ಅಥ ರಾವಣಕೃತ-ಶಿವತಾಣ್ಡವಸ್ತೋತ್ರಮ್

ಜಟಾಟವೀಗಲಜ್ಜಲಪ್ರವಾಹಪಾವಿತಸ್ಥಲೇ
ಗಲೇಽವಲಮ್ಬ್ಯ ಲಮ್ಬಿತಾಂ ಭುಜಙ್ಗತುಙ್ಗಮಾಲಿಕಾಮ್ .
ಡಮಡ್ಡಮಡ್ಡಮಡ್ಡಮನ್ನಿನಾದವಡ್ಡಮರ್ವಯಂ
ಚಕಾರ ಚಣ್ಡತಾಣ್ಡವಂ ತನೋತು ನಃ ಶಿವಃ ಶಿವಮ್ .. ೧..

ಜಟಾಕಟಾಹಸಮ್ಭ್ರಮಭ್ರಮನ್ನಿಲಿಮ್ಪನಿರ್ಝರೀ-
ವಿಲೋಲವೀಚಿವಲ್ಲರೀವಿರಾಜಮಾನಮೂರ್ಧನಿ .
ಧಗದ್ಧಗದ್ಧಗಜ್ಜ್ವಲಲ್ಲಲಾಟಪಟ್ಟಪಾವಕೇ
ಕಿಶೋರಚನ್ದ್ರಶೇಖರೇ ರತಿಃ ಪ್ರತಿಕ್ಷಣಂ ಮಮ .. ೨..

ಧರಾಧರೇನ್ದ್ರನನ್ದಿನೀವಿಲಾಸಬನ್ಧುಬನ್ಧುರ
ಸ್ಫುರದ್ದಿಗನ್ತಸನ್ತತಿಪ್ರಮೋದಮಾನಮಾನಸೇ .
ಕೃಪಾಕಟಾಕ್ಷಧೋರಣೀನಿರುದ್ಧದುರ್ಧರಾಪದಿ
ಕ್ವಚಿದ್ದಿಗಮ್ಬರೇ ಮನೋ ವಿನೋದಮೇತು ವಸ್ತುನಿ .. ೩..

ಜಟಾಭುಜಙ್ಗಪಿಙ್ಗಲಸ್ಫುರತ್ಫಣಾಮಣಿಪ್ರಭಾ
ಕದಮ್ಬಕುಙ್ಕುಮದ್ರವಪ್ರಲಿಪ್ತದಿಗ್ವಧೂಮುಖೇ .
ಮದಾನ್ಧಸಿನ್ಧುರಸ್ಫುರತ್ತ್ವಗುತ್ತರೀಯಮೇದುರೇ
ಮನೋ ವಿನೋದಮದ್ಭುತಂ ಬಿಭರ್ತು ಭೂತಭರ್ತರಿ .. ೪..

ಸಹಸ್ರಲೋಚನಪ್ರಭೃತ್ಯಶೇಷಲೇಖಶೇಖರ
ಪ್ರಸೂನಧೂಲಿಧೋರಣೀ ವಿಧೂಸರಾಙ್ಘ್ರಿಪೀಠಭೂಃ .
ಭುಜಙ್ಗರಾಜಮಾಲಯಾ ನಿಬದ್ಧಜಾಟಜೂಟಕ
ಶ್ರಿಯೈ ಚಿರಾಯ ಜಾಯತಾಂ ಚಕೋರಬನ್ಧುಶೇಖರಃ .. ೫..

ಲಲಾಟಚತ್ವರಜ್ವಲದ್ಧನಞ್ಜಯಸ್ಫುಲಿಙ್ಗಭಾ-
ನಿಪೀತಪಞ್ಚಸಾಯಕಂ ನಮನ್ನಿಲಿಮ್ಪನಾಯಕಮ್ .
ಸುಧಾಮಯೂಖಲೇಖಯಾ ವಿರಾಜಮಾನಶೇಖರಂ
ಮಹಾಕಪಾಲಿಸಮ್ಪದೇಶಿರೋಜಟಾಲಮಸ್ತು ನಃ .. ೬..

ಕರಾಲಭಾಲಪಟ್ಟಿಕಾಧಗದ್ಧಗದ್ಧಗಜ್ಜ್ವಲ-
ದ್ಧನಞ್ಜಯಾಹುತೀಕೃತಪ್ರಚಣ್ಡಪಞ್ಚಸಾಯಕೇ .
ಧರಾಧರೇನ್ದ್ರನನ್ದಿನೀಕುಚಾಗ್ರಚಿತ್ರಪತ್ರಕ-
ಪ್ರಕಲ್ಪನೈಕಶಿಲ್ಪಿನಿ ತ್ರಿಲೋಚನೇ ರತಿರ್ಮಮ .. ೭..

ನವೀನಮೇಘಮಣ್ಡಲೀ ನಿರುದ್ಧದುರ್ಧರಸ್ಫುರತ್-
ಕುಹೂನಿಶೀಥಿನೀತಮಃ ಪ್ರಬನ್ಧಬದ್ಧಕನ್ಧರಃ .
ನಿಲಿಮ್ಪನಿರ್ಝರೀಧರಸ್ತನೋತು ಕೃತ್ತಿಸಿನ್ಧುರಃ
ಕಲಾನಿಧಾನಬನ್ಧುರಃ ಶ್ರಿಯಂ ಜಗದ್ಧುರನ್ಧರಃ .. ೮..

ಪ್ರಫುಲ್ಲನೀಲಪಙ್ಕಜಪ್ರಪಞ್ಚಕಾಲಿಮಪ್ರಭಾ-
ವಲಮ್ಬಿಕಣ್ಠಕನ್ದಲೀರುಚಿಪ್ರಬದ್ಧಕನ್ಧರಮ್ .
ಸ್ಮರಚ್ಛಿದಂ ಪುರಚ್ಛಿದಂ ಭವಚ್ಛಿದಂ ಮಖಚ್ಛಿದಂ
ಗಜಚ್ಛಿದಾನ್ಧಕಚ್ಛಿದಂ ತಮನ್ತಕಚ್ಛಿದಂ ಭಜೇ .. ೯..

ಅಖರ್ವ ಸರ್ವಮಙ್ಗಲಾಕಲಾಕದಮ್ಬಮಞ್ಜರೀ
ರಸಪ್ರವಾಹಮಾಧುರೀ ವಿಜೃಮ್ಭಣಾಮಧುವ್ರತಮ್ .
ಸ್ಮರಾನ್ತಕಂ ಪುರಾನ್ತಕಂ ಭವಾನ್ತಕಂ ಮಖಾನ್ತಕಂ
ಗಜಾನ್ತಕಾನ್ಧಕಾನ್ತಕಂ ತಮನ್ತಕಾನ್ತಕಂ ಭಜೇ .. ೧೦..

ಜಯತ್ವದಭ್ರವಿಭ್ರಮಭ್ರಮದ್ಭುಜಙ್ಗಮಶ್ವಸ-
ದ್ವಿನಿರ್ಗಮತ್ಕ್ರಮಸ್ಫುರತ್ಕರಾಲಭಾಲಹವ್ಯವಾಟ್ .
ಧಿಮಿದ್ಧಿಮಿದ್ಧಿಮಿಧ್ವನನ್ಮೃದಙ್ಗತುಙ್ಗಮಙ್ಗಲ
ಧ್ವನಿಕ್ರಮಪ್ರವರ್ತಿತ ಪ್ರಚಣ್ಡತಾಣ್ಡವಃ ಶಿವಃ .. ೧೧..

ದೃಷದ್ವಿಚಿತ್ರತಲ್ಪಯೋರ್ಭುಜಙ್ಗಮೌಕ್ತಿಕಸ್ರಜೋರ್-
ಗರಿಷ್ಠರತ್ನಲೋಷ್ಠಯೋಃ ಸುಹೃದ್ವಿಪಕ್ಷಪಕ್ಷಯೋಃ .
ತೃಣಾರವಿನ್ದಚಕ್ಷುಷೋಃ ಪ್ರಜಾಮಹೀಮಹೇನ್ದ್ರಯೋಃ
ಸಮಂ ಪ್ರವರ್ತಯನ್ಮನಃ ಕದಾ ಸದಾಶಿವಂ ಭಜೇ .. ೧೨..

ಕದಾ ನಿಲಿಮ್ಪನಿರ್ಝರೀನಿಕುಞ್ಜಕೋಟರೇ ವಸನ್
ವಿಮುಕ್ತದುರ್ಮತಿಃ ಸದಾ ಶಿರಃ ಸ್ಥಮಞ್ಜಲಿಂ ವಹನ್ .
ವಿಮುಕ್ತಲೋಲಲೋಚನೋ ಲಲಾಮಭಾಲಲಗ್ನಕಃ
ಶಿವೇತಿ ಮನ್ತ್ರಮುಚ್ಚರನ್ ಕದಾ ಸುಖೀ ಭವಾಮ್ಯಹಮ್ .. ೧೩..

ನಿಲಿಮ್ಪನಾಥನಾಗರೀಕದಮ್ಬಮೌಲಮಲ್ಲಿಕಾ-
ನಿಗುಮ್ಫನಿರ್ಭರಕ್ಷರನ್ಮಧೂಷ್ಣಿಕಾಮನೋಹರಃ .
ತನೋತು ನೋ ಮನೋಮುದಂ ವಿನೋದಿನೀಮಹರ್ನಿಶಂ
ಪರಶ್ರಿಯಃ ಪರಂ ಪದಂತದಙ್ಗಜತ್ವಿಷಾಂ ಚಯಃ .. ೧೪..

ಪ್ರಚಣ್ಡವಾಡವಾನಲಪ್ರಭಾಶುಭಪ್ರಚಾರಣೀ
ಮಹಾಷ್ಟಸಿದ್ಧಿಕಾಮಿನೀಜನಾವಹೂತಜಲ್ಪನಾ .
ವಿಮುಕ್ತವಾಮಲೋಚನಾವಿವಾಹಕಾಲಿಕಧ್ವನಿಃ
ಶಿವೇತಿ ಮನ್ತ್ರಭೂಷಣಾ ಜಗಜ್ಜಯಾಯ ಜಾಯತಾಮ್ .. ೧೫..

ಇದಮ್ ಹಿ ನಿತ್ಯಮೇವಮುಕ್ತಮುತ್ತಮೋತ್ತಮಂ ಸ್ತವಂ
ಪಠನ್ಸ್ಮರನ್ಬ್ರುವನ್ನರೋ ವಿಶುದ್ಧಿಮೇತಿಸನ್ತತಮ್ .
ಹರೇ ಗುರೌ ಸುಭಕ್ತಿಮಾಶು ಯಾತಿ ನಾನ್ಯಥಾ ಗತಿಂ
ವಿಮೋಹನಂ ಹಿ ದೇಹಿನಾಂ ಸುಶಙ್ಕರಸ್ಯ ಚಿನ್ತನಮ್ .. ೧೬..

ಪೂಜಾವಸಾನಸಮಯೇ ದಶವಕ್ತ್ರಗೀತಂ
ಯಃ ಶಮ್ಭುಪೂಜನಪರಂ ಪಠತಿ ಪ್ರದೋಷೇ .
ತಸ್ಯ ಸ್ಥಿರಾಂ ರಥಗಜೇನ್ದ್ರತುರಙ್ಗಯುಕ್ತಾಂ
ಲಕ್ಷ್ಮೀಂ ಸದೈವ ಸುಮುಖಿಂ ಪ್ರದದಾತಿ ಶಮ್ಭುಃ .. ೧೭..