.. దక్షిణామూర్తిస్తోత్రమ్ ..
ఉపాసకానాం యదుపాసనీయమ్
ఉపాత్తవాసం వటశాఖిమూలే.
తద్ధామ దాక్షిణ్యజుషా స్వమూర్త్యా
జాగర్తు చిత్తే మమ బోధరూపమ్..1..
అద్రాక్షమక్షీణదయానిధానమ్
ఆచార్యమాద్యం వటమూలభాగే.
మౌనేన మన్దస్మితభూషితేన
మహర్షి లోకస్య తమో నుదన్తమ్..2..
విద్రావితాశేష-తమోగుణేన
ముద్రావిశేషేణ ముహుర్మునీనామ్.
నిరస్య మాయాం దయయా విధత్తే
దేవో మహాంస్తత్త్వమసీతి బోధమ్..3..
అపారకారుణ్యసుధాతరఙ్గైః
అపాఙ్గపాతైరవలోకయన్తమ్.
కఠోరసంసారనిదాఘతప్తాన్
మునీనహం నౌమి గురుం గురూణామ్..4..
మమాద్యదేవో వటమూలవాసీ
కృపావిశేషాత్కృతసన్నిధానః.
ఓంకారరూపాముపదిశ్య విద్యామ్
ఆవిద్యకధ్వాన్తమపాకరోతు..5..
కలాభిరిన్దోరివ కల్పితాఙ్గం
ముక్తాకలాపైరివ బద్ధమూర్తిమ్.
ఆలోకయే దేశికమప్రమేయమ్
అనాద్యవిద్యాతిమిరప్రభాతమ్..6..
స్వదక్షజానుస్థితవామపాదమ్
పాదోదరాలఙ్కృతయోగపట్టమ్.
అపస్మృతేరాహితపాదమఙ్గే
ప్రణౌమి దేవం ప్రణిధానవన్తమ్..7..
తత్త్వార్థమన్తేవసతామృషీణామ్
యువాఽపి యః సన్నుపదేష్టుమీష్టే.
ప్రణౌమి తం ప్రాక్తనపుణ్యజాలైః
ఆచార్యమాశ్చర్యగుణాధివాసమ్..8..
ఏకేన ముద్రాం పరశుం కరేణ
కరేణ చాన్యేన మృగం దధానః.
స్వజానువిన్యస్తకరః పురస్తాత్
ఆచార్యచూడామణిరావిరస్తు..9..
ఆలేపవన్తం మదనాఙ్గభూత్యా
శార్దూలకృత్త్యా పరిధానవన్తమ్.
ఆలోకయే కఞ్చనదేశికేన్ద్రమ్
అజ్ఞానవారాకరబాడవాగ్నిమ్..10..
చారుస్మితం సోమకలావతంసమ్
వీణాధరం వ్యక్తజటాకలాపమ్.
ఉపాసతే కేచన యోగినస్త్వామ్
ఉపాత్తనాదానుభవప్రమోదమ్..11..
ఉపాసతే యం మునయః శుకాద్యాః
నిరాశిషో నిర్మమతాధివాసాః.
తం దక్షిణామూర్తితనుం మహేశమ్
ఉపాస్మహే మోహమహార్తిశాన్త్యై..12..
కాన్త్యా నిన్దితకున్దకన్దలవపుర్న్యగ్రోధమూలే వసన్
కారుణ్యామృతవారిభిర్మునిజనం సమ్భావయన్ వీక్షితైః.
మోహధ్వాన్తవిభేదనం విరచయన్ బోధేన తత్తాదృశా
దేవస్తత్త్వమసీతి బోధయతు మాం ముద్రావతా పాణినా..13..
అగౌరగాత్రైరలలాటనేత్రైః
అశాన్తవేషైరభుజఙ్గభూషైః.
అబోధముద్రైరనపాస్తనిద్రైః
అపూర్ణకామైరమరైరలం నః..14..
దైవతాని కతి సన్తి చావనౌ
నైవ తాని మనసో మతాని మే.
దీక్షితం జడధియామనుగ్రహే
దక్షిణాభిముఖమేవ దైవతమ్..15..
ముదితాయ ముగ్ధశశినావతంసినే
భసితావలేపరమణీయమూర్తయే.
జగదీన్ద్రజాలరచనాపటీయసే
మహసే నమోఽస్తు వటమూలవాసినే..16..
వ్యాలమ్బినీభిః పరితో జటాభిః
కలావశేషేణ కలాధరేణ.
పశ్యల్లలాటేన ముఖేన్దునా చ
ప్రకాశసే చేతసి నిర్మలానామ్..17..
ఉపాసకానాం త్వముమాసహాయః
పూర్ణేన్దుభావం ప్రకటీకరోషి.
యదద్య తే దర్శనమాత్రతో మే
ద్రవత్యహో మానసచన్ద్రకాన్తః..18..
యస్తే ప్రసన్నామనుసన్దధానో
మూర్తిం ముదా ముగ్ధశశాఙ్కమౌలేః.
ఐశ్వర్యమాయుర్లభతే చ విద్యామ్
అన్తే చ వేదాన్తమహారహస్యమ్..19..