శ్రీరామమఙ్గలాశాసనమ్

మఙ్గళం కోసలేన్ద్రాయ మహనీయగుణాబ్ధయే.
చక్రవర్తితనూజాయ సార్వభౌమాయ మఙ్గళమ్.. 1 ..

వేదవేదాన్తవేద్యాయ మేఘశ్యామళమూర్తయే.
పుంసాం మోహనరూపాయ పుణ్యశ్లోకాయ మఙ్గళమ్.. 2 ..

విశ్వామిత్రాన్తరఙ్గాయ మిథిలానగరీపతేః.
భాగ్యానాం పరిపాకాయ భవ్యరూపాయ మఙ్గళమ్.. 3 ..

పితృభక్తాయ సతతం భ్రాతృభిః సహ సీతయా.
నన్దితాఖిలలోకాయ రామభద్రాయ మఙ్గళమ్.. 4 ..

త్యక్తసాకేతవాసాయ చిత్రకూటవిహారిణే.
సేవ్యాయ సర్వయమినాం ధీరోదారాయ మఙ్గళమ్.. 5 ..

సౌమిత్రిణా చ జానక్యా చాపబాణాసిధారిణే.
సంసేవ్యాయ సదా భక్త్యా స్వామినే మమ మఙ్గళమ్.. 6 ..

దణ్డకారణ్యవాసాయ ఖణ్డితామర శత్రవే.
గృధ్రరాజాయ భక్తాయ ముక్తిదాయాస్తు మఙ్గళమ్..7 ..

సాదరం శబరీదత్తఫలమూలాభిలాషిణే.
సౌలభ్యపరిపూర్ణాయ సత్త్వోద్రిక్తాయ మఙ్గళమ్..8 ..

హనుమత్సమవేతాయ హరీశాభీష్టదాయినే.
వాలిప్రమథనాయాస్తు మహాధీరాయ మఙ్గళమ్..9 ..

శ్రీమతే రఘువీరాయ సేతూల్లఙ్క్తిసిన్ధవే.
జితరాక్షసరాజాయ రణధీరాయ మఙ్గళమ్.. 10 ..

ఆసాద్య నగరీ దివ్యామభిషిక్తాయ సీతయా.
రాజాధిరాజరాజాయ రామభద్రాయ మఙ్గళమ్.. 11 ..

మఙ్గళాశాసనపరైర్మదాచార్య పురోగమైః.
సర్వైశ్చ పూర్వైరాచార్యైః సత్కృతాయాస్తు మఙ్గళమ్.. 12 ..