..ஶ்ரீபா⁴ஷ்யகாரப்ரபத்தி꞉..

॥श्रीभाष्यकारप्रपत्तिः॥

श्रीवैष्णवागमपयोदधि पूर्णचन्द्र श्रीशाझिपद्म मकरन्दरसज्ञभृङ्ग। गोविन्दवर्यकरसारसपूजितौ ते श्रीभाष्यकारचरणौ शरणं प्रपद्ये ॥ १ ॥

श्रीशैलपूर्णमुखदेशिकलब्धबोध तुर्याश्रमप्रथित मौनिकुल प्रदीप। भट्टार्यवर्यकरनीरजपूजितौ ते श्रीभाष्यकारचरणौ शरणं प्रपद्ये॥ २ ॥

काञ्चीपुरीवरदराजकृपैकपात्र रङ्गेश पूर्णकरुणा परिणामरूप। वेदान्तदेशिककराम्बुज पूजितौ ते श्रीभाष्यकारचरणौ शरणं प्रपद्ये॥ ३ ॥

श्रीयादवाद्रि पतिपादसरोजहंस श्रीभूतपट्टणरमेश कटाक्ष धन्य। शेषावतार कलिवैरिकरार्चितौ ते श्रीभाष्यकारचरणौ शरणं प्रपद्ये॥ ४ ॥

श्रीवेङ्कटाचलपति प्रियलक्ष्मणार्य सर्वज्ञभव्य यतिशेखर सार्वभौम। वीक्षा वनेशहितकृष्णवनार्चितौ ते श्रीभाष्यकारचरणौ शरणं प्रपद्ये॥ ५ ॥

पाषण्डजालतरुपावक सम्यमीन्द्र जैनेभपञ्चमुखबौद्धतमो दिनेश। लोकार्यहस्तसरसीरुह पूजितौ ते श्रीभाष्यकारचरणौ शरणं प्रपद्ये॥ ६ ॥

चार्वाकशैलपतिवज्र कृपासमुद्र काणाददानव सुदर्शन मौनिचन्द्र। श्रीवेङ्कटेशकरपङ्कज पूजितौ ते श्रीभाष्यकारचरणौ शरणं प्रपद्ये ॥ ७ ॥

मिथ्याकथा कुमतिशीलभुजङ्ग तार्क्ष्य कापालिकाम्बुधरमारुत वीतराग। मन्नाथ केशवगुरूत्तमपूजितौ ते श्रीभाष्यकारचरणौ शरणं प्रपद्ये ॥ ८ ॥

त्रय्यन्तदेशिकपते वकुळाभिराम पादारविन्द रससारस सारसाक्ष। श्रीमत् शठारि मुनिवल्लभ पूजितौ ते श्रीभाष्यकारचरणौ शरणं प्रपद्ये ॥ ९ ॥

काषायरम्यकमनीय शिखोपवीत दण्डत्रयोज्ज्वल करोल्लसितोर्ध्वपुण्ड्र। उद्यद्दिनेश रुचिशोभित पाहि मां ते श्रीभाष्यकारचरणौ शरणं प्रपद्ये ॥ १० ॥

॥ इति श्रीभाष्यकारप्रपत्तिः समाप्ता॥