ ಯಥಾ ರುಚಿಃ ಸ್ಯಾತ್ತದಾನುಗುಣ್ಯೇನ .
ವಿಗ್ರಹವರಾ ಗೃಹೀತಾಃ ಸರ್ವೇ ತೇ ಮಾಂ ಸದಾನುಗೃಹ್ಣನ್ತು .. ೬೦..

ಕೈಲಾಸೇ ವೈಕುಣ್ಠೇ ಹಿರಣ್ಮಯಪುರೇ ಚ ಯಾ ಮಣಿದ್ವೀಪೇ .
ಪೂಜ್ಯನ್ತೇಽನಯಸ್ಮಿನ್ ವಾ ಸರ್ವಾ ಮೂರ್ತೀಶ್ಚ ತಾಸ್ತವೋಪಾಸೇ .. ೬೧..

ಅಷ್ಟೋತ್ತರಂ ಶತಂ ವಾ ಸಹಸ್ರಮತ್ಯಷ್ಟ ಮಧಿಕಾ ಶ್ಚ ಮೂರ್ತಯೋ ವಾ ತೇ .
ಮುಖ್ಯತ್ವೇನ ಖ್ಯಾತಾಃ ಖೇಲನ್ತ್ವಖಿಲಾಃ ಸದಾ ಮಮ ಸ್ವಾನ್ತೇ .. ೬೨..

ಕಾಶ್ಚನ ಪತ್ನೀಹೀನಾ ಬಹುಶಕ್ತಿಯುತಾಶ್ಚ ಮೂರ್ತಯಃ ಕಾಶ್ವಿತ್ .
ಪಾನ್ತ್ವೇಕದನ್ತ ಭವತೋಽಪ್ಯೇಕತ್ಯಷ್ಟಾದಿಶಕ್ತಯಃ ಸರ್ವಾಃ .. ೬೩..

ಬಹುಫಲಪುಷ್ಪಮಹೀ ರುಹನಿಕರಾರಾಮಂ ನಿಘಾಟಿತಕವಾಟಮ್ .
ಆರಾಮೇಶಸಮೀಪೇ ನಿಷ್ಠನ್ ಕೃತ್ವಾಹ್ಯಾರಾಮೇಶಿತೃಸವಿಧೇ ಯಥೋಪವನಪಾಲಃ (?) .. ೬೪..

ನೋದ್ಧಾಟಯತಿ ಕವಾಟಂ ಸ್ವಾಮ್ಯಾದೇಶಂ ವಿನಾ ಪ್ರವೇಶಾಯ .
ತದ್ವನ್ನೋದ್ಘಾಟಯತಿ ಸ್ವಾಧಿಷ್ಠಾನಾದಿ ನಿಜಕವಾಟಾನಿ .. ೬೫..

ಸರ್ವಶರೀರಿಶರೀರೇ ಮೂಲಾಧಾರಸ್ಥಿತಾ ಹಿ ಕುಣ್ಡಲಿನೀ .
(ಮೂಲಾಧಾರಸ್ಥಕುಣ್ಡಲಿನೀಶಕ್ತಿಃ)
ಆವೃತ್ಯ ಷಡಾಧಾರಾನ್ ಮೃದ್ಭಾಣ್ಡಮಿವಾಸ್ತಿ ಮೂಲವಹ್ನೇರ್ಯಾ .. ೬೬..

ಯದ್ವಚ್ಛಮೀದ್ರುಮೇಽಗ್ನಿಸ್ತದ್ವನ್ಮೂಲಾನಲೇ ಭವಾನ ಗಣೇಶೋ ಸ್ತಿ .
ತತ್ರತ್ಯಸಿದ್ಧಿಬುದ್ಧಥಾದ್ಧಿ ಯುತಭವದಾಜ್ಞಾಂ ಗಣಪಾಜ್ಞಾಂ ವಿನಾ ಕದಾಚಿದಪಿ .. ೬೭..

ಯದಿ ತವ ಪೂಜಾ ಕ್ರಿಯತೇ ವಿನಾಯಕೋದ್ಘಾಟಿತಾಃ ಷಡಾಧಾರಾಃ .
ಅತ ಏವ ಪೂರ್ವಪೂಜ್ಯಃ ಸರ್ವಾ ಕರ್ಮಾ ಸ್ಮ್ಭೇತ್ವಮೇವ ದೇವಾದ್ಯೈಃ .. ೬೮..

ಶುಕ್ಲಾಮ್ಬರೇತಿಮನ್ತ್ರಂ ಪ್ರೋಚ್ಚಾರ್ಯ ಚತುರ್ಮುಖಾದಯೋಽಪಿ ತ್ವಾಮ್ .
ಶ್ವೇತವಿನಾಯಕಮೂರ್ತಿಂ ಧ್ಯಾತ್ವಾ ಕುರ್ವನ್ತಿ ಕುಟ್ಟನಂ ಮುಷ್ಟಯಾ .. ೬೯..

ಸರ್ವಶರೀರಿಶಿರಸ್ಥಾ ಮೂರ್ಧನಿ ಕರಕುಟ್ಟನಾತ್ ಸುಧಾ ಗಲಿತಾ .
ಪತತಿ ಸುಷುಮ್ನಾನಾಡಿದ್ವಾರಾ ಮೂಲಾದುಪರ್ಯುಪೋದ್ಗತಯಾ .. ೭೦..

ಸಿದ್ಧಥಾ ಬುದ್ಧಥಾ ಚ ಯುತೇ ಮೂಲಾಧಾರಸ್ಥಗಣಪತೌ ಭವತಿ .
ತೇನ ಪ್ರಸೀದತಿ ಭವಾನ್ ಕರೋತಿ ಕರ್ಮಾರ್ಹಮನ್ತರಾತ್ಮಾನಮ್ .. ೭೧..

ತಾದೃಶಕುಟ್ಟನತುಷ್ಟಂ ಶ್ವೇತವಿನಾಯಕಮನಾರತಂ ಕಲಯೇ .
ಪೀಯೂಷಮಥನಸಮಯೇ ಪುರುಹೂತಮುಖೈಶ್ಚ ಪೂಜಿತೋ ಯೋಽಭೂತ್ .. ೭೨..

ಭವತಸ್ತೇಜೋರೂಪಂ ನರಾಮರಾದ್ಯೈರ್ನ ಶಕ್ಯತೇ ದ್ರಷ್ಟುಮ್ .
ಅತ ಏವ ನಯನವಿಷಯಂ ಗೃಹ್ಣಾಸಿ ತ್ವಂ ಗಜಾನನಶರೀರಮ್ .. ೭೩..

ನೃಗಜಾತ್ಮಕರೂಪತ್ವಾನ್ನಿರ್ಗುಣಸಗುಣಸ್ವರೂಪವತ್ತ್ವಾಚ್ಚ .
ಹೇಲಮ್ಬೋದರ ಸ್ಯಾದೇಕದನ್ತ ಭವತೋ ಗಜಾನನಾಖ್ಯಾ ಸುವಿಶ್ರುತಾಮ್ನಾಯೇ .. ೭೪..

ಗಜಪದವಾಚ್ಯಂ ಹಿ ಮುಖಂ ಪ್ರಥಮಂ ಕಾರ್ಯಂ ಹಿ ಯಸ್ಯ ದೇವಸ್ಯ .
ಅತ ಏವ ವಾ ಸ ಕಥಿತೋ ಗಜಮುಖನಾಮೇತಿ ಮನ್ವತೇ ಮುನಯಃ .. ೭೫..

ತ್ಯಕ್ತ್ವಾ ಮಾಯಾವದನಂ ಗಜವದನಂ ನಿರ್ಗುಣಂ ದಧೌ ದೇವಃ .
ಯೋ ಲೀಲಯಾ ಗಣೇಶಸ್ತಂ ತ್ವಾಂ ಶರಣಂ ಸದಾ ಪ್ರಪತ್ಯೇಽಹಮ್ .. ೭೬..

ವಿಗತೋ ನಾಯಕ ಇತಿ ಸಾ ವಿನಾಯಕಾಖ್ಯಾ ಶ್ರುತೌ ಸಮಾಮ್ನಾತಾ .
ಸರ್ವೇಷಾಂ ಹಿ ವಿಶೇಷಾನ್ನಾಯಕ ಇತ್ಯಪ್ಯಭಿಪ್ರಯನ್ತ್ಯರ್ಥಮ್ .. ೭೭..

ವಿಗ್ನೋಽಭಿಹಿತೋ ಜಗತಾಂ ಸಾಮರ್ಥ್ಯಸ್ಯ ಹಿ ವಿಶೇಷತೋ ಹನನಾತ್ .
ಉಕ್ತಃ ಸ ಏವ ಕಾಲಸ್ತನ್ನಾಥತ್ವಾತ್ ತ್ವಮೇವ ವಿಗ್ನೇಶಃ .. ೭೮..

ಜೀವೇಶ್ವರಾ ಹಿ ವಶಗಾ ಭವನ್ತಿ ಕಾಲಾತ್ಮನಃ ಪರೇಶಸ್ಯ .
ತದಧೀಶ್ವರಸ್ಯ ಭವತೋ ವಿಗ್ನೇಶತ್ವೇ ಕಿಮಸ್ತಿ ವಕ್ತವ್ಯಮ್ .. ೭೯..

ಸರ್ವಬ್ರಹ್ಮಾಣ್ಡಾನಾಂ ಸ್ವತನ್ತ್ರದೇವೋ ವಿನಾಯಕೋ ರಾಜಾ .
ರಾಜಪ್ರತಿನಿಧಿರರ್ಕಃ ಸಹಾಯಭೂತಾ ಶಿವಾ ಮಹಾರಾಜ್ಞೀ .. ೮೦..

ಸೃಷ್ಟಿಸ್ಥಿತಿಸಂಹಾರಾನ್ ಕರ್ತಾರೋ ಧಾತೃಹರಿಗಿರೀಶಾಶ್ಚ .
ರಾಜ್ಯಾಧಿಕಾರಸಚಿವಾಃ ಸನ್ತಿ ಭವಾನೀ ದಿವಾಕರಾದ್ಯಾಶ್ಚ .. ೮೧..

ಯದ್ರಾಜ್ಯರಕ್ಷಣಾಯೈತತ್ಸೇನಾಪತಿತಾಂ ಗುಹೋ ಮಹಾಸೇನಃ .
ತಜ್ಜ್ಯೇಷ್ಟರಾಜನಾಮಾ ಗಜಾನನೋಽಭೂದಿತೀರಿತಂ ಮುನಿಭಿಃ .. ೮೨..

ಯಸ್ಯ ಜ್ಯೇಷ್ಠಾಭಾವಾಜ್ಯೇಷ್ಠತ್ವಾದಪಿ ಚ ರಾಜಭಾವವತಾಮ್ .
ತಜ್ಜ್ಯೇಷ್ಠರಾಜನಾಮ ಪ್ರೋಕ್ತಂ ಸ ಸದಾ ವಿರಾಜತಾಂ ಚಿತ್ತೇ .. ೮೩..

ಯಸ್ಯೋದರಮವಲಮ್ಬಶ್ವರಾಚರಾಣಾಂ ಹಿ ಸರ್ವಜನ್ತೂನಾಮ್ .
ಮಾತಾಪಿತರಾವಪಿ ಪ್ರಲಯೇ ಸ್ಥಿತ್ಯಾದಾವಪಿ ಜನ್ಮಾದಾವಪಿ
ಯಃ ಸದೈವ ಲಮ್ಬೋದರಂ ತಮವಲಮ್ಬೇ .. ೮೪..

ಶೂರ್ಪಸ್ತುಷಮಿವ ಕಲುಷಂ ನಿರಸ್ಯತೀತ್ಯಸ್ಯ .
(ಶೂರ್ಪಕರ್ಣಾಖ್ಯಾ ಕರ್ಣಾದಸ್ಯತಿ ಹಿ ಶೂರ್ಪಕರ್ಣೋಽತಃ)
ವಿಗಲಿತರಜಸ್ತಮೋಮಲಮತಿಪೂತಂ ಮಾಂ ಕರೋತು ಸ ಗಣೇಶಃ .. ೮೫..

ಬ್ರಹ್ಮಾತ್ಮಮಸ್ತಕತ್ವಾತ್ ಕಣ್ಠಾಧೋ ಮಾಯಿಕಸ್ವರೂಪತ್ವಾತ್ .
ವಕ್ರಂ ದೇಹವಿಲಕ್ಷಣಮಸ್ಯ ತು ತುಣ್ಡಂ ಸ ವಕ್ರತುಣ್ಡೋಽತಃ .. ೮೬..

ಮಾಯಾವಾಚಕ ಏಕಃ ದನ್ತಃ ಸತ್ತಾತ್ಮವಾಚಕಶ್ಚ ತಯೋಃ .
ಯೋಗೋ ಗಣೇಶ ಇತ್ಯತ ಉಕ್ತೋಽಸಾವೇಕದನ್ತಾಮ್ನಾಪಿ .. ೮೭..

ಬ್ರಹ್ಮಾತ್ಮನಾಂ ಪತಿತ್ವಾನ್ಮಾಯಾಗೌರೀಮಹೇಶ್ವರಾದೀನಾಮ .
ಅನ್ನಪ್ರಾಣಪ್ರಭೃತಿಪ್ರಣವಾನ್ತಬ್ರಹ್ಮಣಾಂ ಪತಿತ್ವಾಚ್ಚ .. ೮೮..

ಯಂ ಬ್ರಹ್ಮಣಮ್ಪತಿರಿತಿ ಪ್ರಾಹುರ್ವೇದಾಧಿಪತ್ಯತೋಽಪ್ಯೇವಮ್ .
ತಮಹಂ ಸರ್ವಾಧೀಶಂ ಸತತಂ ಪರಿಶೀಲಯಾಮಿ ವಿಘ್ನೇಶಮ್ .. ೮೯..

ಬ್ರಹ್ಮಾದಿಸ್ತಮ್ಬಾನ್ತಪ್ರಾಣಿಗಣಾನಾಮಧೀಶ್ವರೋ ಯತಃ .
ಸಗುಣಬ್ರಹ್ಮಗಣಾನಾಮಪಿ ತಸ್ಮಾತ್ ತ್ವಂ ಗಣೇಶ ಇತ್ಯುಕ್ತಃ .. ೯೦..

ಯನ್ನಾಮರೂಪಭೋಗಾನ್ ಮಾಯಾಗೂಢೋಽನ್ತರೇವ ಮುಷ್ಣಾತಿ .
ತನ್ಮೂಷಕಃ ಸ್ವವಾಹೋ ಯಸ್ಯ ಸ ಗಣಪೋ ವಿಹರತು ಮಮ ಮನಸಿ .. ೯೧..

ಮೂಲಪ್ರಕೃತಿಃ ಪತ್ನೀ ಜಹಾತಿ ಚೈನಾಂ ತು ಭುಕ್ತಭೋಗಾಂ ಯಃ .
ಪತ್ನೀಹೀನೋಽಭಿಹಿತಸ್ತತೋ ಗಜಾಸ್ಯೋಽನಿಶಂ ಸ ಮಾಂ ಪಾತು .. ೯೨..

ಬ್ರಹ್ಮಣಿ ವೇದೇ ಚರತೀತ್ಯರ್ಥಮಭಿಪ್ರೇತ್ಯ ವೇದಗಮ್ಯತ್ವಾತ್ .
ತಂ ಬ್ರಹ್ಮಚಾರಿಶಬ್ದಂ ಕುಞ್ಜರವದನೇ ಪ್ರಯುಞ್ಜತೇ ಕವಯಃ .. ೯೩..

ಬ್ರಹ್ಮಾತ್ಮಮಸ್ತಕತ್ವಾತ್ತಸ್ಯ ಮಹಾವಾಕ್ಯಗಣಪತೇಶ್ವ ವಿಭೋಃ .
ತೇನ ಚ ಸಹಸಞ್ಚಾರಾದಾಹುರ್ವಾ ಬ್ರಹ್ಮಚಾರೀತಿ .. ೯೪..

ಆತ್ಮಾರಾಮತ್ವಾದಪಿ ಚರತಿ ಬ್ರಹ್ಮಣ್ಯಬಾಹ್ಯವೃತ್ತಿರಿತಿ .
ಯಮಿಹಾಮನನ್ತಿ ಮುನಯಃ ಪಾಯಾತ್ಸ ಬ್ರಹ್ಮಚಾರಿದೇವೋ ಗಣಪೋ ಮಾಮ್ .. ೯೫..

ಸನ್ ದ್ವಾಪರೇ ಪರಾಶರಪುತ್ರಃ ಸಿನ್ದೂರದಾನವಂ ನ್ಯವಧೀತ್ .
ಯದ್ಬ್ರಹ್ಮಚರ್ಯವರ್ತೀ ಗದಿತೋಽತೋ ಬ್ರಹ್ಮಚಾರಿಶಬ್ದೇನ .. ೯೬..

ವಿಮಲಕಮಣ್ಡಲುತಟಿನೀತೀರಮಯೂರೇಶನಗರವರ್ಯೇ ಯಃ .
ಭೂಸ್ವಾನನ್ದೇ ಸುಚಿರಾದಾವಿರ್ಭೂತೋಽದ್ಭುತಾನಿ ಕೃತ್ಯಾನಿ .. ೯೭..

ಲೋಕಾನುಕೂಲಭೂತಾನ್ ಸಿನ್ಧುವಧಾದೀಂಶ್ಚ ಬಹುವಿಧಾನ್ ವ್ಯದಧಾತ್ .
ನಿಖಿಲಾನುಗ್ರಹನಿರತಃ ಸತತಂ ದ್ವೈಮಾತುರಃ ಸ ಮಾಂ ಪಾಯಾತ್ .. ೯೮..

ಯತ್ಕೋಪಪಾವಕಾರ್ಚಿಷ್ಯಸುರೌ ಚಣ್ಡಪ್ರಚಣ್ಡನಾಮಾನೌ .
ಪ್ರಾಪ್ತೌ ಪತಙ್ಗಭಾವಂ ಪಾಲಯತು ಸ ಮಾಂ ಸದೈವ ವಿಘ್ನೇಶಃ .. ೯೯..

ಯಶ್ಚಾಷ್ಟಗನ್ಧನಿರ್ಮಿತಚನ್ದನಗಣಪೋ ಪುರಾ ಭೃಗೋಃ ಸುತಯಾ .
ರಮಯಾ ಪ್ರಪೂಜಿತಃ ಸನ್ ವಿವಾಹಸಮಯೇ ಪುರಾಣಪುರುಷಸ್ಯ .. ೧೦೦..

ದುರ್ಗನ್ಧಾಸುರಮವಧೀನ್ಮಧುಕೈಟಭಮೇದಸಃ ಸಮುದ್ಭೂತಮ್ .
ಯೋಽಪಿ ಚ ಗವ್ಯಗಣಪತಿರ್ಮಹಿತೋ ಗೋಲೋಕರಾಧಯಾ ಪೂರ್ವಮ್ .. ೧೦೧..

ಗವ್ಯೈಃ ಪಯೋದಧಿಘೃತೈರ್ಜಘಾನ ಪಾಪಾಸುರಂ ದುರಾತ್ಮಾನಮ್ .
ವರಿವಸ್ಯಾಮ್ಯನವರತಂ ತಂ ವಿಘ್ನೇಶಂ ದಯಾಪಯೋರಾಶಿಮ್ .. ೧೦೨..

ಯಂ ಹಾರಿದ್ರಗಣಪತಿಂ ಹಿಮವದ್ದುಹಿತಾ ಮಹೇಶ್ವರಶ್ಚಾಪಿ .
ಸ್ವೀಯೇ ವಿವಾಹಸಮಯೇ ಹ್ಯಪೂಜಯೇತಾಂ ಚ ದಮ್ಪತೀ ಪ್ರಾಞ್ಚೌ .. ೧೦೩..

ಯಶ್ಚ ಹರಿದ್ರಾಬಿಮ್ಬಾದಾವಿರ್ಭೂತೋ ಗಣೇಶ್ವರಃ ಸದ್ಯಃ .
ಅವಧೀದಮಙ್ಗಲಾಸುರಮನ್ಯಮಪರಮಾರನಾಮಕಂ ಹ್ಯಸುರಮ್ .. ೧೦೪..

ಗೌರೀಹರವಚನಾದ್ಯಂ ಚ ಶುಭಾದೌ ಪ್ರಪೂಜಯನ್ತ್ಯದ್ಯ .
ಮಮ ಹಾರಿದ್ರಗಣಪತಿರ್ಹರತು ಸ ದುರಿತಂ ಸಮಸ್ತಮಪಿ ಸದ್ಯಃ .. ೧೦೫..

ಕೃತಯುಗಸಮಯೇ ಯೋಽಸೌ ಕಾಶ್ಯಪಪುತ್ರೋ ಮಹೋತ್ಕಟೋ ಭೂತ್ವಾ .
ದೇವಾನ್ತಕಂ ನರಾನ್ತಕಮಪಿ ನಾಮ್ನಾ ತಾವಹನ್ಮಹಾದುಷ್ಟೌ .. ೧೦೬..

ಪ್ರಾಪಯದಾನನ್ದಭುವಂ ಸಶರೀರಂ ಕಾಶಿರಾಜಮಪಿ ಭಕ್ತಮ್ .
ಅಕರೋಚ್ಚಾದ್ಭುತಲೀಲಾಮಹೋತ್ಕಟಂ ತ್ವಾಮಹಂ ಸದಾರ್ಹಾಮಿ .. ೧೦೭..

ಯೋಽಪಿ ವರೇಣ್ಯಾಯ ಪುರಾ ಗಣೇಶಗೀತಾಂ ಹಿತಾಮುಪದಿದೇಶ .
ಸ ವರೇಣ್ಯರಾಜಪುತ್ರೋ ಗಜಾನನೋ ಮೇ ತನೋತು ಕುಶಲತತಿಮ್ .. ೧೦೮..

ಧೂಮ್ರವಿನಾಯಕಮೂರ್ತಿಂ ಗ್ರಹೀಷ್ಯಸಿ ತ್ವಂ ಕಲೇರ್ಯುಗಸ್ಯಾನ್ತೇ .
ಸರ್ವಾಂಶ್ಚ ನಿಗ್ರಹಿಷ್ಯಸಿ ವಿಪ್ಲುತಮತಕೃತ್ಯನಾಸ್ತಿಕಪ್ರಾಯಾನ್ .. ೧೦೯..

ಶಿಶ್ನೋದರಮಾತ್ರಪರಾ ಜಾತಿವಿಭಾಗಾದಿವರ್ಜಿತಾಃ ಸರ್ವೇ .
ಧೂಮ್ರವಿನಾಯಕ (ಧೂಮಧ್ವಜೇನ) ಭವತಾ ಸಮೂಲಘಾತಂ ಹತಾ ಭವಿಷ್ಯನ್ತಿ .. ೧೧೦..

.. ಇತಿ ಶ್ರೀವಿದ್ವದ್ರತ್ನೋಪನಾಮಕೇನ ವೈಯಾಕರಣಶಿರೋಮಣಿನಾ ವೈದಿಕಷಡ್ದರ್ಶನೀಸಾರವೇದಿನಾ ನೀಲಕಣ್ಠಶಾಸ್ತ್ರಿಣಾ ವಿರಚಿತಂ ಗಣೇಶಪೂರ್ವಶತಕಮ್ .