Sanaatana deva

.. Shree nri'sim'haasht'akam ..

stotra-ae0cb07e

Composer: Paaramparika Reads: 10

Select Script / Language: देवनागरी (संस्कृत) English (Roman) தமிழ் తెలుగు ಕನ್ನಡ ગુજરાતી বাংলা

श्रीमदकलङ्कपरिपूर्णशशिकोटि - श्रीधर मनोहर सटापटलकान्त। पालय कृपालय भवाम्बुधि निमग्नं दैत्यवरकाल नरसिंह ! नरसिंह !॥ १ ॥

पादकमलावनतपातकिजनानां पातकदवानल पतत्रिवरकेतो। भावन परायण भवातिहरया मां पाहि कृपयैव नरसिंह! नरसिंह!॥ २ ॥

तुङ्गनख पङ्क्ति दलितासुरवरासृक् - पङ्कनवकुङ्कुमविपङ्किलमहोरः। पण्डितनिधान कमलालय नमस्ते पङ्कजनिषण्ण नरसिंह ! नरसिंह!॥ ३ ॥

मौळिषु विभूषणमिवामरवराणां योगिहृदयेषु च शिरस्सु निगमानाम्।। राजदरविन्दरुचिरं पदयुगं ते देहि मम मूर्ध्नि नरसिंह! नरसिंह !॥ ४ ॥

वारिजविलोचन मदन्तिमदशायां क्लेशविवशीकृतसमस्तकरणायाम्। एहि रमया सह शरण्य ! विहगानां नाथमधिरुह्य नरसिंह! नरसिंह !॥ ५ ॥

हाटककिरीटवरहारवनमाला - ताररशनामकरकुण्डलमणीन्द्रैः। भूषितमशेष निलयं तव वपुर्मे चेतसि चकास्तु नरसिंह ! नरसिंह !॥ ६ ॥

इन्दुरविपावकविलोचन रमायाः मन्दिर महाभुजलसद्वररथाङ्ग! सुन्दर चिराय रमतां त्वयि मनो मे नन्दितसुरेश नरसिंह! नरसिंह!॥ ७ ॥

माधव मुकुन्द मधुसूदन मुरारे वामन नृसिंह शरणं भव नतानाम्। कामद घृणिन निखिलकारण नयेयं कालममरेश नरसिंह ! नरसिंह !॥ ८ ॥

अष्टकमिदं सकलपातकभयघ्नं कामदमशेषदुरितामयरिपुघ्नम्। यः पठति सन्ततमशेषनिलयं ते गच्छति पदं स नरसिंह ! नरसिंह !॥ ९ ॥

॥ इति श्रीनृसिंहाष्टकं समाप्तम् ॥