श्री महागणपति पञ्चावरणस्तोत्रम्
अधस्तान्मानुषाकारं पुरस्तात्कुञ्जराकृति ।
निरस्ताशेषदुरितं पुरस्तादस्तु वस्तु नः ॥
अनाद्यायाखिलाद्याय मायिने गतमायिने ।
अरूपाय स्वरूपाय शिवाय गुरवे नमः ॥
श्रीशिवः -
सृष्टिस्थितिविनाशानां विश्वस्यास्यैककारणम् ।
महागणपतिं वन्दे पञ्चावरणसंयुतम् ॥ १॥
क्रीडासक्तगणाधीश करशीकरपूरितम् ।
ऐक्षवाम्भोनिधिं वन्दे तरङ्गकुलसङ्कुलम् ॥ २॥
तस्य मध्ये द्वीपवर्यं नौमि रत्नशिलातलम् ।
सेवागतामराधीश दैत्यसिद्धसमाकुलम् ॥ ३॥
पारिजातकसन्तान मन्दारहरिचन्दनान् ।
सकल्पवृक्षान् तत्रस्थान् संश्रितेष्टवरप्रदान् ॥ ४॥
पलाशपल्लवफल प्रसूनर्तुवरव्रजैः ।
युगपत्सेव्यमानस्य महतः कल्पशाखिनः ॥ ५॥
तेषां ज्वलन्मरकत प्रवालकमणिव्रजात् ।
अधस्तात्कौमुदीबालातपाभ्यां सङ्कुलस्थलीम् ॥ ६॥
रत्नवेदीं यजेत्पूर्णकुम्भदीपोपशोभिताम् ।
लसद्वितानसंयुक्तां चतुःस्तम्भविराजिताम् ॥ ७॥
मुक्ताप्रवालशोभाढ्यां नानारत्नैश्च शोभिताम् ।
तत्र धर्मादिसिंहास्य चतुष्पादसमन्वितम् ॥ ८॥
पूजयामि विभोः पीठमधर्माद्युपशोभितम् ।
तन्मध्ये लिपिसंयुक्तं दलाष्टकमनोहरम् ॥ ९॥
षट्कोणचक्रमध्यस्थं त्रिकोणाङ्कितकर्णिकम् ।
वृत्तभूवलयोपेतं विलसत्केसरान्वितम् ॥ १०॥
सर्वशक्त्याख्यकमलं पूजयाम्यासनात्मकम् ।
तीव्रा च ज्वालिनी नन्दा भोगदा कामरूपिणी ॥ ११॥
उग्रा तेजोवती सत्या नवमी विघ्ननाशिनी ।
किञ्जल्ककर्णिकासीना यास्ताः शोणाङ्गवाससः ॥ १२॥
वन्दे वराभयकराः पीठशक्तीर्गणेशितुः ।
त्रिकोणकर्णिकायां तु सुखासीनं सुरार्चितम् ॥ १३॥
जपाकुसुमसङ्काशं दीप्तिरञ्जितदिङ्मुखम् ।
गजाननं जगद्वन्द्यं तुन्दिलं चन्द्रशेखरम् ॥ १४॥
एकदन्तं त्रिणयनं नागयज्ञोपवीतिनम् ।
रक्तमाल्याम्बरधरं रक्तगन्धानुलेपनम् ॥ १५॥
फणामणिलसद्भोग भोगिभूषणभूषितम् ।
वामनाङ्घ्रिकराम्भोजं दशदोर्दण्डमण्डितम् ॥ १६॥
रमाविष्ण्वादिमिथुन हेत्यलङ्कृतविग्रहम् ।
दक्षवामकराग्रेषु बीजापूरं गदां धनुः ॥ १७॥
ऐक्षवं त्रिशिखं चक्रं कमलं पाशमुत्पलम् ।
कलमाग्रं स्वरदनं पुष्करे कलशं शुभम् ॥ १८॥
दधानं कलशस्थानि नानारत्नानि सर्वदा ।
वितरन्तं स्वभक्तेभ्योऽभितःसंसृतिधारया ॥ १९॥
गण्डस्थलगलद्दान गन्धलुब्धान्मुहुर्मुहुः ।
निवारयन्तं मधुपान् कर्णतालनघट्टनैः ॥ २०॥
महागणपतिं वन्दे वरदं शक्तिसंयुतम् ।
वामाङ्के गणनाथस्य सुखासीनां शुचिस्मिताम् ॥ २१॥
करेण पतिमालिङ्ग्य दक्षिणेनेतरेण तु ।
बिभ्रतीं फुल्लकमलं कृपाविस्तृतवीक्षणाम् ॥ २२॥
दिव्यमाल्याम्बरालेपां दिव्याभरणभूषिताम् ।
साधकाभीष्टसर्वार्थ सिद्धिदानैकतत्पराम् ॥ २३॥
गौराङ्गीं गणनाथस्य शक्तिं भक्त्याऽभिवादये ।
अग्रे बिल्वतरोर्मूले दिव्यसिंहासनस्थितौ ॥ २४॥
विद्युन्नीलाम्बुदनिभौ द्विचतुर्बाहुशालिनौ ।
पद्मद्वयगदाखड्गशङ्खचक्रायुधान्वितौ ॥ २५॥
श्वेतपीताम्बरधरौ दिव्यालेपनभूषितौ ।
रमारमेशौ संस्तौमि गणेशाभिमुखस्थितौ ॥ २६॥
गणेशदक्षिणे भागे वटवृक्षस्थले स्थितौ ।
त्र्यक्षौ सिंहासनासीनौ सुरासुरनिषेवितौ ॥ २७॥
हाटकस्फटिकप्रख्यौ पृथग्बाहुचतुष्टयौ ।
पाशाङ्कुशवराभीति द्वयशूलपरश्वधौ ॥ २८॥
दिव्यमालाम्बरालेप भूषणाविन्दुशेखरौ ।
गणेशाभिमुखासीनौ नौम्युमावृषभध्वजौ ॥ २९॥
गणेशोत्तरभागस्थौ बोधिवृक्षस्थले स्थितौ ।
दिव्यसिंहासनारूढौ हेमविद्रुमसन्निभौ ॥ ३०॥
दिव्यमाल्याम्बरालेपभूषणौ द्विद्विबाहुकौ ।
उत्पलद्वयपुण्ड्रेक्षु चापपुष्पशरायुधौ ॥ ३१॥
गणेशाभिमुखासीनौ प्रस्तौमि रतिमन्मथौ ।
गणेशवाम भागस्थौ प्रियङ्गुद्रुममूलगौ ॥ ३२॥
नीलोत्पलद्युतिनिभौ दिव्यसिंहासनाश्रितौ ।
शुकव्रीह्यग्रचक्रोद्यद्गदाभीतिवरान्वितौ ॥ ३३॥
श्वेतपीताम्बरौ दिव्यमाल्यालेपनभूषितौ ।
गणेशाभिमुखासीनौ द्विचतुर्बाहुशालिनौ ॥ ३४॥
आधारभूतौ भूतानां भूवराहौ समाश्रये ।
षट्कोणस्थानगामोद प्रमोदोन्मुखदुर्मुखान् ॥ ३५॥
अविघ्नं विघ्नकर्तारं गणेशाभिमुखस्थितान् ।
शोणाङ्गान् शुभ्रमाल्यांश्च त्रिणेत्रान् भोगिभूषणान् ॥ ३६॥
पाशाङ्कुशवराभीति हस्तानर्धेन्दुशेखरान् ।
ऋद्ध्यादिशक्तिसहितान् गजवक्त्रान् समाश्रये ॥ ३७॥
ऋद्धिस्समृद्विश्च तथा कान्तिश्च मदनावती ।
मदद्रवा द्राविणी च षडामोदादिशक्तयः ॥ ३८॥
यास्ताश्चामीकरनिभाः सम्फुल्लाम्बुजधारिणीः ।
दिव्याभरणमाल्यानुलेपनांशुकभूषणाः ॥ ३९॥
आत्मेशाङ्कस्थिताः सौम्याः सिद्धिदाः शरणं भजे ।
गणेशोभयपार्श्वस्थौ मुक्तामाणिक्यसन्निभौ ॥ ४०॥
सदा धनानि वर्षन्तौ स्वशक्तिभ्यां समन्वितौ ।
वसुधारावसुमतीभ्यां श्रये शङ्खाख्यपद्मकौ ॥ ४१॥
वह्नीशरक्षो वाय्वग्र पृष्ठेष्वङ्गानि षड्विभोः ।
हृदादीनि प्रसन्नानि नानावर्णाकृतीनि च ॥ ४२॥
गणेशाभिमुखस्थानि नतिमुद्राणि संश्रये ।
दिव्यांशुकालेपमाल्याः पृथग्वर्णाननाकृतीः ॥ ४३॥
स्वहेतिवाहनोपेताः स्तौमि ब्राह्म्यादिमातृकाः ।
प्रागादिदिक्पतीन् स्वस्वहेतिवाहनसंयुतान् ।
नानावर्णाकृतीन् सौम्यानिन्द्रादीन् शरणं भजे ॥ ४४॥
चतुश्चत्वारिंशत्परिगणितपद्यैर्विरचितं
गणेशस्तोत्रं यः पठति नियतात्मा स लभते ।
धनं धान्यं पुत्रान् जननृपवशित्वं पशुचयं
चिरायुस्सद्विद्यां विपुलतरकीर्तिं शिवपदम् ॥ ४५॥
चतुश्चत्वारिंशत्परिगणितमेतत्प्रतिदिनं
जपेदष्टद्रव्यैर्गणपतिसमाराधनपरः ।
चतुश्चत्वारिंशद्दिवसमिति जप्त्वा स लभते
सकृच्छ्रानिष्टार्थानपि जपदिनेष्वेव सुलभान् ॥ ४६॥
नारिकेलकदलीफललाजान्मोदकान्पृथुकसक्तुतिलेक्षून् ।
सन्निवेद्य परितर्प्य गणेशं कीर्तयेत्स्तवमिमं पुमर्थदम् ॥ ४७॥
यदक्षरपदभ्रष्टं मात्राहीनं तु यद्भवेत् ।
तत्सर्वं वल्लभायुक्तो गणेशः क्षन्तुमर्हति ॥ ४८॥
इति श्रीमहाशैवतन्त्रान्तर्गतं महागणपतिपञ्चावरणस्तोत्रम् ।