Sanaatana deva

.. Asht'ashlokee stotram ..

stotra-d8a2d930

Composer: Paaramparika Reads: 3

Select Script / Language: देवनागरी (संस्कृत) English (Roman) தமிழ் తెలుగు ಕನ್ನಡ ગુજરાતી বাংলা

॥ अष्टश्लोकी स्तोत्रम् ॥

श्रीपराशरभट्टार्यः श्रीरङ्गेशपुरोहितः।

श्रीवत्साङ्कसुतः श्रीमान् श्रेयसे मेऽस्तु भूयसे॥

अकारार्थो विष्णुर्जगदुदयरक्षाप्रलयकृत्

मकारार्थो जीवस्तदुपकरणं वैष्णवमिदम्।

उकारोऽनन्यार्हं नियमयति सम्बन्धमनयोः

त्रयीसारस्त्र्यात्मा प्रणव इममर्थं समदिशत्॥ १॥

मन्त्रब्रह्मणि मध्यमेन नमसा पुंसः स्वरूपं गति:-

गम्यं शिक्षितमीक्षितेन पुरतः पश्चादपि स्थानतः।

स्वातन्त्र्यं निजरक्षणं समुचिता वृत्तिश्च नान्योचिता

तस्यैवेति हरेर्विविच्य कथितं स्वस्यापि नार्हं ततः॥ २॥

अकारार्थायैव स्वमहमथ मह्यं न निवहा

नराणां नित्यानामयनमिति नारायणपदम्।

यमाहास्मै कालं सकलमपि सर्वत्र सकला

स्ववस्थास्वाविःस्युर्मम सहजकैङ्कर्यविधयः॥ ३॥

देहासक्तात्मबुद्धिर्यदि भवति पदं साधु विद्यात्तृतीयं

स्वातन्त्र्यान्धो यदि स्यात्प्रथममितरशेषत्वधीश्चेद् द्वितीयम्।

आत्मत्राणोन्मुखश्चेन्नम इति च पदं बान्धवाभासलोल:

शब्दं नारायणाख्यं विषयचपलधीश्चेच्चतुर्थी प्रपन्नः॥ ४ ॥

नेतृत्वं नित्ययोगं समुचितगुणजातं तनुख्यापनं चो-

पायं कर्तव्यभागं त्वथमिथुनपरं प्राप्यमेवं प्रसिद्धम्।

स्वामित्वं प्रार्थनां च प्रबलतरविरोधिप्रहाणं दशैतान्

मन्तारं त्रायते चेत्यधिगतनिगमः षट्पदोऽयं द्विखण्डः॥ ५ ॥

ईशानां जगतामधीशदयितां नित्यानपायां श्रियं

संश्रित्याश्रयणोचिताखिलगुणस्याङ्ग्री हरेराश्रये।

इष्टोपायतया श्रिया च सहितायायात्मेश्वरायार्थये

कर्तुं दास्यमशेषमप्रतिहतं नित्यं त्वहं निर्ममः॥ ६ ॥

मत्प्राप्त्यर्थतया मयोक्तमखिलं सन्त्यज्य धर्मं पुनः-

मामेकं मदवाप्तये शरणमित्यार्तोऽवसायं कुरु।

त्वामेवं व्यवसाययुक्तमखिलज्ञानादिपूर्णो ह्यह

मत्प्राप्तिप्रतिबन्धकैर्विरहितं कुर्यां शुचं मा कृथाः॥ ७ ॥

निश्चित्य त्वदधीनतां मयि सदा कर्माद्युपायान् हरे!

कर्तुं त्यक्तुमपि प्रपत्तुमनलं सीदामि दुःखाकुलः।

एतज्ज्ञानमुपेयुषो मम पुनस्सर्वापराधक्षयं

कर्ताऽसीति दृढोऽस्मि ते तु चरमं वाक्यं स्मरन् सारथेः॥ ८ ॥

॥ इति श्रीपराशरभट्टविरचिता अष्टश्लोकी ॥