સનાતન દેવ
.. શ્રીશ્રીરાધિકાસહસ્ત્રનામસ્તોત્રમ્ ..
॥ श्रीश्रीराधिकासहस्त्रनामस्तोत्रम् ॥
श्रीश्रीराधिकासहस्त्रनामस्तोत्रम्
ध्यानम्
हेमाभां द्विभुजां वराभयकरां नीलाम्बरेणावृतां
श्यामक्रोडविलासिनीं भगवतीं सिन्दुरपुञ्जोज्ज्वलाम् ।
लोलाक्षीं नवयौवनां स्मितमुखीं विम्बाधरां राधिकां
नित्यानन्दमयीं विलासनिलयां दिव्याङ्गभूषां भजे ॥
श्रीपार्वत्युवाच
देवदेव जगन्नाथ भक्तानुग्रहकारक ।
यद्यस्ति मयि कारुण्यं यद्यस्ति मयि ते दया ॥ १ ॥
यद्यत् त्वया निगदितं तत्सर्वं मे श्रुतं प्रभो ।
गुह्याद् गुह्यतरं यत्तु यत्ते मनसि काशते ॥ २ ॥
त्वया न गदितं यत्तु यस्मै कस्मै कदाचन ।
तस्मात् कथय देवेश सहस्त्रं नाम चोत्तमम् ॥ ३ ॥
श्रीराधाया महादेव्या गोप्या भक्तिप्रसाधनम् ।
ब्रह्माण्डकर्त्री हर्त्री सा कथं गोपीत्वमागता ॥ ४ ॥
श्रीमहादेव उवाच
श्रृणु देवि विचित्रार्थां कथां पापहरां शुभाम् ।
नास्ति जन्मानि कर्माणि तस्या नूनं महेश्वरि ॥ ५ ॥
यदा हरिश्चरित्राणि कुरुते कार्यगौरवात् ।
तदा विधत्ते रूपाणि हरिसांनिध्यसाधिनी ॥ ६ ॥
तस्या गोपीत्वभावस्य कारणं गदितं पुरा ।
इदानीं श्रृणु देवेशि नाम्नां चैव सहस्त्रकम् ॥ ७ ॥
यन्मया कथितं नैव तन्त्रेष्वपि कदाचन ।
तव स्नेहात् प्रवक्ष्यामि भक्त्या धार्यं मुमुक्षुभिः ॥ ८ ॥
मम प्राणसमा विद्या भाव्यते मे त्वहर्निशम् ।
श्रृणुष्व गिरिजे नित्यं पठस्व च यथामति ॥ ९ ॥
यस्याः प्रसादात् कृष्णस्तु गोलोकेशः परः प्रभुः ।
अस्या नामसहस्त्रस्य ऋषिर्नारद एव च ।
देवी राधा परा प्रोक्ता चतुर्वर्गप्रसाधिनी ॥ १० ॥
स्तोत्रम्
श्रीराधा राधिका कृष्णवल्लभा कृष्णसंयुता ।
वृन्दावनेश्वरी कृष्णप्रिया मदनमोहिनी ॥ ११ ॥
श्रीमती कृष्णकान्ता च कृष्णानन्दप्रदायिनी ।
यशस्विनी यशोगम्या यशोदानन्दवल्लभा ॥ १२ ॥
दामोदरप्रिया गोपी गोपानन्दकरी तथा ।
कृष्णाङ्गवासिनी ह्रद्या हरिकान्ता हरिप्रिया ॥ १३ ॥
प्रधानगोपिका गोपकन्या त्रैलोक्यसुन्दरी ।
वृन्दावनविहारिणी विकसितमुखाम्बुजा ॥ १४ ॥
गोकुलानन्दकर्त्री च गोकुलानन्ददायिनी ।
गतिप्रदा गीतगम्या गमनागमनप्रिया ॥ १५ ॥
विष्णुप्रिया विष्णुकान्ता विष्णोरङ्कनिवासिनी ।
यशोदानन्दपत्नी च यशोदानन्दगेहिनी ॥ १६ ॥
कामारिकान्ता कामेशी कामलालसविग्रहा ।
जयप्रदा जया जीवा जीवानन्दप्रदायिनी ॥ १७ ॥
नन्दनन्दनपत्नी च वृषभानुसुता शिवा ।
गणाध्यक्षा गवाध्यक्षा गवां गतिरनुत्तमा ॥ १८ ॥
काञ्चनाभा हेमगात्रा काञ्चनाङ्गदधारिणी ।
अशोका शोकरहिता विशोका शोकनाशिनी ॥ १९ ॥
गायत्री वेदमाता च वेदातीता विदुत्तमा ।
नीतिशास्त्रप्रिया नीतिर्गतिर्मतिरभीष्टदा ॥ २० ॥
वेदप्रिया वेदगर्भा वेदमार्गप्रवर्धिनी ।
वेदगम्या वेदपरा विचित्रकनकोज्ज्वला ॥ २१ ॥
तथोज्ज्वलप्रदा नित्या तथैवोज्ज्वलगात्रिका ।
नन्दप्रिया नन्दसुताराध्याऽऽनन्दप्रदा शुभा ॥ २२ ॥
शुभाङ्गी विमलाङ्गी च विलासिन्यपराजिता ।
जननी जन्मशून्या च जन्ममृत्युजरापहा ॥ २३ ॥
गतिर्गतिमतां धात्री धात्र्यानन्दप्रदायिनी ।
जगन्नाथप्रिया शैलवासिनी हेमसुन्दरी ॥ २४ ॥
किशोरी कमला पद्मा पद्महस्ता पयोददा ।
पयस्विनी पयोदात्री पवित्रा सर्वमङ्गला ॥ २५ ॥
महाजीवप्रदा कृष्णकान्ता कमलसुन्दरी ।
विचित्रवासिनी चित्रवासिनी चित्ररूपिणी ॥ २६ ॥
निर्गुणा सुकुलीना च निष्कुलीना निराकुला ।
गोकुलान्तरगेहा च योगानन्दकरी तथा ॥ २७ ॥
वेणुवाद्या वेणुरतिर्वेणुवाद्यपरायणा ।
गोपालस्य प्रिया सौम्यरूपा सौम्यकुलोद्वहा ॥ २८ ॥
मोहामोहा विमोहा च गतिनिष्ठा गतिप्रदा ।
गीर्वाणवन्द्या गीर्वाणा गीर्वाणगणसेविता ॥ २९ ॥
ललिता च विशोका च विशाखा चित्रमालिनी ।
जितेन्द्रिया शुद्धसत्त्वा कुलीना कुलदीपिका ॥ ३० ॥
दीपप्रिया दीपदात्री विमला विमलोदका ।
कान्तारवासिनी कृष्णा कृष्णचन्द्रप्रिया मतिः ॥ ३१ ॥
अनुत्तरा दुःखहन्त्री दुःखकर्त्री कुलोद्वहा ।
मतिर्लक्ष्मीर्धृतिर्लज्जा कान्तिः पुष्टिः स्मृतिः क्षमा ॥ ३२ ॥
क्षीरोदशायिनी देवी देवारिकुलमर्दिनी ।
वैष्णवी च महालक्ष्मीः कुलपूज्या कुलप्रिया ॥ ३३ ॥
संहर्त्री सर्वदैत्यानां सावित्री वेदगामिनी ।
वेदातीता निरालम्बा निरालम्बगणप्रिया ॥ ३४ ॥
निरालम्बजनैः पूज्या निरालोका निराश्रया ।
एकाङ्गी सर्वगा सेव्या ब्रह्मपत्नी सरस्वती ॥ ३५ ॥
रासप्रिया रासगम्या रासाधिष्ठातृदेवता ।
रसिका रसिकानन्दा स्वयं रासेश्वरी परा ॥ ३६ ॥
रासमण्डलमध्यस्था रासमण्डलशोभिता ।
रासमण्डलसेव्या च रासक्रीडामनोहरा ॥ ३७ ॥
पुण्डरीकाक्षनिलया पुण्डरीकाक्षरोहिणी ।
पुण्डरीकाक्षसेव्या च पुण्डरीकाक्षवल्लभा ॥ ३८ ॥
सर्वजीवेश्वरी सर्वजीववन्द्या परात्परा ।
प्रकृतिः शम्भुकान्ता च सदाशिवमनोहरा ॥ ३९ ॥
क्षुत् पिपासा दया निद्रा भ्रान्तिः श्रान्तिः क्षमाकुला ।
वधूरूपा गोपपत्नी भारती सिद्धयोगिनी ॥ ४० ॥
सत्यरूपा नित्यरूपा नित्याङ्गी नित्यगेहिनी ।
स्थानदात्रि तथा धात्री महालक्ष्मीः स्वयंप्रभा ॥ ४१ ॥
सिन्धुकन्याऽऽस्थानदात्री द्वारकावासिनी तथा ।
बुद्धिः स्थितिः स्थानरूपा सर्वकारणकारणा ॥ ४२ ॥
भक्तप्रिया भक्तगम्या भक्तानन्दप्रदायिनी ।
भक्तकल्पद्रुमातीता तथातीतगुणा तथा ॥ ४३ ॥
मनोऽधिष्ठातृदेवी च कृष्णप्रेमपरायणा ।
निरामया सौम्यदात्री तथा मदनमोहिनी ॥ ४४ ॥
एकानंशाशिवा क्षेमा दुर्गा दुर्गतिनाशिनी ।
ईश्वरी सर्ववन्द्या च गोपनीया शुभङ्करी ॥ ४५ ॥
पालिनी सर्वभूतानां तथा कामाङ्गहारिणी ।
सद्योमुक्तिप्रदा देवी वेदसारा परात्परा ॥ ४६ ॥
हिमालयसुता सर्वा पार्वति गिरिजा सती ।
दक्षकन्या देवमाता मन्दलज्जा हरेस्तनूः ॥ ४७ ॥
वृन्दारण्यप्रिया वृन्दा वृन्दावनविलासिनी ।
विलासिनी वैष्णवी च ब्रह्मलोकप्रतिष्ठिता ॥ ४८ ॥
रुक्मिणी रेवती सत्यभामा जाम्बवती तथा ।
सुलक्ष्मणा मित्रविन्दा कालिन्दी जह्नुकन्यका ॥ ४९ ॥
परिपूर्णा पूर्णतरा तथा हैमवती गतिः ।
अपूर्वा ब्रह्मरूपा च ब्रह्माण्डपरिपालिनी ॥ ५० ॥
ब्रह्माण्डभाण्डमध्यस्था ब्रह्माण्डभाण्डरूपिणी ।
अण्डरूपाण्डमध्यस्था तथाण्डपरिपालिनी ॥ ५१ ॥
अण्डबाह्याण्डसंहर्त्री शिवब्रह्महरिप्रिया ।
महाविष्णुप्रिया कल्पवृक्षरूपा निरन्तरा ॥ ५२ ॥
सारभूता स्थिरा गौरी गौराङ्गी शशिशेखरा ।
श्वेतचम्पकवर्णाभा शशिकोटिसमप्रभा ॥ ५३ ॥
मालतीमाल्यभूषाढ्या मालतीमाल्यधारिणी ।
कृष्णस्तुता कृष्णकान्ता वृन्दावनविलासिनी ॥ ५४ ॥
तुलस्यधिष्ठातृदेवी संसारार्णवपारदा ।
सारदाऽहारदाम्भोदा यशोदा गोपनन्दिनी ॥ ५५ ॥
अतीतगमना गौरी परानुग्रहकारिणी ।
करुणार्णवसम्पूर्णा करुणार्णवधारिणी ॥ ५६ ॥
माधवी माधवमनोहारिणी श्यामवल्लभा ।
अन्धकारभयध्वस्ता मङ्गल्या मङ्गलप्रदा ॥ ५७ ॥
श्रीगर्भा श्रीप्रदा श्रीशा श्रीनिवासाच्युतप्रभा ।
श्रीरूपा श्रीहरा श्रीदा श्रीकामा श्रीस्वरूपिणी ॥ ५८ ॥
श्रीदामानन्ददात्री च श्रीदामेश्वरवल्लभा ।
श्रीनितम्बा श्रीगणेशा श्रीस्वरूपाश्रिता श्रुतिः ॥ ५९ ॥
श्रीक्रियारूपिणी श्रीला श्रीकृष्णभजनान्विता ।
श्रीराधा श्रीमती श्रेष्ठा श्रेष्ठरूपा श्रुतिप्रिया ॥ ६० ॥
योगेशी योगमाता च योगातीता युगप्रिया ।
योगप्रिया योगगम्या योगिनीगणवन्दिता ॥ ६१ ॥
जवाकुसुमसंकाशा दाडिमीकुसुमोपमा ।
नीलाम्बरधरा धीरा धैर्यरूपधराधृतिः ॥ ६२ ॥
रत्नसिंहासनस्था च रत्नकुण्डलभूषिता ।
रत्नालङ्कारसंयुक्ता रत्नमालाधरा परा ॥ ६३ ॥
रत्नेन्द्रसारहाराढ्या रत्नमालाविभूषिता ।
इन्द्रनीलमणिन्यस्तपादपद्मशुभा शुचिः ॥ ६४ ॥
कार्तिकी पौर्णमासी च अमावस्या भयापहा ।
गोविन्दराजगृहिणी गोविन्दगणपूजिता ॥ ६५ ॥
वैकुण्ठनाथगृहिणी वैकुण्ठपरमालया ।
वैकुण्ठदेवदेवाढ्या तथा वैकुण्ठसुन्दरी ॥ ६६ ॥
मदालसा वेदवती सीता साध्वी पतिव्रता ।
अन्नपूर्णा सदानन्दरूपा कैवल्यसुन्दरी ॥ ६७ ॥
कैवल्यदायिनी श्रेष्ठा गोपीनाथमनोहरा ।
गोपीनाथेश्वरी चण्डी नायिकानयनान्विता ॥ ६८ ॥
नायिका नायकप्रीता नायकानन्दरूपिणी ।
शेषा शेषवती शेषरूपिणी जगदम्बिका ॥ ६९ ॥
गोपालपालिका माया जायाऽऽनन्दप्रदा तथा ।
कुमारी यौवनानन्दा युवती गोपसुन्दरी ॥ ७० ॥
गोपमाता जानकी च जनकानन्दकारिणी ।
कैलासवासिनी रम्भा वैराग्यकुलदीपिका ॥ ७१ ॥
कमलाकान्तग्रहिणी कमला कमलालया ।
त्रैलोक्यमाता जगतामधिष्ठात्री प्रियाम्बिका ॥ ७२ ॥
हरकान्ता हररता हरानन्दप्रदायिनी ।
हरपत्नी हरप्रीता हरतोषणतत्परा॥ ७३ ॥
हरेश्वरी रामरता रामा रामेश्वरी रमा ।
श्यामला चित्रलेखा च तथा भुवनमोहिनी ॥ ७४ ॥
सुगोपी गोपवनिता गोपराज्यप्रदा शुभा ।
अङ्गारपूर्णा माहेयी मत्स्यराजसुतासती ॥ ७५ ॥
कौमारी नारसिंही च वाराही नवदुर्गिका ।
चञ्चलाचञ्चलामोदा नारीभुवनसुन्दरी ॥ ७६ ॥
दक्षयज्ञहरा दाक्षी दक्षकन्या सुलोचना ।
रतिरूपा रतिप्रीता रतिश्रेष्ठा रतिप्रदा ॥ ७७ ॥
रतिलक्षणगेहस्था विरजा भुवनेश्वरी ।
शङ्कास्पदा हरेर्जाया जामातृकुलवन्दिता ॥ ७८ ॥
वकुला वकुलामोदधारिणी यमुनाजया ।
विजया जयपत्नी च यमलार्जुनभञ्जिनी ॥ ७९ ॥
वक्रेश्वरी वक्ररूपा वक्रवीक्षणवीक्षिता ।
अपराजिता जगन्नाथा जगन्नाथेश्वरी यतिः ॥ ८० ॥
खेचरी खेचरसुता खेचरत्वप्रदायिनी ।
विष्णुवक्षःस्थलस्था च विष्णुभावनतत्परा ॥ ८१ ॥
चन्द्रकोटिसुगात्री च चन्द्राननमनोहरा ।
सेवा सेव्या शिवा क्षेमा तथा क्षेमकरी वधूः ॥ ८२ ॥
यादवेन्द्रवधूः शैब्या शिवभक्ता शिवान्विता ।
केवला निष्कला सूक्ष्मा महाभीमाभयप्रदा ॥ ८३ ॥
जीमूतरूपा जैमूती जितामित्रप्रमोदिनी ।
गोपालवनिता नन्दा कुलजेन्द्रनिवासिनी ॥ ८४ ॥
जयन्ती यमुनाङ्गी च यमुनातोषकारिणी ।
कलिकल्मषभङ्गा च कलिकल्मषनाशिनी ॥ ८५ ॥
कलिकल्मषरूपा च नित्यानन्दकरी कृपा ।
कृपावती कुलवती कैलासाचलवासिनी ॥ ८६ ॥
वामदेवी वामभागा गोविन्दप्रियकारिणी ।
नरेन्द्रकन्या योगेशी योगिनी योगरूपिणी ॥ ८७ ॥
योगसिद्धा सिद्धरूपा सिद्धक्षेत्रनिवासिनी ।
क्षेत्राधिष्ठातृरूपा च क्षेत्रातीता कुलप्रदा ॥ ८८ ॥
केशवानन्ददात्री च केशवानन्ददायिनी ।
केशवा केशवप्रीता केशवी केशवप्रिया ॥ ८९ ॥
रासक्रीडाकरी रासवासिनी राससुन्दरी ।
गोकुलान्वितदेहा च गोकुलत्वप्रदायिनी ॥ ९० ॥
लवङ्गनाम्नी नारङ्गी नारङ्गकुलमण्डना ।
एलालवङ्गकर्पूरमुखवासमुखान्विता ॥ ९१ ॥
मुख्या मुख्यप्रदा मुख्यरूपा मुख्यनिवासिनी ।
नारायणी कृपातीता करुणामयकारिणी ॥ ९२ ॥
कारुण्या करुणा कर्णा गोकर्णा नागकर्णिका ।
सर्पिणी कौलिनी क्षेत्रवासिनी जगदन्वया ॥ ९३ ॥
जटिला कुटिला नीला नीलाम्बरधरा शुभा ।
नीलाम्बरविधात्री च नीलकण्ठप्रिया तथा ॥ ९४ ॥
भगिनी भागिनी भोग्या कृष्णभोग्या भगेश्वरी ।
बलेश्वरी बलाराध्या कान्ता कान्तनितम्बिनी ॥ ९५ ॥
नितम्बिनी रूपवती युवती कृष्णपीवरी ।
विभावरी वेत्रवती संकटा कुटिलालका ॥ ९६ ॥
नारायणप्रिया शैला सृक्कणीपरिमोहिता ।
दृक्पातमोहिता प्रातराशिनी नवनीतिका ॥ ९७ ॥
नवीना नवनारी च नारङ्गफलशोभिता ।
हैमी हेममुखी चन्द्रमुखी शशिसुशोभना ॥ ९८ ॥
अर्द्धचन्द्रधरा चन्द्रवल्लभा रोहिणी तमिः ।
तिमिंगिलकुलमोदमत्स्यरूपाङ्गहारिणी ॥ ९९ ॥
कारिणी सर्वभूतानां कार्यातीता किशोरिणी ।
किशोरवल्लभा केशकारिका कामकारिका ॥ १०० ॥
कामेश्वरी कामकला कालिन्दीकूलदीपिका ॥ १०१ ॥
कलिन्दतनयातीरवासिनी तीरगेहिनी ॥ १०२ ॥
कादम्बरीपानपरा कुसुमामोदधारिणी ।
कुमुदा कुमुदानन्दा कृष्णेशी कामवल्लभा ॥ १०३ ॥
तर्काली वैजयन्ती च निम्बदाडिम्बरूपिणी ।
बिल्ववृक्षप्रिया कृष्णाम्बरा बिल्वोपमस्तनी ॥ १०४ ॥
बिल्वात्मिका बिल्ववसुर्बिल्ववृक्षनिवासिनी ।
तुलसीतोषिका तैतिलानन्दपरितोषिका ॥ १०५ ॥
गजमुक्ता महामुक्ता महामुक्तिफलप्रदा ।
अनङ्गमोहिनी शक्तिरूपा शक्तिस्वरूपिणी ॥ १०६ ॥
पञ्चशक्तिस्वरूपा च शैशवानन्दकारिणी ।
गजेन्द्रगामिनी श्यामलतानङ्गलता तथा ॥ १०७ ॥
योषिच्छक्तिस्वरूपा च योषिदानन्दकारिणी ।
प्रेमप्रिया प्रेमरूपा प्रेमानन्दतरङ्गिणी ॥ १०८ ॥
प्रेमहारा प्रेमदात्री प्रेमशक्तिमयी तथा ।
कृष्णप्रेमवती धन्या कृष्णप्रेमतरङ्गिणी ॥ १०९ ॥
प्रेमभक्तिप्रदा प्रेमा प्रेमानन्दतरङ्गिणी ।
प्रेमक्रीडापरीताङ्गी प्रेमभक्तितरङ्गिणी ॥ ११० ॥
प्रेमार्थदायिनी सर्वश्वेता नित्यतरङ्गिणी ।
हावभावान्विता रौद्रा रुद्रानन्दप्रकाशिनी ॥ १११ ॥
कपिला श्रृङ्खला केशपाशसम्बन्धिनी धटी ।
कुटीरवासिनी धूम्रा धूम्रकेशा जलोदरी ॥ ११२ ॥
ब्रह्माण्डगोचरा ब्रह्मस्वरूपिणी भवभाविनी ।
संसारनाशिनी शैवा शैवलानन्ददायिनी ॥ ११३ ॥
शिशिरा हेमरागाढ्या मेघरूपातिसुन्दरी ।
मनोरमा वेगवती वेगाढ्या वेदवादिनी ॥ ११४ ॥
दयान्विता दयाधारा दयारूपा सुसेविनी ।
किशोरसङ्गसंसर्गा गौरचन्द्रानना कला ॥ ११५ ॥
कलाधिनाथवदना कलानाथाधिरोहिणी ।
विरागकुशला हेमपिङ्गला हेममण्डना ॥ ११६ ॥
भाण्डीरतालवनगा कैवर्ती पीवरी शुकी ।
शुकदेवगुणातीत शुकदेवप्रिया सखी ॥ ११७ ॥
विकलोत्कर्षिणी कोषा कौशेयाम्बरधारिणी ।
कौषावरी कोषरूपा जगदुत्पत्तिकारिका ॥ ११८ ॥
सृष्टिस्थितिकरी संहारिणी संहारकारिणी ।
केशशैवलधात्री च चन्द्रगात्रा सुकोमला ॥ ११९ ॥
पद्माङ्गरागसंरागा विन्ध्याद्रिपरिवासिनी ।
विन्ध्यालया श्यामसखी सखीसंसाररागिणी ॥ १२० ॥
भूता भविष्या भव्या च भव्यगात्रा भवातिगा ।
भवनाशान्तकारिण्याकाशरूपा सुवेशिनी ॥ १२१ ॥
रतिरङ्गपरित्यागा रतिवेगा रतिप्रदा ।
तेजस्विनी तेजोरूपा कैवल्यपथदा शुभा ॥ १२२ ॥
भक्तिहेतुर्मुक्तिहेतुर्लङ्घिनी लङ्घनक्षमा ।
विशालनेत्रा वैशाली विशालकुलसम्भवा ॥ १२३ ॥
विशालगृहवासा च विशालबदरीरतिः ।
भक्त्यतीता भक्तिगतिर्भक्तिका शिवभक्तिदा ॥ १२४ ॥
शिवभक्तिस्वरूपा च शिवार्द्धाङ्गविहारिणी ।
शिरीषकुसुमामोदा शिरीषकुसुमोज्ज्वला ॥ १२५ ॥
शिरीषमृद्वी शैरीषी शिरीषकुसुमाकृतिः ।
वामाङ्गहारिणी विष्णोः शिवभक्तिसुखान्विता ॥ १२६ ॥
विजिता विजितामोदा गणगा गणतोषिता ।
हयस्या हेरम्बसुता गणमाता सुखेश्वरी ॥ १२७ ॥
दुःखहन्त्री दुःखहरा सेवितेप्सितसर्वदा ।
सर्वज्ञत्वविधात्री च कुलक्षेत्रनिवासिनी ॥ १२८ ॥
लवङ्गा पाण्डवसखी सखीमध्यनिवासिनी ।
ग्राम्यगीता गया गम्या गमनातीतनिर्भरा ॥ १२९ ॥
सर्वाङ्गसुन्दरी गङ्गा गङ्गाजलमयी तथा ।
गङ्गेरिता पूतगात्रा पवित्रकुलदीपिका ॥ १३० ॥
पवित्रगुणशीलाढ्या पवित्रानन्ददायिनी ।
पवित्रगुणसीमाढ्या पवित्रकुलदीपिनी ॥ १३१ ॥
कल्पमाना कंसहरा विन्ध्याचलनिवासिनी ॥ १३२ ॥
गोवर्धनेश्वरी गोवर्धनहास्या हयाकृतिः ॥ १३३ ॥
मीनावतारा मीनेशी गगनेशी हया गजी ।
हरिणी हारिणी हारधारिणी कनकाकृतिः ॥ १३४ ॥
विद्युत्प्रभा विप्रमाता गोपमाता गयेश्वरी ।
गवेश्वरी गवेशी च गवीशी गतिवासिनी ॥ १३५ ॥
गतिज्ञा गीतकुशला दनुजेन्द्रनिवारिणी ।
निर्वाणधात्री नैर्वाणी हेतुयुक्ता गयोत्तरा ॥ १३६ ॥
पर्वताधिनिवासा च निवासकुशला तथा ।
संन्यासधर्मकुशला संन्यासेशी शरन्मुखी ॥ १३७ ॥
शरच्चन्द्रमुखी श्यामहारा क्षेत्रनिवासिनी ।
वसन्तरागसंरागा वसन्तवसनाकृतिः ॥ १३८ ॥
चतुर्भुजा षड्भुजा च द्विभुजा गौरविग्रहा ।
सहस्त्रास्या विहास्या च मुद्रास्या मुददायिनी ॥ १३९ ॥
प्राणप्रिया प्राणरूपा प्राणरूपिण्यपावृता ।
कृष्णप्रीता कृष्णरता कृष्णतोषणतत्परा ॥ १४० ॥
कृष्णप्रेमरता कृष्णभक्ता भक्तफलप्रदा ।
कृष्णप्रेमा प्रेमभक्ता हरिभक्तिप्रदायिनी ॥ १४१ ॥
चैतन्यरूपा चैतन्यप्रिया चैतन्यरूपिणी ।
उग्ररूपा शिवक्रोदा कृष्णक्रोडा जलोदरी ॥ १४२ ॥
महोदरी महादुर्गकान्तारसुस्थवासिनी ।
चन्द्रावली चन्द्रकेशी चन्द्रप्रेमतरङ्गिणी ॥ १४३ ॥
समुद्रमथनोद्भुता समुद्रजलवासिनी ।
समुद्रामृतरूपा च समुद्रजलवासिका ॥ १४४ ॥
केशपाशरत निद्रा क्षुधा प्रेमतरङ्गिका ।
दूर्वादलश्यामतनुर्दूवादलतनुच्छविः ॥ १४५ ॥
नागरी नागरारागा नागरानन्दकारिणी ।
नागरलिङ्गनपरा नागराङ्गणमङ्गला ॥ १४६ ॥
उच्चनीचा हैमवतीप्रिया कृष्णतरङ्गदा ।
प्रेमालिङ्गनसिद्धाङ्गी सिद्धसाध्यविलासिका ॥ १४७ ॥
मङ्गलामोदजननी मेखलामोदधारिणी ।
रत्नमञ्जीरभूषाङ्गी रत्नभूषणभूषणा ॥ १४८ ॥
जम्बालमालिका कृष्णप्राणा प्राणविमोचना ।
सत्यप्रदा सत्यवती सेवकानन्ददायिका ॥ १४९ ॥
जगद्योनिर्जगद्बीजा विचित्रमणिभूषणा ।
राधारमणकान्ता च राध्या राधनरूपिणी ॥ १५० ॥
कैलासवासिनी कृष्णप्राणसर्वस्वदायिनी ।
कृष्णावतारनिरता कृष्णभक्तफलार्थिनी ॥ १५१ ॥
याचकायाचकानन्दकारिणी याचकोज्ज्वला ।
हरिभूषणभूषाढ्याऽऽनन्दयुक्ताऽऽर्द्रपादगा ॥ १५२ ॥
है-है-तालधरा थै-थै-शब्दशक्तिप्रकाशिनी ।
हे-हे-शब्दस्वरूपा च ही-ही-वाक्यविशारदा ॥ १५३ ॥
जगदानन्दकर्त्री च सान्द्रानन्दविशारदा ।
पण्डिता पण्डितगुणा पण्डितानन्दकारिणी ॥ १५४ ॥
परिपालनकर्त्री च तथा स्थितिविनोदिनी ।
तथा संहारशब्दाढ्या विद्वज्जनमनोहरा ॥ १५५ ॥
विदुषां प्रीतिजननी विद्वत्प्रेमविवर्धिनी ।
नादेशी नादरूपा च नादबिन्दुविधारिणी ॥ १५६ ॥
शून्यस्थानस्थिता शून्यरूपपादपवासिनी ।
कार्तिकव्रतकर्त्री च वसनाहारिणी तथा ॥ १५७ ॥
जलाशया जलतला शिलातलनिवासिनी ।
क्षुद्रकीटाङ्गसंसर्गा सङ्गदोषविनाशिनी ॥ १५८ ॥
कोटिकन्दर्पलावण्या कोटिकन्दर्पसुन्दरी ।
कन्दर्पकोटिजननी कामबीजप्रदायिनी ॥ १५९ ॥
कामशास्त्रविनोदा च कामशास्त्रप्रकाशिनी ।
कामप्रकाशिका कामिन्यणिमाद्यष्टसिद्धिदा ॥ १६० ॥
यामिनी यामिनीनाथवदना यामिनीश्वरी ।
यागयोगहरा भुक्तिमुक्तिदात्री हिरण्यदा ॥ १६१ ॥
कपालमालिनी देवी धामरूपिण्यपूर्वदा ।
कृपान्विता गुणागौण्या गुणातीतफलप्रदा ॥ १६२ ॥
कूष्माण्डभुतवेतालनाशिनी शरदान्विता ।
शीतला शबला हेला लीला लावण्यमङ्गला ॥ १६३ ॥
विद्यार्थिनी विद्यमाना विद्या विद्यास्वरूपिणी ।
आन्वीक्षिकीशास्त्ररूपा शास्त्रसिद्धान्तकारिणी ॥ १६४ ॥
नागेन्द्रा नागमाता च क्रीडकौतुकरूपिणी
हरिभावनशीला च हरितोषणतत्परा ॥ १६५ ॥
हरिप्राणा हरप्राणा शिवप्राणा शिवान्विता ।
नरकार्णवसंहर्त्री नरकार्णवनाशिनी ॥ १६६ ॥
नरेश्वरी नरातीता नरसेव्या नराङ्गना ।
यशोदानन्दनप्राणवल्लभा हरिवल्लभा ॥ १६७ ॥
यशोदानन्दनारम्या यशोदानन्दनेश्वरी ।
यशोदानन्दनाक्रीडा यशोदाक्रोडवासिनी ॥ १६८ ॥
यशोदानन्दनप्राणा यशोदानन्दनार्थदा ।
वत्सला कोशला काला करुणार्णवरूपिणी ॥ १६९ ॥
स्वर्गलक्ष्मीर्भूमिलक्ष्मीर्द्रौपदी पाण्डवप्रिया ।
तथार्जुनसखी भौमी भैमी भीमकुलोद्भवा ॥ १७० ॥
भुवनमोहना क्षीणा पानासक्ततरा तथा ।
पानार्थिनी पानपात्रा पानपानन्ददायिनी ॥ १७१ ॥
दुग्धमन्थनकर्माढ्या दधिमन्थनतत्परा ।
दधिभाण्डार्थिनी कृष्णक्रोधिनी नन्दनाङ्गना ॥ १७२ ॥
घृतलिप्ता तक्रयुक्ता यमुनापारकौतुका ।
विचित्रकथका कृष्णहास्यभाषणतत्परा ॥ १७३ ॥
गोपाङ्गनावेष्टिता च कृष्णसङ्गार्थिनी तथा ।
राससक्ता रासरतिरासवासक्तवासना ॥ १७४ ॥
हरिद्रा हारिता हारिण्यानन्दार्पितचेतना ।
निश्चैतन्या च निश्चेता तथा दारुहरिद्रिका ॥ १७५ ॥
सुबलस्य स्वसा कृष्णभार्या भाषातिवेगिनी ।
श्रीदामस्य सखी दामदामिनी दामधारिणी ॥ १७६ ॥
कैलासिनी केशिनी च हरिदम्बरधारिणी ।
हरिसांनिध्यदात्री च हरिकौतुकमङ्गला ॥ १७७ ॥
हरिप्रदा हरिद्वारा यमुनाजलवासिनी ।
जैत्रप्रदा जितार्थी च चतुरा चातुरी तमी ॥ १७८ ॥
तमिस्त्राऽऽतपरूपा च रौद्ररूपा यशोऽर्थिनी ।
कृष्णार्थिनी कृष्णकला कृष्णनन्दविधायिनी ॥ १७९ ॥
कृष्णार्थवासना कृष्णरागिणी भवभाविनी ।
कृष्णार्थरहिता भक्ता भक्तभक्तिशुभप्रदा ॥ १८० ॥
श्रीकृष्णरहिता दीना तथा विरहिणी हरेः ।
मथुरा मथुराराजगेहभावनभावना ॥ १८१ ॥
श्रीकृष्णभावना मोदा तथोन्मादविधायिनी ।
कृष्णार्थव्याकुला कृष्णसारचर्मधरा शुभा ॥ १८२ ॥
अलकेश्वरपूज्या च कुबेरेश्वरवल्लभा ।
धनधान्यविधात्री च जाया काया हया हयी ॥ १८३ ॥
प्रणवा प्रणवेशी च प्रणवार्थस्वरूपिणी ।
ब्रह्मविष्णुशिवार्धाङ्गहारिणी शैवशिंशपा ॥ १८४ ॥
राक्षसीनाशिनी भूतप्रेतप्राणविनाशिनी ।
सकलेप्सितदात्री च शची साध्वी अरुन्धती ॥ १८५ ॥
पतिव्रता पतिप्राणा पतिवाक्यविनोदिनी ।
अशेषासाधिनी कल्पवासिनी कल्परूपिणी ॥ १८६ ॥
फलश्रुति:
इत्येतत् कथितं देवि राधानामसहस्त्रकम् ।
यः पठेत् पाठयेद्वापि तस्य तुष्यति माधवः ॥ १८७ ॥
किं तस्य यमुनाभिर्वा नदीभिः सर्वतः प्रिये ।
कुरुक्षेत्रादितीर्थैश्च यस्य तुष्टो जनार्दनः ॥ १८८ ॥
स्तोत्रस्यास्य प्रसादेन किं न सिध्यति भूतले ।
ब्राह्मणो ब्रह्मवर्चाः स्यात् क्षत्रियो जगतीपतिः ॥ १८९ ॥
वैश्यो निधिपतिर्भूयाच्छूद्रो मुच्येत जन्मतः ।
ब्रह्महत्यासुरापानस्तेयादेरतिपातकात् ॥ १९० ॥
सद्यो मुच्येत देवेशि सत्यं सत्यं न संशयः ।
राधानामसहस्त्रस्य समानं नास्ति भूतले ॥ १९१ ॥
स्वर्गे वाप्यथ पाताले गिरौ वा जलतोऽपि वा ।
नातः परं शुभं स्तोत्रं तीर्थ नातः परं परम् ॥ १९२ ॥
एकादश्यां शुचिर्भूत्वा यः पठेत् सुसमाहितः ।
तस्य सर्वार्थसिद्धिः स्यात् श्रृणुयाद् वा सुशोभने ।
द्वादश्यां पौर्णमास्यां वा तुलसीसंनिधौ शिवे ।
यः पठेच्छृणुयाद्वापि तस्य तत्तत् फलं श्रृणु ॥ १९३ ॥
अश्वमेधं राजसूयं बार्हस्पत्यं तथाऽऽत्रिकम् ।
अतिरात्रं वाजपेयमग्निष्टोमं तथा शुभम् ॥ १९४ ॥
कृत्वा यत्फलमाप्नोति श्रुत्वा तत्फलमाप्नुयात् ।
कार्तिके चाष्टर्मी प्राप्य पठेद्वा श्रृणुयादपि ॥ १९५ ॥
सहस्त्रयुगकल्पान्तं वैकुण्ठवसतिं लभेत् ।
ततश्च ब्रह्मभवने शिवस्य भवने पुनः ॥ १९६ ॥
सुराधिनाथभवने पुनर्याति सलोकताम् ।
गङ्गातीरं समासाद्य यः पठेच्छृणुयादपि ॥ १९७ ॥
विष्णोः सारूप्यमायाति सत्यं सत्यं सुरेश्वरि ।
मम वक्त्रगिरेर्जाता पार्वतीवदनाश्रिता ॥ १९८ ॥
राधानामसहस्त्राख्या नदी त्रैलोक्यपावनी ।
पठ्यते हि मया नित्यं भक्त्या शक्त्या यथोचितम् ॥ १९९ ॥
मम प्राणसमं ह्यन्यत् तव प्रीत्या प्रकाशितम् ।
नाभक्ताय प्रदातव्यं पाखण्डाय कदाचन ॥ २०० ॥
नास्तिकाय विरागाय रागयुक्ताय सुन्दरि ।
तथा देयं महास्तोत्रं हरिभक्ताय शंकरि ॥ २०१ ॥
वैष्णवेषु यथाशक्तिदात्रे पुण्यार्थशालिने ॥ २०२ ॥
राधानामसुधावारि मम वक्त्रसुधाम्बुधेः ।
उद्धृतासौ त्वया यत्नाद् यतस्त्वं वैष्णवाग्रणीः ॥ २०३ ॥
विशुद्धसत्त्वाय यथार्थवादिने
द्विजस्य सेवानिरताय मन्त्रिणे ।
दात्रे यथाशक्ति सुभक्तिमानसे
राधापदध्यानपराय शोभने ॥ २०४ ॥
हरिपादाङ्कमधुपमनोभूताय मानसे ।
राधापादसुधास्वादशालिने वैष्णवाय च ॥ २०५ ॥
दद्यात् स्तोत्रं महापुण्यं हरिभक्तिप्रसाधनम् ।
जन्मान्तरं न पश्यन्ति राधाकृष्णपदार्थिनः ॥ २०६ ॥
मम प्राणा वैष्णवा हि तेषां रक्षार्थमेव हि ।
शूलं मया धार्यते हि नान्यथा मेऽत्र कारणम् ॥ २०७ ॥
हरिभक्तिद्विषामर्थे शूलं संधार्यते मया ।
श्रृणु देवि यथार्थं मे गदितं मयि सुव्रते ॥ २०८ ॥
भक्तासि मे प्रियासि त्वमतः स्नेहात् प्रकाशितम् ।
कदापि नोच्यते देवि मया नामसहस्त्रकम् ॥ २०९ ॥
॥ इति श्रीनारदपाञ्चरात्रे ज्ञानामृतसारे श्रीराधिकासहस्त्रनामस्तोत्रं सम्पूर्णम् ॥