.. ದಕ್ಷಿಣಾಮೂರ್ತಿಸ್ತೋತ್ರಮ್ ..

ಉಪಾಸಕಾನಾಂ ಯದುಪಾಸನೀಯಮ್
ಉಪಾತ್ತವಾಸಂ ವಟಶಾಖಿಮೂಲೇ.
ತದ್ಧಾಮ ದಾಕ್ಷಿಣ್ಯಜುಷಾ ಸ್ವಮೂರ್ತ್ಯಾ
ಜಾಗರ್ತು ಚಿತ್ತೇ ಮಮ ಬೋಧರೂಪಮ್..೧..

ಅದ್ರಾಕ್ಷಮಕ್ಷೀಣದಯಾನಿಧಾನಮ್
ಆಚಾರ್ಯಮಾದ್ಯಂ ವಟಮೂಲಭಾಗೇ.
ಮೌನೇನ ಮನ್ದಸ್ಮಿತಭೂಷಿತೇನ
ಮಹರ್ಷಿ ಲೋಕಸ್ಯ ತಮೋ ನುದನ್ತಮ್..೨..

ವಿದ್ರಾವಿತಾಶೇಷ-ತಮೋಗುಣೇನ
ಮುದ್ರಾವಿಶೇಷೇಣ ಮುಹುರ್ಮುನೀನಾಮ್.
ನಿರಸ್ಯ ಮಾಯಾಂ ದಯಯಾ ವಿಧತ್ತೇ
ದೇವೋ ಮಹಾಂಸ್ತತ್ತ್ವಮಸೀತಿ ಬೋಧಮ್..೩..

ಅಪಾರಕಾರುಣ್ಯಸುಧಾತರಙ್ಗೈಃ
ಅಪಾಙ್ಗಪಾತೈರವಲೋಕಯನ್ತಮ್.
ಕಠೋರಸಂಸಾರನಿದಾಘತಪ್ತಾನ್
ಮುನೀನಹಂ ನೌಮಿ ಗುರುಂ ಗುರೂಣಾಮ್..೪..

ಮಮಾದ್ಯದೇವೋ ವಟಮೂಲವಾಸೀ
ಕೃಪಾವಿಶೇಷಾತ್ಕೃತಸನ್ನಿಧಾನಃ.
ಓಂಕಾರರೂಪಾಮುಪದಿಶ್ಯ ವಿದ್ಯಾಮ್
ಆವಿದ್ಯಕಧ್ವಾನ್ತಮಪಾಕರೋತು..೫..

ಕಲಾಭಿರಿನ್ದೋರಿವ ಕಲ್ಪಿತಾಙ್ಗಂ
ಮುಕ್ತಾಕಲಾಪೈರಿವ ಬದ್ಧಮೂರ್ತಿಮ್.
ಆಲೋಕಯೇ ದೇಶಿಕಮಪ್ರಮೇಯಮ್
ಅನಾದ್ಯವಿದ್ಯಾತಿಮಿರಪ್ರಭಾತಮ್..೬..

ಸ್ವದಕ್ಷಜಾನುಸ್ಥಿತವಾಮಪಾದಮ್
ಪಾದೋದರಾಲಙ್ಕೃತಯೋಗಪಟ್ಟಮ್.
ಅಪಸ್ಮೃತೇರಾಹಿತಪಾದಮಙ್ಗೇ
ಪ್ರಣೌಮಿ ದೇವಂ ಪ್ರಣಿಧಾನವನ್ತಮ್..೭..

ತತ್ತ್ವಾರ್ಥಮನ್ತೇವಸತಾಮೃಷೀಣಾಮ್
ಯುವಾಽಪಿ ಯಃ ಸನ್ನುಪದೇಷ್ಟುಮೀಷ್ಟೇ.
ಪ್ರಣೌಮಿ ತಂ ಪ್ರಾಕ್ತನಪುಣ್ಯಜಾಲೈಃ
ಆಚಾರ್ಯಮಾಶ್ಚರ್ಯಗುಣಾಧಿವಾಸಮ್..೮..

ಏಕೇನ ಮುದ್ರಾಂ ಪರಶುಂ ಕರೇಣ
ಕರೇಣ ಚಾನ್ಯೇನ ಮೃಗಂ ದಧಾನಃ.
ಸ್ವಜಾನುವಿನ್ಯಸ್ತಕರಃ ಪುರಸ್ತಾತ್
ಆಚಾರ್ಯಚೂಡಾಮಣಿರಾವಿರಸ್ತು..೯..

ಆಲೇಪವನ್ತಂ ಮದನಾಙ್ಗಭೂತ್ಯಾ
ಶಾರ್ದೂಲಕೃತ್ತ್ಯಾ ಪರಿಧಾನವನ್ತಮ್.
ಆಲೋಕಯೇ ಕಞ್ಚನದೇಶಿಕೇನ್ದ್ರಮ್
ಅಜ್ಞಾನವಾರಾಕರಬಾಡವಾಗ್ನಿಮ್..೧೦..

ಚಾರುಸ್ಮಿತಂ ಸೋಮಕಲಾವತಂಸಮ್
ವೀಣಾಧರಂ ವ್ಯಕ್ತಜಟಾಕಲಾಪಮ್.
ಉಪಾಸತೇ ಕೇಚನ ಯೋಗಿನಸ್ತ್ವಾಮ್
ಉಪಾತ್ತನಾದಾನುಭವಪ್ರಮೋದಮ್..೧೧..

ಉಪಾಸತೇ ಯಂ ಮುನಯಃ ಶುಕಾದ್ಯಾಃ
ನಿರಾಶಿಷೋ ನಿರ್ಮಮತಾಧಿವಾಸಾಃ.
ತಂ ದಕ್ಷಿಣಾಮೂರ್ತಿತನುಂ ಮಹೇಶಮ್
ಉಪಾಸ್ಮಹೇ ಮೋಹಮಹಾರ್ತಿಶಾನ್ತ್ಯೈ..೧೨..

ಕಾನ್ತ್ಯಾ ನಿನ್ದಿತಕುನ್ದಕನ್ದಲವಪುರ್ನ್ಯಗ್ರೋಧಮೂಲೇ ವಸನ್
ಕಾರುಣ್ಯಾಮೃತವಾರಿಭಿರ್ಮುನಿಜನಂ ಸಮ್ಭಾವಯನ್ ವೀಕ್ಷಿತೈಃ.
ಮೋಹಧ್ವಾನ್ತವಿಭೇದನಂ ವಿರಚಯನ್ ಬೋಧೇನ ತತ್ತಾದೃಶಾ
ದೇವಸ್ತತ್ತ್ವಮಸೀತಿ ಬೋಧಯತು ಮಾಂ ಮುದ್ರಾವತಾ ಪಾಣಿನಾ..೧೩..

ಅಗೌರಗಾತ್ರೈರಲಲಾಟನೇತ್ರೈಃ
ಅಶಾನ್ತವೇಷೈರಭುಜಙ್ಗಭೂಷೈಃ.
ಅಬೋಧಮುದ್ರೈರನಪಾಸ್ತನಿದ್ರೈಃ
ಅಪೂರ್ಣಕಾಮೈರಮರೈರಲಂ ನಃ..೧೪..

ದೈವತಾನಿ ಕತಿ ಸನ್ತಿ ಚಾವನೌ
ನೈವ ತಾನಿ ಮನಸೋ ಮತಾನಿ ಮೇ.
ದೀಕ್ಷಿತಂ ಜಡಧಿಯಾಮನುಗ್ರಹೇ
ದಕ್ಷಿಣಾಭಿಮುಖಮೇವ ದೈವತಮ್..೧೫..

ಮುದಿತಾಯ ಮುಗ್ಧಶಶಿನಾವತಂಸಿನೇ
ಭಸಿತಾವಲೇಪರಮಣೀಯಮೂರ್ತಯೇ.
ಜಗದೀನ್ದ್ರಜಾಲರಚನಾಪಟೀಯಸೇ
ಮಹಸೇ ನಮೋಽಸ್ತು ವಟಮೂಲವಾಸಿನೇ..೧೬..

ವ್ಯಾಲಮ್ಬಿನೀಭಿಃ ಪರಿತೋ ಜಟಾಭಿಃ
ಕಲಾವಶೇಷೇಣ ಕಲಾಧರೇಣ.
ಪಶ್ಯಲ್ಲಲಾಟೇನ ಮುಖೇನ್ದುನಾ ಚ
ಪ್ರಕಾಶಸೇ ಚೇತಸಿ ನಿರ್ಮಲಾನಾಮ್..೧೭..

ಉಪಾಸಕಾನಾಂ ತ್ವಮುಮಾಸಹಾಯಃ
ಪೂರ್ಣೇನ್ದುಭಾವಂ ಪ್ರಕಟೀಕರೋಷಿ.
ಯದದ್ಯ ತೇ ದರ್ಶನಮಾತ್ರತೋ ಮೇ
ದ್ರವತ್ಯಹೋ ಮಾನಸಚನ್ದ್ರಕಾನ್ತಃ..೧೮..

ಯಸ್ತೇ ಪ್ರಸನ್ನಾಮನುಸನ್ದಧಾನೋ
ಮೂರ್ತಿಂ ಮುದಾ ಮುಗ್ಧಶಶಾಙ್ಕಮೌಲೇಃ.
ಐಶ್ವರ್ಯಮಾಯುರ್ಲಭತೇ ಚ ವಿದ್ಯಾಮ್
ಅನ್ತೇ ಚ ವೇದಾನ್ತಮಹಾರಹಸ್ಯಮ್..೧೯..