॥ নারাযণকভ়চম্ ॥

॥ নারাযণকভ়চম্ ॥

শ্রীরাজোভ়াচ
যযা গুপ্তঃ সহস্রাক্ষঃ সভ়াহান্রিপুসৈনিকান্।
ক্রীডন্নিভ় ভ়িনির্জিত্য ত্রিলোক্যা বুভুজে শ্রিযম্॥১॥

ভগভ়ংস্তন্মমাখ্যাহি ভ়র্ম নারাযণাত্মকম্।
যথাততাযিনঃ শত্রূন্যেন গুপ্তোঽজযন্মৃধে॥২॥

শ্রীশুক উভ়াচ
ভ়ৃতঃ পুরোহিতস্ত্বাষ্ট্রো মহেন্দ্রাযানুপৃচ্ছতে।
নারাযণাখ্যং ভ়র্মাহ তদিহৈকমনাঃ শৃণু॥৩॥

শ্রীভ়িশ্বরূপ উভ়াচ
ধৌতাঙ্ঘ্রিপাণিরাচম্য সপভ়িত্র উদঙ্মুখঃ।
কৃতস্বাঙ্গকরন্যাসো মন্ত্রাভ্যাং ভ়াগ্যতঃ শুচিঃ॥৪॥

নারাযণপরং ভ়র্ম সন্নহ্যেদ্ভয আগতে।
পাদযোর্জানুনোরূর্ভ়োরুদরে হৃদ্যথোরসি॥৫॥

মুখে শিরস্যানুপূর্ভ়্যাদোংকারাদীনি ভ়িন্যসেৎ।
ওং নমো নারাযণাযেতি ভ়িপর্যযমথাপি ভ়া॥৬॥

করন্যাসং ততঃ কুর্যাদ্দ্বাদশাক্ষরভ়িদ্যযা।
প্রণভ়াদিযকারান্তমঙ্গুল্যঙ্গুষ্ঠপর্ভ়সু॥৭॥

ন্যসেদ্ধৃদয ওংকারং ভ়িকারমনু মূর্ধনি।
ষকারং তু ভ্রুভ়োর্মধ্যে ণকারং শিখযা ন্যসেৎ॥৮॥

ভ়েকারং নেত্রযোর্যুঞ্জ্যান্নকারং সর্ভ়সন্ধিষু।
মকারমস্ত্রমুদ্দিশ্য মন্ত্রমূর্তির্ভভ়েদ্‌বুধঃ॥৯॥

সভ়িসর্গং ফডন্তং তৎসর্ভ়দিক্ষু ভ়িনির্দিশেৎ।
ওং ভ়িষ্ণভ়ে নম ইতি॥১০॥

আত্মানং পরমং ধ্যাযেদ্ধ্যেযং ষট্শক্তিভির্যুতম্।
ভ়িদ্যাতেজস্তপোমূর্তিমিমং মন্ত্রমুদাহরেৎ॥১১॥

ওং হরির্ভ়িদধ্যান্মম সর্ভ়রক্ষাং
ন্যস্তাঙ্ঘ্রিপদ্মঃ পতগেন্দ্রপৃষ্ঠে।
দরারিচর্মাসিগদেষুচাপ
পাশান্দধানোঽষ্টগুণোঽষ্টবাহুঃ॥১২॥

জলেষু মাং রক্ষতু মৎস্যমূর্তি-
র্যাদোগণেভ্যো ভ়রুণস্য পাশাৎ।
স্থলেষু মাযাভ়টুভ়ামনোঽভ়্যা-
ত্ত্রিভ়িক্রমঃ খেঽভ়তু ভ়িশ্বরূপঃ॥১৩॥

দুর্গেষ্বটভ়্যাজিমুখাদিষু প্রভুঃ-
পাযান্নৃসিংহোঽসুরযূথপারিঃ।
ভ়িমুঞ্চতো যস্য মহাট্টহাসং-
দিশো ভ়িনেদুর্ন্যপতংশ্চ গর্ভাঃ॥১৪॥

রক্ষত্বসৌ মাধ্বনি যজ্ঞকল্পঃ-
স্বদংষ্ট্রযোন্নীতধরো ভ়রাহঃ।
রামোঽদ্রিকূটেষ্বথ ভ়িপ্রভ়াসে
সলক্ষ্মণোঽভ়্যাদ্ভরতাগ্রজোঽস্মান্॥১৫॥

মামুগ্রধর্মাদখিলাৎপ্রমাদা-
ন্নারাযণঃ পাতু নরশ্চ হাসাৎ।
দত্তস্ত্বযোগাদথ যোগনাথঃ
পাযাদ্গুণেশঃ কপিলঃ কর্মবন্ধাৎ॥১৬॥

সনৎকুমারোঽভ়তু কামদেভ়া-
দ্ধযশীর্ষা মাং পথি দেভ়হেলনাৎ।
দেভ়র্ষিভ়র্যঃ পুরুষার্চনান্তরা-
ৎকূর্মো হরির্মাং নিরযাদশেষাৎ॥১৭॥

ধন্বন্তরির্ভগভ়ান্পাত্বপথ্যা-
দ্দ্বন্দ্বাদ্ভযাদৃষভো নির্জিতাত্মা।
যজ্ঞশ্চ লোকাদভ়তাজ্জনান্তা-
দ্‌বলো গণাৎক্রোধভ়শাদহীন্দ্রঃ॥১৮॥

দ্বৈপাযনো ভগভ়ানপ্রবোধা-
দ্‌বুদ্ধস্তু পাষণ্ডগণপ্রমাদাৎ।
কল্কিঃ কলেঃ কালমলাৎপ্রপাতু
ধর্মাভ়নাযোরুকৃতাভ়তারঃ॥১৯॥

মাং কেশভ়ো গদযা প্রাতরভ়্যা-
দ্গোভ়িন্দ আসঙ্গভ়মাত্তভ়েণুঃ।
নারাযণঃ প্রাহ্ণ উদাত্তশক্তি
র্মধ্যন্দিনে ভ়িষ্ণুররীন্দ্রপাণিঃ॥২০॥

দেভ়োঽপরাহ্ণে মধুহোগ্রধন্বা
সাযং ত্রিধামাভ়তু মাধভ়ো মাম্।
দোষে হৃষীকেশ উতার্ধরাত্রে
নিশীথ একোঽভ়তু পদ্মনাভঃ॥২১॥

শ্রীভ়ৎসধামাপররাত্র ঈশঃ
প্রত্যূষ ঈশোঽসিধরো জনার্দনঃ।
দামোদরোঽভ়্যাদনুসন্ধ্যং প্রভাতে
ভ়িশ্বেশ্বরো ভগভ়ান্কালমূর্তিঃ॥২২॥

চক্রং যুগান্তানলতিগ্মনেমি
ভ্রমৎসমন্তাদ্ভগভ়ৎপ্রযুক্তম্।
দন্দগ্ধি দন্দগ্ধ্যরিসৈন্যমাশু
কক্ষং যথা ভ়াতসখো হুতাশঃ॥২৩॥

গদেঽশনিস্পর্শনভ়িস্ফুলিঙ্গে
নিষ্পিণ্ঢি নিষ্পিণ্ঢ্যজিতপ্রিযাসি।
কুষ্মাণ্ডভ়ৈনাযকযক্ষরক্ষো
ভূতগ্রহাংশ্চূর্ণয চূর্ণযারীন্॥২৪॥

ত্বং যাতুধানপ্রমথপ্রেতমাতৃ
পিশাচভ়িপ্রগ্রহঘোরদৃষ্টীন্।
দরেন্দ্র ভ়িদ্রাভ়য কৃষ্ণপূরিতো
ভীমস্বনোঽরের্হৃদযানি কম্পযন্॥২৫॥

ত্বং তিগ্মধারাসিভ়রারিসৈন্য
মীশপ্রযুক্তো মম ছিন্ধি ছিন্ধি।
চক্ষূংষি চর্মন্ছতচন্দ্র ছাদয
দ্বিষামঘোনাং হর পাপচক্ষুষাম্॥২৬॥

যন্নো ভযং গ্রহেভ্যোঽভূৎকেতুভ্যো নৃভ্য এভ় চ।
সরীসৃপেভ্যো দংষ্ট্রিভ্যো ভূতেভ্যোঽংহোভ্য এভ় চ॥২৭॥

সর্ভ়াণ্যেতানি ভগভ়ন্নামরূপানুকীর্তনাৎ।
প্রযান্তু সঙ্ক্ষযং সদ্যো যে নঃ শ্রেযঃপ্রতীপকাঃ॥২৮॥

গরুডো ভগভ়ান্স্তোত্র স্তোভশ্ছন্দোমযঃ প্রভুঃ।
রক্ষত্বশেষকৃচ্ছ্রেভ্যো ভ়িষ্বক্সেনঃ স্বনামভিঃ॥২৯॥

সর্ভ়াপদ্ভ্যো হরের্নাম রূপযানাযুধানি নঃ।
বুদ্ধীন্দ্রিযমনঃপ্রাণান্পান্তু পার্ষদভূষণাঃ॥৩০॥

যথা হি ভগভ়ানেভ় ভ়স্তুতঃ সদসচ্চ যৎ।
সত্যেনানেন নঃ সর্ভ়ে যান্তু নাশমুপদ্রভ়াঃ॥৩১॥

যথৈকাত্ম্যানুভাভ়ানাং ভ়িকল্পরহিতঃ স্বযম্।
ভূষণাযুধলিঙ্গাখ্যা ধত্তে শক্তীঃ স্বমাযযা॥৩২॥

তেনৈভ় সত্যমানেন সর্ভ়জ্ঞো ভগভ়ান্হরিঃ।
পাতু সর্ভ়ৈঃ স্বরূপৈর্নঃ সদা সর্ভ়ত্র সর্ভ়গঃ॥৩৩॥

ভ়িদিক্ষু দিক্ষূর্ধ্বমধঃ সমন্তা-
দন্তর্বহির্ভগভ়ান্নারসিংহঃ।
প্রহাপয লোকভযং স্বনেন
স্বতেজসা গ্রস্তসমস্ততেজাঃ॥৩৪॥

মঘভ়ন্নিদমাখ্যাতং ভ়র্ম নারাযণাত্মকম্।
ভ়িজেষ্যসেঽঞ্জসা যেন দংশিতোঽসুরযূথপান্॥৩৫॥

এতদ্ধারযমাণস্তু যং যং পশ্যতি চক্ষুষা।
পদা ভ়া সংস্পৃশেৎসদ্যঃ সাধ্বসাৎস ভ়িমুচ্যতে॥৩৬॥

ন কুতশ্চিদ্ভযং তস্য ভ়িদ্যাং ধারযতো ভভ়েৎ।
রাজদস্যুগ্রহাদিভ্যো ভ়্যাধ্যাদিভ্যশ্চ কর্হিচিৎ॥৩৭॥

ইমাং ভ়িদ্যাং পুরা কশ্চিৎকৌশিকো ধারযন্দ্বিজঃ।
যোগধারণযা স্বাঙ্গং জহৌ স মরুধন্বনি॥৩৮॥

তস্যোপরি ভ়িমানেন গন্ধর্ভ়পতিরেকদা।
যযৌ চিত্ররথঃ স্ত্রীভির্ভ়ৃতো যত্র দ্বিজক্ষযঃ॥৩৯॥

গগনান্ন্যপতৎসদ্যঃ সভ়িমানো হ্যভ়াক্ষিরাঃ
স ভ়ালিখিল্যভ়চনাদস্থীন্যাদায ভ়িস্মিতঃ
প্রাস্য প্রাচীসরস্বত্যাং স্নাত্বা ধাম স্বমন্বগাৎ॥৪০॥

শ্রীশুক উভ়াচ
য ইদং শৃণুযাৎকালে যো ধারযতি চাদৃতঃ।
তং নমস্যন্তি ভূতানি মুচ্যতে সর্ভ়তো ভযাৎ॥৪১॥

এতাং ভ়িদ্যামধিগতো ভ়িশ্বরূপাচ্ছতক্রতুঃ
ত্রৈলোক্যলক্ষ্মীং বুভুজে ভ়িনির্জিত্য মৃধেঽসুরান্॥৪২॥