.. த₃க்ஷிணாமூர்திஸ்தோத்ரம் ..
உபாஸகாநாம் யது₃பாஸநீயம்
உபாத்தவாஸம் வடஶாகி₂மூலே.
தத்₃தா₄ம தா₃க்ஷிண்யஜுஷா ஸ்வமூர்த்யா
ஜாக₃ர்து சித்தே மம போ₃த₄ரூபம்..1..
அத்₃ராக்ஷமக்ஷீணத₃யாநிதா₄நம்
ஆசார்யமாத்₃யம் வடமூலபா₄கே₃.
மௌநேந மந்த₃ஸ்மிதபூ₄ஷிதேந
மஹர்ஷி லோகஸ்ய தமோ நுத₃ந்தம்..2..
வித்₃ராவிதாஶேஷ-தமோகு₃ணேந
முத்₃ராவிஶேஷேண முஹுர்முநீநாம்.
நிரஸ்ய மாயாம் த₃யயா வித₄த்தே
தே₃வோ மஹாம்ஸ்தத்த்வமஸீதி போ₃த₄ம்..3..
அபாரகாருண்யஸுதா₄தரங்கை₃꞉
அபாங்க₃பாதைரவலோகயந்தம்.
கடோ₂ரஸம்ஸாரநிதா₃க₄தப்தாந்
முநீநஹம் நௌமி கு₃ரும் கு₃ரூணாம்..4..
மமாத்₃யதே₃வோ வடமூலவாஸீ
க்ருபாவிஶேஷாத்க்ருதஸந்நிதா₄ந꞉.
ஓம்காரரூபாமுபதி₃ஶ்ய வித்₃யாம்
ஆவித்₃யகத்₄வாந்தமபாகரோது..5..
கலாபி₄ரிந்தோ₃ரிவ கல்பிதாங்க₃ம்
முக்தாகலாபைரிவ ப₃த்₃த₄மூர்திம்.
ஆலோகயே தே₃ஶிகமப்ரமேயம்
அநாத்₃யவித்₃யாதிமிரப்ரபா₄தம்..6..
ஸ்வத₃க்ஷஜாநுஸ்தி₂தவாமபாத₃ம்
பாதோ₃த₃ராலங்க்ருதயோக₃பட்டம்.
அபஸ்ம்ருதேராஹிதபாத₃மங்கே₃
ப்ரணௌமி தே₃வம் ப்ரணிதா₄நவந்தம்..7..
தத்த்வார்த₂மந்தேவஸதாம்ருஷீணாம்
யுவா(அ)பி ய꞉ ஸந்நுபதே₃ஷ்டுமீஷ்டே.
ப்ரணௌமி தம் ப்ராக்தநபுண்யஜாலை꞉
ஆசார்யமாஶ்சர்யகு₃ணாதி₄வாஸம்..8..
ஏகேந முத்₃ராம் பரஶும் கரேண
கரேண சாந்யேந ம்ருக₃ம் த₃தா₄ந꞉.
ஸ்வஜாநுவிந்யஸ்தகர꞉ புரஸ்தாத்
ஆசார்யசூடா₃மணிராவிரஸ்து..9..
ஆலேபவந்தம் மத₃நாங்க₃பூ₄த்யா
ஶார்தூ₃லக்ருத்த்யா பரிதா₄நவந்தம்.
ஆலோகயே கஞ்சநதே₃ஶிகேந்த்₃ரம்
அஜ்ஞாநவாராகரபா₃ட₃வாக்₃நிம்..10..
சாருஸ்மிதம் ஸோமகலாவதம்ஸம்
வீணாத₄ரம் வ்யக்தஜடாகலாபம்.
உபாஸதே கேசந யோகி₃நஸ்த்வாம்
உபாத்தநாதா₃நுப₄வப்ரமோத₃ம்..11..
உபாஸதே யம் முநய꞉ ஶுகாத்₃யா꞉
நிராஶிஷோ நிர்மமதாதி₄வாஸா꞉.
தம் த₃க்ஷிணாமூர்திதநும் மஹேஶம்
உபாஸ்மஹே மோஹமஹார்திஶாந்த்யை..12..
காந்த்யா நிந்தி₃தகுந்த₃கந்த₃லவபுர்ந்யக்₃ரோத₄மூலே வஸந்
காருண்யாம்ருதவாரிபி₄ர்முநிஜநம் ஸம்பா₄வயந் வீக்ஷிதை꞉.
மோஹத்₄வாந்தவிபே₄த₃நம் விரசயந் போ₃தே₄ந தத்தாத்₃ருஶா
தே₃வஸ்தத்த்வமஸீதி போ₃த₄யது மாம் முத்₃ராவதா பாணிநா..13..
அகௌ₃ரகா₃த்ரைரலலாடநேத்ரை꞉
அஶாந்தவேஷைரபு₄ஜங்க₃பூ₄ஷை꞉.
அபோ₃த₄முத்₃ரைரநபாஸ்தநித்₃ரை꞉
அபூர்ணகாமைரமரைரலம் ந꞉..14..
தை₃வதாநி கதி ஸந்தி சாவநௌ
நைவ தாநி மநஸோ மதாநி மே.
தீ₃க்ஷிதம் ஜட₃தி₄யாமநுக்₃ரஹே
த₃க்ஷிணாபி₄முக₂மேவ தை₃வதம்..15..
முதி₃தாய முக்₃த₄ஶஶிநாவதம்ஸிநே
ப₄ஸிதாவலேபரமணீயமூர்தயே.
ஜக₃தீ₃ந்த்₃ரஜாலரசநாபடீயஸே
மஹஸே நமோ(அ)ஸ்து வடமூலவாஸிநே..16..
வ்யாலம்பி₃நீபி₄꞉ பரிதோ ஜடாபி₄꞉
கலாவஶேஷேண கலாத₄ரேண.
பஶ்யல்லலாடேந முகே₂ந்து₃நா ச
ப்ரகாஶஸே சேதஸி நிர்மலாநாம்..17..
உபாஸகாநாம் த்வமுமாஸஹாய꞉
பூர்ணேந்து₃பா₄வம் ப்ரகடீகரோஷி.
யத₃த்₃ய தே த₃ர்ஶநமாத்ரதோ மே
த்₃ரவத்யஹோ மாநஸசந்த்₃ரகாந்த꞉..18..
யஸ்தே ப்ரஸந்நாமநுஸந்த₃தா₄நோ
மூர்திம் முதா₃ முக்₃த₄ஶஶாங்கமௌலே꞉.
ஐஶ்வர்யமாயுர்லப₄தே ச வித்₃யாம்
அந்தே ச வேதா₃ந்தமஹாரஹஸ்யம்..19..