Sanaatana deva

.. Shreevaravaramuniprapattih' ..

stotra-1281255c

Composer: Paaramparika Reads: 9

Select Script / Language: देवनागरी (संस्कृत)

लोकार्यदेशिकदयागुणपात्रभूत

श्रीशैलनाथगुरुपादसरोजसंगात् ।

प्राप्तात्मसद्गुणशमादिविशिष्टरम्य

जामातृयोगिचरणौ शरणं प्रपद्ये॥ १॥

श्रीलक्ष्मणार्यमुनिपादसरोजयुग्मं

श्रीमाधवांघ्रिवरलाभनिमित्तमासीत्।

यस्येहतादृगभिमानविदीशरम्य

जामातृयोगिचरणौ शरणं प्रपद्ये ॥ २॥

भट्टार्ययोगिप्रतिवादिभयंकरार्य-

वानाद्रि संयमिमुखाश्रितपादपद्मम् ।

यस्तादृगार्य्यवरसादरपूज्यरम्य

जामातृयोगिचरणौ शरणं प्रपद्ये ॥ ३॥

श्रीरंगदिव्यपुरमंगलनित्यवास -

संजातहर्षगुणसंपदयागमेन।

संत्यक्तविष्णुपद सूरिजनादिरम्य

जामातृयोगिचरणौ शरणं प्रपद्ये ॥ ४॥

शेषोथ वा गरुडसैन्यधुरीणको वा

श्रीनाथयोगियतिनाथकयामुनो वा।

इत्यायसंततिविचिंतितरुप रम्य

जामातृयोगिचरणौ शरणं प्रपद्ये ॥ ५॥

यः श्रीशठारिनिगमान्तनिगूढभाव-

मत्यादरेण निजशिष्यवरैः समेतः।

व्याख्याति तादृगमितापि न सूक्तिरम्य

जामातृयोगिचरणौशरणं प्रपद्ये ॥ ६ ॥

प्रातर्विकस्तऋजुपंकजतुल्यशोभौ

श्रीपादयुग्मजकिञ्जलकेन युक्तौ।

प्रत्यर्थिचित्तपरितापहरौ तु रम्य

जामातृयोगिचरणौ शरणं प्रपद्ये ॥ ७॥

पूर्वंशठारिगुरुदिव्य पुरे वसंतौ

पश्चात्प्रकृष्टगुणरंगकृताधिवासौ।

आत्मीयसंचरणपूतभुवौ तु रम्य

जामातृयोगिचरणौ शरणं प्रपद्ये ॥ ८॥

जन्मान्तरोपचितपुण्यचयै कलाभौ

सन्मंगलातिशयनित्यनिदानभूतौ ।

सत्पुंगवादरितसंगवरौ तु रम्य

जामातृयोगिचरणौ शरणं प्रपद्ये॥ ६॥

यन्निष्ठपावनपयः कणवातलेश-

मनिष्ठपापशततूल इवाग्निकल्प।

तौ पुष्टशिष्टजनचित्तकृतौ तु रम्य

जामातृयोगिचरणौ शरणं प्रपद्ये॥ १०॥

॥ श्रीवरवरमुनिप्रपत्तिः ॥