దేవర్షిభిః ప్రోక్తా ధూమ్రవర్ణస్తుతిః

ధూమ్రవర్ణ-గణేశస్తుతిః దేవర్షిభిః ప్రోక్తా
శివ ఉవాచ -
శాన్తిరూపధరం పూర్ణం గాణేశాహఙ్కృతిస్థితమ్ .
అహం దృష్ట్వా సురా విప్రా విస్మితా అభవన్ ద్విజాః . 1
తతస్తే ధూమ్రవర్ణం వై పుపూజుర్భక్తిసంయుతాః .
పునః ప్రణమ్య తం సర్వే తూష్టువుః కరసమ్పుటాః .. 2..

దేవర్షయ ఊచుః
అజాయాథ సర్వాదిపూజ్యాయ నిత్యం నిరాలమ్బనేతి స్వరూపాయ ఢుణ్ఢే ! .
సదాఽవ్యక్తరూపాయ సర్వాన్తగాయ నమో ధూమ్రవర్ణాయ సర్వేశ్వరాయ .. 3..

సదా మోహహీనాయ మోహప్రదాయ జనేభ్యః ప్రభో! మోహహన్త్రే నిజానామ్ .
మహానన్దత్రైవిధ్యభావైః పరేశ! నమో ధూమ్రవర్ణాయ సర్వేశ్వరాయ .. 4..

నమః సిద్విబుద్ధిప్రదాత్రే గణేశ! పురే వాసకారిన్! స్వసంవేద్యనామ్ని .
అనాథాయ నాథాయ సర్వేశ్వరాణాం నమో ధూమ్రవర్ణాయ సర్వేశ్వరాయ .. 5..

సదా స్వేచ్ఛయా ఖేలకారాయ తుభ్యం సగౌణాయ నైర్గుణ్యభావాయ బ్రహ్మన్! .
మహాఽఽఖుధ్వజాయాఽథ హేరమ్బకాయ నమో ధూమ్రవర్ణాయ సర్వేశ్వరాయ .. 6..

గజాకారతుణ్డాయ లమ్బోదరాయ త్రినేత్రాయ శూర్పశ్రుతిక్షోభకారిన్! .
మదాసక్తయోగీన్ద్ర! భృఙ్గాత్మకానాం నమో ధూమ్రవర్ణాయ సర్వేశ్వరాయ .. 7..

చతుర్బాహవే చైకదన్తాయ తుభ్యం విచిత్రైరనర్ఘైస్తు సమ్భూషితాయ .
అలఙ్కారకైర్దేవదేవేశ! పాత్రే నమో ధూమ్రవర్ణాయ సర్వేశ్వరాయ .. 8..

త్వయా సృష్టమాద్యం సమం సర్వభావయుతం మోహదం మాయినాం నన్దనాద్వై .
తదాకారరూపేణ తత్స్థాయ భూమ్నే నమో ధూమ్రవర్ణాయ సర్వేశ్వరాయ .. 9..

త్వయా ప్రేరితేనాథ తేనాఽపి సృష్టం సదాత్మస్వరూపం పరం జీవనం యత్ .
అభేదాత్మకం తత్ర సంస్థాయ తుభ్యం నమో ధూమ్రవర్ణాయ సర్వేశ్వరాయ .. 10..

తత్స్తేన సృష్టం సదా భేదకానాం నిజం దైవతం బ్రహ్మభావేన తత్స్థమ్ .
తదాకారరూపేణ తత్స్థాయ బ్రహ్మన్! నమో ధూమ్రవర్ణాయ సర్వేశ్వరాయ .. 11..

అసద్భావయుక్తేన సృష్టం విదేహం పరం బ్రహ్మ సాఙ్ఖ్యాత్మకం మూలబీజమ్ .
త్వయా ప్రేరితేనాత్ర వాసప్రదాయిన్నమో ధూమ్రవర్ణాయ సర్వేశ్వరాయ .. 12..

స్వతోత్థానరూపం విదేహేన సృష్టం త్వదీయప్రబోధేన విఘ్నేశ్వరాయ .
తదాకారరూపాయ తత్రస్థకాయ నమో ధూమ్రవర్ణాయ సర్వేశ్వరాయ .. 13..

తతస్తేన తే సత్తయా సృష్టమాద్యం
సదైకస్వరూపం పరం సోఽహమేవమ్ .
తథా త్వం చ తత్రైవ సంస్థః పరాత్మన్!
నమో ధూమ్రవర్ణాయ సర్వేశ్వరాయ .. 14..

త్వయా ప్రేరితేనాథ తేనైవ సృష్టం చతుర్ణాం ప్రమూలం మహద్బిన్దురూపమ్ .
సదా సాహజేనైవ యోగేన తత్స్థో నమో ధూమ్రవర్ణాయ సర్వేశ్వరాయ .. 15..

తతో నాదరూపం సమం యత్సుషుప్తం పరం సూక్ష్మరూపం తతః స్థూలభావమ్ .
సదా సాహజేనైవ యోగేన తత్స్థో నమో ధూమ్రవర్ణాయ సర్వేశ్వరాయ .. 16..

నమో విశ్వరూపాయ సర్వాకరాయ హ్యనన్తాననాద్యైః సుచిహ్నాయ తుభ్యమ్ .
చరైః స్థావరైర్భోగభోగిన్! నమస్తే నమో ధూమ్రవర్ణాయ సర్వేశ్వరాయ .. 17..

చరాయాఽథ తే స్థావరాయైవ తుభ్యం నమో సృష్టికర్త్రే సుపాత్రే హరాయ .
ప్రకాశాయ సూర్యాయ దేవీమయాయ నమో ధూమ్రవర్ణాయ సర్వేశ్వరాయ .. 18..

నమో దేవపక్షాయ సాధ్యాయ తుభ్యం నరాయాఽథ దేవేద్ర! దేవాత్మకాయ .
దిగీశాయ వృక్షాదిబీజాత్మకాయ నమో ధూమ్రవర్ణాయ సర్వేశ్వరాయ .. 19..

నమః సర్పరూపాయ దైత్యాత్మకాయ సముద్రాదినానాప్రభేదస్థమూర్తే! .
అనన్తైః స్వరూపైః సదా క్రీడసి త్వం నమో ధూమ్రవర్ణాయ సర్వేశ్వరాయ .. 20..

తథాఽపి త్వమేవం తదాకారహీనః సదా సాహజేనైవ యోగేన యోగిన్! .
స్వసత్తాత్మకాయైవ తుభ్యం నమస్తే నమో ధూమ్రవర్ణాయ సర్వేశ్వరాయ .. 21..

అతో వేదవాదా విశేషేణ ధూమ్రా భవన్తి హ్యహో వర్ణితుం తే స్వరూపమ్ .
బుధైః కథ్యసే ధూమ్రవర్ణస్తతస్త్వం నమో ధూమ్రవర్ణాయ సర్వేశ్వరాయ .. 22..

సుశాన్తిం గతా వేదయోగీన్ద్రముఖ్యాస్త్వయి బ్రహ్మనాథే సదా ధూమ్రవర్ణమ్ .
వయం కిం స్తువీమోఽల్పబోధా నమస్తే నమో ధూమ్రవర్ణాయ సర్వేశ్వరాయ .. 23..

ధూమ్రవర్ణ ఉవాచ -
స్తోత్రం భవత్కృతం మే తు భవిష్యతి సుసిద్ధిదమ్ .
బ్రహ్మభూయకరం విప్రా భవిష్యతి న సంశయః .. 26..

పుత్రపౌత్రకలత్రాది సౌఖదం ధనధాన్యదమ్ .
ఆయురారోగ్యకైశ్వర్యదాయకం ప్రభవిష్యతి .. 27..

పఠతే శృణ్వతే దేవా నానాభావప్రపూరకమ్ .
ధర్మార్థకామమోక్షాణాం దాయకం భజతామిదమ్ .. 28..

మారణోచ్చాటనాదీని హ్యేకవింశతిపాఠతః .
ఏకవింశతిభిర్నిత్యం దివసైః ప్రభవన్తి హి .. 29..

పరకృత్యాదికం సర్వం నాశమేతి న సంశయః .
అనేన స్తోత్రముఖ్యేన స్తువతః సర్వదా ద్విజాః .. 30..

యం యం చిన్తయేత్ కామం తం తం దాస్యామి సర్వదా .
స్తుతోఽనేన మహాదేవాః స్తోత్రేణ తుష్టిమాగతః .. 31..

ఇతి దేవర్షిభిఃప్రోక్తా ధూమ్రవర్ణస్తుతిః సమాప్తా . 8.8