epustakalaya.com

Sanaatana deva

.. Shreeharistotram ..

stotra-ba04ec46

Composer: Paaramparika Reads: 7

Select Script / Language: देवनागरी (संस्कृत)

जगज्जालपालं कचत्कंठभालं

शरच्चंद्रभालं महादैत्यकालम् ।

नभोनीलकायं दुरावारमायं

सुपद्मासहायं भजेऽहं भजेऽहम् ॥ १ ॥

सदांभोधिवासं गलत्पुष्पहासं

जगत्संनिवासं शतादित्यभासम् ।

गदा चक्रशस्त्रं लसत्पीतवस्त्रं

हसच्चारुवक्त्रं भजे० ॥ २ ॥

रमाकंठहारं श्रुतिव्रातसारं

जलांतर्विहारं धराभारहारम् ।

चिदानंदरूपं मनोज्ञस्वरूपं

धृतानेकरूपं भजे० ॥ ३ ॥

जराजन्महीनं परानंदपीनं

समाधानलीनं सदैवंनवीनम् ।

जगज्जन्महेतुं सुरानीककेतुं

त्रिलोकैक सेतुं भजे ० ॥ ४ ॥

कृताम्नायगानं खगाधीशयानं

विमुक्तेर्निदानं हरारातिमानम् ।

स्वभक्तानुकुलं जगद्‌वृक्षमूलं

निरस्तार्तशूलं भजे० ॥ ५ ॥

समस्तामरेशं द्विरेफाभकेशं

जगद्विंबलेशं ह्रदाकाशदेशम् ।

सदादिव्य देहं विमुक्ताखिलेहं

सुवैकुण्ठगेहं भजे० ॥ ६ ॥

सुरालीबलिष्ठं त्रिलोकीवरिष्ठं

गुरूणां गरिष्ठं स्वरूपैकनिष्ठम् ।

सदा युद्धधीरं महावीरवीरं

भवांभोधितीरं भजे० ॥ ७ ॥

रमावामभागं तलीनग्ननागं

कृताधीनयागं गतारागरागम् ।

मुनींद्रै: सुगीतं सुरै: संपरीतं

गुणौघैरतीतं भजे० ॥ ८ ॥

इदं यस्तु नित्यं समाधायचित्तं

पठेदष्टकं कष्टहारं मुरारे: ।

स विष्णोर्विशोकं ध्रुवं याति लोकं

जराजन्मशोकं पुनर्विदते नो ॥ ९ ॥