జాబాలోపనిషత్

ఓం శాన్తిః శాన్తిః శాన్తిః ..

ఓం బృహస్పతిరువాచ యాజ్ఞవల్క్యం యదను కురుక్షేత్రం దేవానాం దేవయజనం సర్వేషాం భూతానాం బ్రహ్మసదనమ్ . అవిముక్తం వై కురుక్షేత్రం దేవానాం దేవయజనం సర్వేషాం భూతానాం బ్రహ్మసదనమ్ . తస్మాద్యత్ర క్వచన గచ్ఛతి తదేవ మన్యేత తదవిముక్తమేవ .ఇదం వై కురుక్షేత్రం దేవానాం దేవయజనం సర్వేషాం భూతానాం బ్రహ్మసదనమ్ .. అత్ర హి జన్తోః ప్రాణేషూత్క్రమమాణేషు రుద్రస్తారకం బ్రహ్మ వ్యాచష్టే యేనాసావమృతీ భూత్వా మోక్షీ భవతి తస్మాదవిముక్తమేవ నిషేవేత అవిముక్తం న విముఞ్చేదేవమేవైతద్యాజ్ఞవల్క్యః .. 1..

అథ హైనమత్రిః పప్రచ్ఛ యాజ్ఞవల్క్యం య ఏషోఽనన్తోఽవ్యక్త ఆత్మా తం కథమహం విజానీయామితి .. స హోవాచ యాజ్ఞవల్క్యః సోఽవిముక్త ఉపాస్యో య ఏషోఽనన్తోఽవ్యక్త ఆత్మా సోఽవిముక్తే ప్రతిష్ఠిత ఇతి .. సోఽవిముక్తః కస్మిన్ప్రతిష్ఠిత ఇతి . వరణాయాం నాశ్యాం చ మధ్యే ప్రతిష్ఠిత ఇతి .. కా వై వరణా కా చ నాశీతి . సర్వానిన్ద్రియకృతాన్దోషాన్వారయతీతి తేన వరణా భవతి .. సర్వానిన్ద్రియకృతాన్పాపాన్నాశయతీతి తేన నాశీ భవతీతి .. కతమం చాస్య స్థానం భవతీతి . భ్రువోర్ఘ్రాణస్య చ యః సన్ధిః స ఏష ద్యౌర్లోకస్య పరస్య చ సన్ధిర్భవతీతి . ఏతద్వై సన్ధిం సన్ధ్యాం బ్రహ్మవిద ఉపాసత ఇతి . సోఽవిముక్త ఉపాస్య ఇతి . సోఽవిముక్తం జ్ఞానమాచష్టే . యో వైతదేవం వేదేతి .. 2..

అథ హైనం బ్రహ్మచారిణ ఊచుః కిం జప్యేనామృతత్వం బ్రూహీతి .. స హోవాచ యాజ్ఞవల్క్యః . శతరుద్రియేణేత్యేతాన్యేవ హ వా అమృతస్య నామాని .. ఏతైర్హ వా అమృతో భవతీతి ఏవమేవైతద్యాజ్ఞవల్క్యః .. 3..

అథ హైనం జనకో వైదేహో యాజ్ఞవల్క్యముపసమేత్యోవాచ భగవన్సంన్యాసం బ్రూహీతి . స హోవాచ యాజ్ఞవల్క్యః . బ్రహ్మచర్యం పరిసమాప్య గృహీ భవేత్ . గృహీ భూత్వా వనీ భవేత్ . వనీ భూత్వా ప్రవ్రజేత్ . యది వేతరథా బ్రహ్మచర్యాదేవ ప్రవ్రజేద్గృహాద్వా వనాద్వా .. అథ పునరవ్రతీ వా వ్రతీ వా స్నాతకో వాఽస్నాతకో వోత్సన్నగ్నికో వా యదహరేవ విరజేత్తదహరేవ ప్రవ్రజేత్ .తద్ధైకే ప్రాజాపత్యామేవేష్టి,న్ కుర్వన్తి . తదు తథా న కుర్యాదాగ్నేయీమేవ కుర్యాత్ .. అగ్నిర్హ వై ప్రాణః ప్రాణమేవ తథా కరోతి .. త్రైధాతవీయామేవ కుర్యాత్ . ఏతయైవ త్రయో ధాతవో యదుత సత్త్వం రజస్తమ ఇతి .. అయం తే యోనిరృత్విజో యతో జాతః ప్రాణాదరోచథాః . తం ప్రాణం జానన్నగ్న ఆరోహాథా నో వర్ధయ రయిమ్ . ఇత్యనేన మన్త్రేణాగ్నిమాజిఘ్రేత్ .. ఏష హ వా అగ్నేర్యోనిర్యః ప్రాణః ప్రాణం గచ్ఛ స్వాహేత్యేవమేవైతదాహ .. గ్రామాదగ్నిమాహృత్య పూర్వదగ్నిమాఘ్రాపయేత్ .. యద్యగ్నిం న విన్దేదప్సు జుహుయాత్ . ఆపో వై సర్వా దేవతాః సర్వాభ్యో దేవతాభ్యో జుహోమి స్వాహేతి హుత్వోధృత్య ప్రాశ్నీయాత్సాజ్యం హవిరనామయం మోక్షమన్త్రః త్రయ్యైవం వదేత్ ఏతద్బ్రహ్మైతదుపాసితవ్యమ్ . ఏవమేవైతద్భగవన్నితి వై యాజ్ఞవల్క్యః .. 4..

అథ హైనమత్రిః పప్రచ్ఛ యాజ్ఞవల్క్యం పృచ్ఛామి త్వా యాజ్ఞవల్క్య అయజ్ఞోపవీతి కథం బ్రాహ్మణ ఇతి . స హోవాచ యాజ్ఞవల్క్యః . ఇదమేవాస్య తద్యజ్ఞోపవీతం య ఆత్మాపః ప్రాశ్యాచమ్యాయం విధిః పరివ్రాజకానామ్ . వీరాధ్వానే వా అనాశకే వా అపాం ప్రవేశే వా అగ్నిప్రవేశే వా మహాప్రస్థానే వా . అథ పరివ్రాడ్వివర్ణవాసా ముణ్డోఽపరిగ్రహః శుచిరద్రోహీ భైక్షణో బ్రహ్మభూయాయ భవతీతి . యద్యాతురః స్యాన్మనసా వాచా సంన్యసేత్ . ఏష పన్థా బ్రహ్మణా హానువిత్తస్తేనైతి సంన్యాసీ బ్రహ్మవిదిత్యేవమేవైష భగవన్నితి వై యాజ్ఞవల్క్య .. 5..

తత్ర పరమహంసానామసంవర్తకారుణిశ్వేతకేతుదుర్వాసఋభునిదాఘజడ భరతదత్తాత్రేయరైవతక- ప్రభృతయోఽవ్యక్తలిఙ్గా అవ్యక్తాచారా అనున్మత్తా ఉన్మత్తవదాచరన్తస్త్రిదణ్డం కమణ్డలుం శిక్యం పాత్రం జలపవిత్రం శిఖాం యజ్ఞోపవీతం చ ఇత్యేతత్సర్వం భూఃస్వాహేత్యప్సు పరిత్యజ్యాత్మానమన్విచ్ఛేత్ .. యథా జాతరూపధరో నిర్గ్రన్థో నిష్పరిగ్రహస్తత్తద్బ్రహ్మమార్గే సమ్యక్సమ్పన్నః శుద్ధమానసః ప్రాణసన్ధారణార్థం యథోక్తకాలే విముక్తో భైక్షమాచరన్నుదరపాత్రేణ లాభాలాభయోః సమో భూత్వా శూన్యాగారదేవగృహతృణకూటవల్మీకవృక్షమూలకులాలశాలాగ్ని హోత్రగృహనదీపులినగిరికుహరకన్దరకోటరనిర్ఝరస్థణ్డిలేషు తేష్వనికేతవాస్య ప్రయత్నో నిర్మమః శుక్లధ్యానపరాయణోఽధ్యాత్మనిష్ఠోఽశుభకర్మ- నిర్మూలనపరః సంన్యాసేన దేహత్యాగం కరోతి స పరమహంసో నామ పరమహంసో నామేతి .. 6..

ఓం పూర్ణమద ఇతి శాతిః ..

.. ఇత్యథర్వవేదీయా జాబాలోపనిషత్సమాప్తా ..