श्रीगणेशस्तोत्रम्
श्रीगणेशाय नमः ।
सिन्दूरकुङ्कुमहुताशनविद्रुमार्क-
रक्ताब्जदाडिमनिभाय चतुर्भुजाय ।
हेरम्बभैरवगणेश्वरनायकाय
सर्वार्थसिद्धिफलदाय गणेश्वराय ॥ १॥
चिदचित्पदगम्भीरं गमागमपदोज्झितम् ।
गहनाकाशसङ्काशं वन्दे देवं गणेश्वरम् ॥ २॥
श्रीसनत्कुमार उवाच ।
शङ्कराद्ब्रह्मणा प्राप्तं पद्मयोनेर्मया प्रभोः ।
तदहं कीर्तयिष्यामि स्तोत्रं परमदुर्लभम् ॥ ३॥
षष्ठ्यां चतुर्थ्यामष्टम्यां चतुर्दश्यां विशेषतः ।
पूजयेच्च गणाध्यक्षं श्रद्धाभक्तिसमन्वितः ॥ ४॥
अर्घैः पुष्पैस्तथा धूपैर्दीपैर्माल्यैश्च चामरैः ।
वस्त्रैः कुण्डलकेयूरैर्मौलिभिश्च वितानकैः ॥ ५॥
भक्ष्यैर्भोज्यैरपूपैश्च मत्स्यैर्मांसैश्च मोदकैः ।
पानकैः फलमूलैश्च होमैर्मन्त्रादिभिस्तथा ॥ ६॥
गङ्गाहृदे तु गाङ्गेयं श्रीशैले तु गणेश्वरम् ।
वाराणस्यां गजवक्त्रं गयायां टङ्कधारिणम् ॥ ७॥
प्रयागे तु गणाध्यक्षं केदारे विकटाननम् ।
लम्बोदरं कुरुक्षेत्रे नैमिषे च मदोत्कटम् ॥ ८॥
जम्बुकं दण्डकारण्ये लोकेशं हिमवद्गिरौ ।
विश्वक्सेनं तु विन्ध्याद्रौ मलये हेमकुम्भकम् ॥ ९॥
नायकं पुष्करद्वीपे विघ्नेशं शल्मले स्थितम् ।
इलावृते विश्वरूपं हरिवर्षे घटोदरम् ॥ १०॥
त्रिनेत्रं सिंहलद्वीपे श्वेतद्वीपे तु वामनम् ।
उज्जयिन्यां च लम्बोष्टं मालवे शूर्पकर्णकम् ॥ ११॥
सौराष्ट्रे वरदं देवं कश्मीरे भीमरूपिणम् ।
सिन्धुसागरयोर्मध्ये स्थितं वै मन्त्रनायकम् ॥ १२॥
हर्यक्षं यक्षभवने हरियक्षाभिधं विभुम् ।
पद्माभरणनामानं कैलासे परमेश्वरम् ॥ १३॥
महायोगं महेन्द्रे च सह्ये वाराहरूपिणम् ।
महोदरं च लुम्पायां चम्पायां शिखिवाहनम् ॥ १४॥
पाशहस्तं त्रिकूटे च पूजयेत्सर्वसिद्धिदम् ।
बलमग्निगुहायां च पाटले सिंहवाहनम् ॥ १५॥
पौण्ड्रे रौद्रमुखं चापि कलापिग्रामके जयम् ।
मेरुपृष्ठे कामरूपं नन्दनं नन्दने वने ॥ १६॥
विजयं वै गन्धवने देवदारुवने गणम् ।
आर्तानां विघ्नहरणं गङ्गासागरसङ्गमे ॥ १७॥
महापथे विरूपाक्षं चित्रकूटे मदोत्कटम् ।
दुर्जयं यमुनातीरे स्तम्भनं गन्धमाधने ॥ १८॥
भद्रवटे चाम्बरीशं मोहनं हस्तिनापुरे ।
किष्किन्दायामुग्रकेतुं लङ्कायां तु विभीषणम् ॥ १९॥
कलिङ्गे वरुणं चैव गान्धारे च मदोत्कटम् ।
अश्वत्थं च तुरुष्केषु चीने शत्रुजयावहम् ॥ २०॥
वज्रहस्तं कोसलेषु दाक्षिणात्येषु लोहितम् ।
शूलोद्धृतकरं चैव मध्यदेशे प्रकीर्तितम् ॥ २१॥
एकदंष्ट्रं पश्चिमाब्धौ पूर्वदेशे पराजितम् ।
उत्तरे चारुवक्त्रं च वरिष्ठं त्रिपुरेषु च ॥ २२॥
सुवर्णगर्भं विघ्नेशं नदीनां सङ्गमे स्थितम् ।
गिरिसन्धिषु विज्ञेयं हिरण्यकवचाभिधम् ॥ २३॥
सुमुखं नागरन्ध्रेषु नर्मदायां च षड्भुजम् ।
महापुरे महामायां भद्रकर्णे ह्रदे शिवम् ॥ २४॥
गोकर्णे गजकर्णं तु कान्यकुब्जे वराननम् ।
पद्मासनं कामरूपे श्रीमुखं सर्वतः स्थितम् ॥ २५॥
वेदवेदाङ्गशास्त्रेषु पूजयेद्ब्रह्मणस्पतिम् ।
अष्टाषष्टिस्तु नामानि स्तुतान्यद्भुतकर्मणः ॥ २६॥
नित्यं प्रभातकाले तु चिन्तयेद्गणनायकम् ।
एतत्स्तोत्रं पवित्रं च माङ्गल्यं पापनाशनम् ॥ २७॥
शस्त्र-खार्खोद-वेताल-यक्ष रक्षो भयापहम् ।
चौरारण्यभयव्याघ्रव्याधिदुर्भिक्षनाशनम् ॥ २८॥
कृत्यादिमायाशमनं सर्वशत्रुविमर्दनम् ।
त्रिकालं यः पठेद्भक्त्या स भवेत्सर्वसिद्धिभाक् ॥ २९॥
गणेश्वरप्रसादेन लभते शाङ्करं पदम् ॥ ३०॥
इति आदित्यपुराणे गणेशस्तोत्रम्