ಕಾತ್ಯಾಯನೀಸ್ತುತಿಃ

ನಮಸ್ಕಾರ ಧ್ಯಾನ .
ಚನ್ದ್ರಹಾಸೋಜ್ವಲಕರಾ ಶಾರ್ದೂಲವರವಾಹನಾ .
ಕಾತ್ಯಾಯನೀ ಶುಭಂ ದದ್ಯಾದ್ ದೇವಿ ದಾನವ ಘಾತಿನೀ ..

ಕಾತ್ಯಾಯನೀ ಗಾಯತ್ರೀ
ಓಂ ಕಾತ್ಯಾಯನಾಯ ವಿದ್ಮಹೇ ಕನ್ಯಕುಮಾರೀ ಧೀಮಹಿ ತನ್ನೋ ದುರ್ಗೇಃ ಪ್ರಚೋದಯಾತ್ .
ಕಾತ್ಯಾಯನೀ ಧ್ಯಾನಮ್ .
ಚನ್ದ್ರಹಾಸೋಜ್ಜ್ವಲಕರಾ ಶಾರ್ದೂಲವರವಾಹನಾ .
ಕಾತ್ಯಾಯನೀ ಶುಭಂ ದದ್ಯಾದ್ ದೇವೀ ದಾನವಘಾತಿನೀ ..

ದೇವಿ ಪ್ರಪನ್ನಾರ್ತಿಹರೇ ಪ್ರಸೀದ, ಪ್ರಸೀದ. ಮಾತರ್ಜಗತೋಽಖಿಲಸ್ಯ .
ಪ್ರಸೀದ ವಿಶ್ವೇಶ್ವರಿ ಪಾಹಿ ವಿಶ್ವಂ ತ್ವಮೀಶ್ವರೀ ದೇವಿ ಚರಾಚರಸ್ಯ ..

.. ಕಾತ್ಯಾಯನೀಸ್ತುತಿಃ ಋಷಿಕೃತಾ ..

ಮಹಾಕಾಲ ಸಂಹಿತಾಯಾಮ್
ಜಗದಮ್ಬ ಜಯಾನನ್ತೇ ಸರ್ವೇಕಸಾಕ್ಷಿಣಿ .
ಸಙ್ಕಟೋದ್ಧಾರಿಣಿ ಶಿವೇ ಭಕ್ತಾನಾಮಭಯಙ್ಕರೇ ..

ಸಮಸ್ತ ಜಗತಾಧಾರಭೂತೇ ಬ್ರಹ್ಮಸ್ವರೂಪಿಣಿ .
ವಿಧೀಶ ಹರಿ ಶಕ್ರಾದಿ ದೇವಾ ವಿದಿತ ವೈಭವೇ ..

ಸೃಷ್ಟಿ ಸ್ಥಿತಿ ಪ್ರಲಯಕೃತ್ ತ್ರಿಗುಣಾತ್ಮಕ ವಿಗ್ರಹೇ .
ಪರಾಪರೇಶಿ ಪ್ರಣತಮನುಜ-ಪ್ರಾಣದಾಯಿನಿ ..

ಮದುಪಾಸ್ಯತಯಾ ಖ್ಯಾತನಾಮ್ನಿ ತ್ರಿಭುವನೇಶ್ವರಿ .
ಕಾತ್ಯಾಯನಿ ಜಗದ್ವನ್ದ್ಯೇ ಮಹಾಕಾಲಿ ನಮೋಸ್ತುತೇ ..

ಮತ್ಪ್ರಾಣರಕ್ಷಣಕೃತೇ ಭೀನಾಶಯ ದಿವೌಕಸಾಮ್ .
ಸ್ವರೂಪಂ ದರ್ಶಯಾಮುಷ್ಮೈ ವಿಲ್ವವೃಕ್ಷಾದ್ ವಿನಿಃಸೃತಾ ..

ದಶಭುಜಾ ಕಾತ್ಯಾಯನೀ ಧ್ಯಾನಮ್ .
ಜಟಾಜೂಟಸಮಾಯುಕ್ತಾಮರ್ಧೇನ್ದುಕೃತ ಲಕ್ಷಣಾಮ್ .
ನೇತ್ರತ್ರಯಸಮಾಯುಕ್ತಾಂ ಪದ್ಮೇನ್ದುಸದೃಶಾನನಾಮ್ ..

ಅತಸೀಪುಷ್ಪವರ್ಣಾಭಾಂ ಸುಪ್ರತಿಷ್ಠಾಂ ಸುಲೋಚನಾಮ್ .
ನವಯೌವನ ಸಮ್ಪನ್ನಾಂ ಸರ್ವಾಭರಣಭೂಷಿತಾಮ್ ..

ಸುಚಾರುದಶನಾಂ ತದ್ವತ್ಪೀನೋನ್ನತಪಯೋಧರಾಮ್ .
ತ್ರಿಭಙ್ಗಸ್ಥಾನ ಸಂಸ್ಥಾನಾಂ ಮಹಿಷಾಸುರಮರ್ದಿನೀಮ್ ..

ತ್ರಿಶೂಲಂ ದಕ್ಷಿಣೇ ದದ್ಯಾತ್ ಖಡ್ಗಂ ಚಕ್ರಂ ಕ್ರಮಾದಧಃ .
ತೀಕ್ಷ್ಣಂ ಬಾಣಂ ತಥಾ ಶಕ್ತಿಂ ವಾಮತೋಽಪಿ ನಿಬೋಧತ ..

ಖೇಟಕಂ ಪೂರ್ಣಚಾಪಂ ಚ ಪಾಶಮಙ್ಕುಶ ಮೂರ್ಧ್ವತಃ .
ಘಣ್ಟಾಂ ವಾ ಪರಶುಂ ಚಾಪಿ ವಾಮತಃ ಸನ್ನಿವೇಶಯೇತ್ ..

ಅಧಸ್ತಾನ್ಮಹಿಷಂ ತದ್ವಧಿ ಶಿರಸ್ಕಂ ಪ್ರದರ್ಶಯೇತ್ .
ಶಿರಶ್ಚೇದೋದ್ಭವಂ ತದ್ವದ್ದಾನವಂ ಖಡ್ಗಪಾಣಿನಮ್ ..

.. ಷೋಡಶಭುಜಾ ದುರ್ಗಾ ಧ್ಯಾನಮ್ ..

ಕ್ಷೀರೋದಸ್ಯೋತ್ತರೇ ತೀರೇ ವಿಭ್ರತೀ ವಿಪುಲಾಂ ತನುಮ್ .
ಅತಸೀಪುಷ್ಪವರ್ಣಾಭಾ ಜ್ವಲತ್ಕಾಞ್ಚನಕುಣ್ಡಲಾಮ್ ..

ಜಟಾಜೂಟಮಖಣ್ಡೇನ್ದುಮುಕುಟತ್ರಯ ಭೂಷಿತಾ .
ನಾಗಹಾರೇಣ ಸಹಿತಾ ಸ್ವರ್ಣಹಾರ ವಿಭೂಷಿತಾ ..

ಶೂಲಂ ಖಡ್ಗಂ ಚ ಶಙ್ಖ ಚ ಚಕ್ರಂ ಬಾಣಂ ತಥೈವ ಚ .
ಶಕ್ತಿಂ ವಜ್ರಂ ಚ ದಣ್ಡಂ ಚ ನಿತ್ಯಂ ದಕ್ಷಿಣಬಾಹುಭಿಃ ..

ವಿಭ್ರತೀ ಸತತಂ ದೇವೀ ವಿಕಾಶಿನಯನೋಜ್ಜ್ವಲಾ .
ಖೇಟಕಂ ಚರ್ಮ ಚಾಪಂ ಚ ಪಾಶಞ್ಚಾಙ್ಕುಶಮೇವ ಚ ..

ಘಣ್ಟಾಂ ಪರಶುಂ ಮುಶಲಂ ವಿಭ್ರತೋ ವಾಮಪಾಣಿಭಿಃ .
ಸಿಂಹಸ್ಥಾ ನಯನೈ ರಕ್ತವರ್ಣೈಸ್ತ್ರಿಭಿರಭಿಜ್ಜ್ವಲಾ ..

ಶೂಲೇನ ಮಹಿಷಂ ಭಿತ್ತ್ವಾ ತಿಷ್ಠತೀ ಪರಮೇಶ್ವರೀ .
ವಾಮಪಾದೇನ ಚಾಕ್ರಮ್ಯ ತತ್ರ ದೇವೀ ಜಗನ್ಮಯೀ ..

ಅಷ್ಟಾದಶಭುಜಾ ದುರ್ಗಾ ಧ್ಯಾನಮ್ .

ಅಕ್ಷಸ್ರಕ್ಪರಶುಂ ಗದೇಷುಕುಲಿಶಂ ಪದ್ಮಂ ಧನುಃಕುಣ್ಡಿಕಾಂ
ದಣ್ಡಂ ಶಕ್ತಿಮಸಿಂ ಚ ಚರ್ಮ ಜಲಜಂ ಘಣ್ಟಾಂ ಸುರಾಭಾಜನಮ್ ... ೧..

ಶೂಲಂ ಪಾಶ ಸುದರ್ಶನೇ ಚ ದಧತೀಂ ಹಸ್ತೈಃ ಪ್ರಸನ್ನಾನನಾಂ
ಸೇವೇ ಸೈರಿಭಮರ್ದಿನೀಮಿಹ ಮಹಾಲಕ್ಷ್ಮೀ ಸರೋಜಸ್ಥಿತಾಮ್ .. ೨..

ಅನ್ಯಚ್ಚ .
ತತೋ ಧ್ಯಾಯೇನ್ಮಹಾಲಕ್ಷ್ಮೀ ಮಹಿಷಾಸುರಮರ್ದಿನೀಮ್ .
ಸಮಸ್ತದೇವತಾ ತೇಜೋಜಾತಾಂ ಪದ್ಮಾಸನ ಸ್ಥಿತಾಮ್ ..

ಅಷ್ಟಾದಶಭುಜಾಮಕ್ಷಮಾಲಾಂ ಪದ್ಮಂ ಚ ಶಾಯಕಾನ್ .
ಖಡ್ಗಂ ವಜ್ರಂ ಗದಾಂ ಚಕ್ರಂ ದಕ್ಷಹಸ್ತೇ ಕಮಣ್ಡಲುಮ್ ..

ಖಡ್ಗಂ ಚ ದಧತೀಂ ವಾಮೇ ಶಕ್ತಿಂ ಚ ಪರಶುಂ ಧನುಃ .
ಚರ್ಮದಣ್ಡೌ ಸುರಾಪಾತ್ರಂ ಘಣ್ಟಾಂ ಪಾಶಂ ತ್ರಿಶೂಲಕಮ್ ..

ಅಷ್ಟಾದಶಭುಜಾ ಧ್ಯಾನಮ್ .
ಧಮ್ಮಿಲ್ಲಸಂಯತಕಚಾ ವಿಧೋಶ್ಚಾಧೋಮುಖೀಂ ಕಲಾಮ್ .
ಕೇಶಾನ್ತೇ ತಿಲಕಸ್ಯೋದ್ಧೇ ದಧತೀ ಸುಮನೋಹರಾ ..

ಮಣಿಕುಣ್ಡಲ ಸನ್ಧೃಷ್ಟಗಣ್ಡಾ ಮುಕುಟಮಣ್ಡಿತಾ .
ಸಜ್ಜ್ಯೋತಿಃ ಕರ್ಣಪೂರಾಭ್ಯಾಂ ಕರ್ಣಾವಾಪೂರ್ಯ ಸಙ್ಗತಾ ..

ಸಸುವರ್ಣಮಣಿಮಾಣಿಕ್ಯ ನಾಗಹಾರ ವಿರಾಜಿತಾ .
ಸದಾಸುಧಿಭಿಃ ಪದ್ಮೈರಮ್ಲಾನೈರತಿ ಸುನ್ದರೀ ..

ಮಾಲಾಂ ವಿಭರ್ತಿ ಗ್ರೀವಾಯಾಂ ರತ್ನಕೇಯೂರಧಾರಿಣೀ .
ಮೃಣಾಲಾಯತ ವೃತ್ತೈಸ್ತು ಬಾಹುಭಿಃ ಕೋಮಲೈ ಶುಭೈಃ ..

ರಾಜನ್ತೀ ಕಞ್ಜುಕೋಪೇತಾ ಪೀನೋನ್ನತ ಪಯೋಧರಾ .
ಕ್ಷೀಣಮಧ್ಯಾ ಪೀತವಸ್ತ್ರಾ ತ್ರಿವಲೋಮಧ್ಯಭೂಷಿತಾ ..

ಅಷ್ಟಾದಶಭುಜೈಕಾ ತು ದಕ್ಷೇ ಮುಣ್ಡಂ ಚ ಖೇಟಕಮ್ .
ಆದರ್ಶಂ ತರ್ಜನೀಂ ಚಾಪ ಧ್ವಜಂ ಡಮರುಕಂ ಚರ್ಮಂ ಚ ..

ಪಾಶಂ ವಾಮೇ ವಿಭ್ರತೀ ಚ ಶಕ್ತಿ ಮುದ್ಗರ ಶೂಲಕಮ್ .
ವಜ್ರ ಖಡ್ಗಾಙ್ಕುಶ ಶರಾಂಶ್ಚಕ್ರಂ ದೇವೀ ಶಲಾಕಯಾ ..

ಸಿಂಹೋಸ್ಯೋಪರಿ ತಿಷ್ಠನ್ತೀ ವ್ಯಾಘ್ರಚರ್ಮಣಿ ಕೌಶಿಕೀ .
ವಿಭ್ರತೀ ರೂಪಮಮತುಲಂ ಸಸುರಾಸುರ ಮೋಹನಮ್ ..

ಅಕ್ಷಮಾಲಾ ಚ ಕಮಲಂ ವಾಣೋಽಸಿ ಕುಲಿಶಂ ಗದಾ .
ಚಕ್ರಂ ತ್ರಿಶೂಲಂ ಪರಶುಃ ಶಙ್ಖೋ ಘಣ್ಟಾ ಚ ಪಾಶಕಃ ..

ಶಕ್ತಿರ್ದಣ್ಡಶ್ಚರ್ಮ ಚಾಪಂ ಪಾನಪಾತ್ರಂ ಕಮಣ್ಡಲುಃ .
ಅಲಙ್ಕೃತಭುಜಾಮೇಭಿರಾಯುಧೈಃ ಕಮಲಾಸನಮ್ ..

ಇತಿ ಕಾತ್ಯಾಯನೀಋಷಿಕೃತಾ ಕಾತ್ಯಾಯನೀಸ್ತುತಿಃ