అథ షోడశోఽధ్యాయః

శ్రీభగవానువాచ
అభయం సత్త్వసంశుద్ధిర్జ్ఞానయోగవ్యవస్థితిః.
దానం దమశ్చ యజ్ఞశ్చ స్వాధ్యాయస్తప ఆర్జవమ్..1..

అహింసా సత్యమక్రోధస్త్యాగః శాన్తిరపైశునమ్.
దయా భూతేష్వలోలుప్త్వం మార్దవం హ్రీరచాపలమ్..2..

తేజః క్షమా ధృతిః శౌచమద్రోహో నాతిమానితా.
భవన్తి సమ్పదం దైవీమభిజాతస్య భారత..3..

దమ్భో దర్పోఽభిమానశ్చ క్రోధః పారుష్యమేవ చ.
అజ్ఞానం చాభిజాతస్య పార్థ సమ్పదమాసురీమ్..4..

దైవీ సమ్పద్విమోక్షాయ నిబన్ధాయఽఽసురీ మతా.
మా శుచః సమ్పదం దైవీమభిజాతోఽసి పాణ్డవ..5..

ద్వౌ భూతసర్గౌ లోకేఽస్మిన్ దైవ ఆసుర ఏవ చ.
దైవో విస్తరశః ప్రోక్త ఆసురం పార్థ మే శృణు..6..

ప్రవృత్తిం చ నివృత్తిం చ జనా న విదురాసురాః.
న శౌచం నాపి చఽఽచారో న సత్యం తేషు విద్యతే..7..

అసత్యమప్రతిష్ఠం తే జగదాహురనీశ్వరమ్.
అపరస్పరసమ్భూతం కిమన్యత్ కామహైతుకమ్..8..

ఏతాం దృష్టిమవష్టభ్య నష్టాత్మానోఽల్పబుద్ధయః.
ప్రభవన్త్యుగ్రకర్మాణః క్షయాయ జగతోఽహితాః..9..

కామమాశ్రిత్య దుష్పూరం దమ్భమానమదాన్వితాః.
మోహాద్గృహీత్వాఽసద్గ్రాహాన్ ప్రవర్తన్తేఽశుచివ్రతాః..10..

చిన్తామపరిమేయాం చ ప్రలయాన్తాముపాశ్రితాః.
కామోపభోగపరమా ఏతావదితి నిశ్చితాః..11..

ఆశాపాశశతైర్బద్ధాః కామక్రోధపరాయణాః.
ఈహన్తే కామభోగార్థమ్ అన్యాయేనార్థసఞ్చయాన్..12..

ఇదమద్య మయా లబ్ధమిమం ప్రాప్స్యే మనోరథమ్.
ఇదమస్తీదమపి మే భవిష్యతి పునర్ధనమ్..13..

అసౌ మయా హతః శత్రుర్హనిష్యే చాపరానపి.
ఈశ్వరోఽహమహం భోగీ సిద్ధోఽహం బలవాన్ సుఖీ..14..

ఆఢ్యోఽభిజనవానస్మి కోఽన్యోస్తి సదృశో మయా.
యక్ష్యే దాస్యామి మోదిష్య ఇత్యజ్ఞానవిమోహితాః..15..

అనేకచిత్తవిభ్రాన్తా మోహజాలసమావృతాః.
ప్రసక్తాః కామభోగేషు పతన్తి నరకేఽశుచౌ..16..

ఆత్మసమ్భావితాః స్తబ్ధా ధనమానమదాన్వితాః.
యజన్తే నామయజ్ఞైస్తే దమ్భేనావిధిపూర్వకమ్..17..

అహఙ్కారం బలం దర్పం కామం క్రోధం చ సంశ్రితాః.
మామాత్మపరదేహేషు ప్రద్విషన్తోఽభ్యసూయకాః..18..

తానహం ద్విషతః క్రూరాన్ సంసారేషు నరాధమాన్.
క్షిపామ్యజస్రమశుభాన్ ఆసురీష్వేవ యోనిషు..19..

ఆసురీం యోనిమాపన్నా మూఢా జన్మని జన్మని.
మామప్రాప్యైవ కౌన్తేయ తతో యాన్త్యధమాం గతిమ్..20..

త్రివిధం నరకస్యేదం ద్వారం నాశనమాత్మనః.
కామః క్రోధస్తథా లోభస్తస్మాదేతత్త్రయం త్యజేత్..21..

ఏతైర్విముక్తః కౌన్తేయ తమోద్వారైస్త్రిభిర్నరః.
ఆచరత్యాత్మనః శ్రేయస్తతో యాతి పరాం గతిమ్..22..

యః శాస్త్రవిధిముత్సృజ్య వర్తతే కామకారతః.
న స సిద్ధిమవాప్నోతి న సుఖం న పరాం గతిమ్..23..

తస్మాచ్ఛాస్త్రం ప్రమాణం తే కార్యాకార్యవ్యవస్థితౌ.
జ్ఞాత్వా శాస్త్రవిధానోక్తం కర్మ కర్తుమిహార్హసి..24..

.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే దైవాసురసమ్పద్విభాగయోగో నామ షోడశోఽధ్యాయః ..